طولوا بالكم علي شوي. ادري من العنوان احس تبون تجون وتضربوني هههههههه
بس انا انسانه نوعاً ما وسواسيه ومو اي وسواس..
للاسف الوسواس القهري.
يعني لما كنت اشوف الماما تعمل السلطه كانت تغسلها كويس وبالماي البارد ومدري ايش.
المهم
الماما بعيد وحضرتي عروس جديد يعني لازم اتنحنح واطبخ ههههههههه
لما اجيب الخضروات كلها مثل الخس والجزر والخيار
هل اغسلهم بمنتهى الضمير ؟ ولا عادي عالسريع بالماي واقطع واخلص
لان الي اعرفه في مبيدات حشريه عالاوراق الخضراء وغبار
جيييينا للوسواس
وسؤالي الثاني.
اليوم ناويه اعمل العشا صدور دجاج فالفرن
لما اجيب الصدور من الصحن اغسلهم؟ وبعدها احط شويه ملح و خل وفلفل اسود صح؟
واقطع عليهم بصل وشويه ثوم وبهارات وفلفل اخضر بارد
صححولي صبايا
Charming_Girl
حبيبتي اولا ألف مبروووووك عالزواج والله يسعدكم ويرزقكم الذرية الصالحة امين …….
اجابة لسؤالك …السلطة تختلف حسب نوعها … مثلا الجزر حتى بعد الغسل في ناس يقشروه عالخفيف والخيار بعد في ناس يقشروه بس هذيلا سهل غسلهم .. الطماطم والخس يبيلـــهم جهد خاص!! لااااااااااازم وضروري تغسليهم ع الماي وهو يمشي… يعني تفتحي الحنفية واغسليهم زين خاصة الخس افتحيه ورقة ورقة واغسليه وتأكدي من نظافته ……. الماي الجاري مهم ..
الدجاج لماتحضريه… المكان اللي تغسلي فيه الدجاج النيء ابدا لا تخليه فيه نفسه بعد الغسل لانه يسبب امراض لاسمح الله …… ما تخافي…عادي حطيلك صحن نظيف والقطع اللي تغسليها حطيها ف المكان النظيف والتتــــبيلة ب كيفك حبيبتي شوفي الطعم اللي يعجبك وممكن تشوفي فالقسم وصفات وايد وممكن تتصلي ع امك وتسأليها 
واتمنى اكون أفدتك
^
تسسسسلمين يا عسل..
ولله الحمد صارت السلطه وفررررش
الدجاج اخذت صدور بما انه اسهل شي ومايحتاج تقطيع واخذت كل السكاكين والصحون الي استخدمتها للدجاج وحطيتها فالدش واشر علشان اتاكد من نظافتها
وألف مبروك عالزواج
بالنسبه لصدور الدجاج تغسلينها بالماي والخل وبعدين بالماي الجاري وعقبها نقعيها في ليمون وملعقة خل ورشة ملح وفلفل أسود وخليها تنقع على الأقل ساعتين وبعدين شيليها من النقوع وحطي فيها الصلصة اللي تحبين أنا أحب التندوري أو الآجار الهندي اللي على مانجا وبعدين أدخلها الفرن طبعا بعد ما أغطيها بالقصدير عشان ما تنحرق ولما تستوي أفتح القصدير وأخليها تتحمر 5 دقايق.
وممكن بعد النقوع تاخذينها وتغمسينها في طحين بعدين بيض بعدين بقسماط وتقلينها.
وممكن مسلوقه مع مطيبات اللي هم الهيل والدارسين.
وسوي معاها خضروات مسلوقة.
ع العموم أنا مافيني وسوسه بس كل طبخي نظيف وطاهر هههههههه وأغسل يدي كل دقيقة حتى لو كنت أحرك الجدر على النار ههههههههه طبع بس تعرفين اللي يخلي الأكل ينظف ويكون لذيذ بنفس الوقت هو البسملة قبل ما تبدين والصلاة على نبينا محمد صلى الله عليه وآله وسلم والتسبيحات حتى يجهز الأكل