اخباركم
انا والبنات صديقاتي عزمنا نسوي حفلة باربكيو في بيتنا 😎
عاد ماني عارفه شنو اسوي شنو اجهز
ابي افكار للتنيجر صديقاتي فرفوشيات نبي عبط ووناسه واكلات حلوه وتونس
بغيت افكاركم لاهنتوا
يسلمو
اعملي كباب اللي هو زي الكفته للشوي على اسياخ
وما تنسي الخضار اللي راح تشويها زي الفلفل الرومي والبصل والجزر والطماطم
اعملي تبولة وكتري منها ومتبل باذنجان وممكن بطاطا مهروسه
والحلويات ما تنسيها والعصائر كمان وحضري قهوة وشاي
حياج الله عزيزتي…
الشوي متعة خصوصاً لما يكون فيه مشاركة 
شوفي انتي صديقاتج شنو الأشياء اللي يحبونها أو يفضلونها؟!
بعطيج خيارات خفيفة أنا شخصياً أفضلها:
أول شي الأشياء الرئيسية:
– أوصال لحم أو دجاج، و طبعاً تجيبين قطع طماط و بصل و فلفل بارد و ليمون و تشكينها بالأسياخ بين قطع اللحم و الدجاج…
– أفخاذ دجاج
– همبرجر
– هوت دوغ
– كباب
و بتحتاجين معاهم خبز لبناني للأوصال، و خبز صامولي للهوت دوغ و الكباب، خبز مدور أو كعك للهمبرجر، تتبيلات الشوي (صلصة الباربكيو، الكاتشاب، الخردل، المايونيز)، و تجهزين سلطة فيها شرايح طماط للهمبرجر، و خيار و خس، و مخلل، و ما تنسين جبن السلايس!
يجي بعدها شغلات نقنقة على ما يقولون
– أكواز ذرة
– بطاطس (و يكون حجمها صغير عشان تستوي بسرعة)
– جبن حلوم (في نوع خاص للشوي تلقينه في ثلاجات الأجبان، و إذا ما لقيتيه استخدمي الحلوم العادي) بس لما تجين تشوينه قطعيه شرايح عريضة لأنه يسيح و يتقطع لما ينشوي!
– بو فروة (كستناء)
أنا أسوي خلطة أحب أدهن فيها الذرة و هي تنشوي، و البطاطس بعد ما يستوي:
(2 ملعقة كبيرة زبدة أو زيت زيتون + 2 ملعقة كبيرة عصير ليمون + ملعقة صغيرة ملح + بقدونس مفروم) و ممكن تضيفين لهم فلفل حار إذا تحبين السبايسي!
و آخر شي للحلى:
– أناناس، الأناناس المشوي ذقته في مطعم و جربته في البيت، جداً لذيذ لازم تجربينه و متأكدة إنه بيعجب صديقاتج!
جيبي حبة أناناس طازجة و حاولي تختارين وحدة مو ناضجة كثير، يعني فيها شوي خضار، طبعاً قشريها و نظفينها و قطعيها شرايح دائرية، و بعدين قطعيهم إلى أنصاف دوائر…
و جهزي هذي الخلطة (ربع كوب سكر بني + 2 ملعقة كبيرة عصير ليمون + ملعقة كبيرة دارسين) خلطيهم مع بعض و بعد ما تشكين الأناناس في الأسياخ، دهنيه بهذي الخلطة و حطيه عالشواية، و حتى و هو ينشوي دهنيه زيادة بعد، و بس يتحمر الأناناس يكون جاهز، و استمتعي بالطعم
– مارشماللو، ممكن تشوونه لحاله بعد ما تشكونه في الأسياخ، أو تسوون سمورز، و هو إنكم تجيبون أي نوع بسكوت مفضل عندكم و بعد ما تشوون المارشماللو تحطونها بين قطعتين بسكوت، هذي يحبونها الأطفال بعد
و المشروبات، أكيد تحبون المشروبات الغازية، و كتغيير جربي هذا العصير حلو مع الشوي و خصوصاً في البرد:
4 حبات ليمون أصفر، مقطع قطع صغيرة
جذر زنجبيل طازج، حجم متوسط، مبشور
كوب ماء بارد
4 ملاعق كبيرة سكر بني
زجاجة كبيرة مياه بيريه الغازية، باردة
كوب ثلج مجروش
ورق نعناع طازج
في الكاس الخلاط: حطي الليمون و الزنجبيل و كاس الماء و خلطيهم بس فرتين مو كثير، بعدين صفيه في جيك العصير بدون ما تضغطين على القشور اللي في المشخال، يعني بس تحسين إن كل العصير نزل خلاص يكفي، لأنج لو ضغطتي على القشور بيطلع طعم مر في العصير!
رجعي العصير في الكاس الخلاط بعد ما تغسلينه من بقايا القشور، و حطي عليه السكر البني و الثلج المجروش، خلطيهم زين، و رجعيهم في الجيك، و صبي عليهم البيريه مع ورق النعناع… ذوقي العصير و شوفي إذا يحتاج زيادة سكر زيدي عليه سكر بني، و إذا حسيتي حموضته زايدة ممكن تزيدين عليه بيريه!
و إذا حبيتوا تسوون مشرب دافي، ممكن تسوون شاي زنجبيل بالزعفران، أو حليب بالزنجبيل، أو شاي كرك، طبعاً تسوونه على الفحم عشان النكهة تكون أحلى
هذا اللي عندي و إن شاء الله ما نسيت شي، و حفلة شوي موفقة إن شاء الله F:
عليكم بالعافية في الحفلة مقدما ههههههههههههه
اممممممممم بقول اشياء انشالله تستفيدين منها:
اول شي مكان الحفلة واتوقع راح تكون مكان مفتوح لانه شوي وهالسوالف
فزيني الموقع بالشمووع يكون حلو مع بالونات
اما بالنسبة للاكل
طبعا لازم تكون هناك مشرووبات باردة غازية او عصيرات وماي وخلي تنويع فيها وجهزي كاساتها
تقدرين تجهزين اللحم او الدجاج او السمك او الربيان وتبلينه وتخلينه في الثلاجه
بعد اذا حابة تقدرين تشوين برجر – سجق – ذرة -حمبصيص – بطاطا حلوة
وجهزي اطباق باردة وحلى عشان بعد الشوي تاكلونه
وووووووووو بس هاي اللي عندي وانشالله باقي البنات يساعدونش