حصريا: دليل عروس المصور لفرش سيغما [3roos's Exclusive Guide to Sigma Brushes] 2024.

F:

كيف حالكم حبيباتي؟ عساكم بخير و عافية

بداية حابة اذكر ان موضعي هذا تجربة شخصية لفرش سيغما اللي شوي شوي صايرة تنتشر انتشار كبير بأمريكا لحسن جودتها و سعرها الممتاز و المناسب للجميع

حابة ايضا اني احيلكم لموضوع الاخت ميس بلينغ عن هذي الفرش و اللي في بعض ردوده تجارب ثانية لاخوات ثانيات..يا ليت تدخلونه و تقرون تجربتها و تجربة الاخوات هذول

SIGMA VS MAC BRUSHES

نبدي بسم الله

انا عندي مجموعتين من سيغما عندي مجموعة الفرش اللي اسمها كومبليت و عندي المجموعة اللي اسمها بريميام و عندي بعد فرش شريتها لحالها اما لاني احتجتهم او لانهم حازوا على اهتمامي

نبدي بالمجموعة الاولى اللي اسمها كومبليت..و اللي فيها 12 فرشة متنوعة للوجه و العيون

و هذي صورة من موقع سيغما تبين المجموعة كلها

المجموعة ممكن شرائها بشنطة الفرش التابعة لها مثل اللي بالصورة او بدون (بدون شنطة يجون بسعر ارخص شوي)

و الشنطة حلوة ما عليها كلام من كل النواحي و تاخذ 15 فرشة..لكن ممكن استبدالها بأي شنطة فرش يعني مو شي ضروري..انا اخذت الفرش مع الشنطة لان ما كنت ابي اعابل بالسوق ادور على شنط..

الحين براويكم صور الفرش فرشة فرشة من بعيد و قريب..طبعا راح تلاحظون ان فرشي عليها رقم يبدي بأس أس و انا حاطه رقم ثاني مختلف تماما في الصورة…
السبب هو انه سيغما اول ما طلعوا كانوا يرقمون فرشهم بالضبط مثل ارقام فرش ماك…مع اضافة أس أس بالبداية…لكنهم من العام الماضي غيروا الترقيم تماما…و الترقيم صار حسب اللي حاطته بالصورة

طبعا راح اضيف تعليقات بسيطة على كل فرشة حتى اللي ما عندها معلومات بالفرش تقدر تعرف كل فرشة تستعمل لايش

يلا نبدي

هذي البرش للاينر الجل او الكريمي (مثل ما يسميه البعض)..لكني استخدمتها للشفايف..حسيتها عريضة وايد على الايلاينر

هذي تستخدم لدمج الاينر او وضع الشادو بالكريس (زاوية و كسرة العين الخارجية)..انا استخدمتها لوضع اللمعة على طرف العين بعد..ممتاااازة..و من فرشي المفضلة..

فرشة دمج الشادو على كل مناطق العين…انا استخدمها لوضع الاضاءة تحت الحاجب و وضع الكونسيلر الباودر ايضا..من الفرش الاساسية عندي..و عندي وحدة ثانية منها…من فرشي المفضلة بعد

فرشة وضع الشادو على العين..استخدمها لوضع الاضاءة تحت الحاجب احيانا..ممكن استخدامها بالكريس بعد..من الفرش الاساسية..و هذي بعد عندي منها وحدة ثانية

فرشة لوضع الشادو على العين لكن اكبر شوي من السابقة شوي..استخدمها للاضاءة و لوضع الشادو تحت العين و دمج اللاينر ايضا…مو اساسية لكنها حلوة

برش اللاينر الكريمي او الجل..ممتااازة جدا..حبيتها حيل..و فبعض الاحيان استخدمها لدمج الاينر..ممتازة لهالشي..من الفرش الاساسية

آنغلد برش (سوري ما اعرف شنو اسميها بالعربي)…لكن شكلها يوضحها زين اعتقد..استخدامها للكريس (كسرة العين كلها) و لوضع اللمعة فبداية العين..و وضع الاضاءة تحت الحاجب…انا استعملها بوضع الاضاءة فقط..فرش حلوة لللكوات اللي فيها ابراز لكسرة العين..بس ممكن استبدالها بفرشة ثانية..و لهذا ممكن تكون مو اساسية

برش لباودر الوجه او البلاش..حلوة..و هذي بعد من الاساسيات..كنت استخدمها بكثرة..لكني استبدلتها بفرشتين ثانيات افضل منها..ان شاء الله بذكرهم بعدين

برش للبلاش و الكونتورينغ (على حسب تركيبة الوجه طبعا)..انا استخدمها للبلاش..تحط اللون بطريقة تخليه بااااارز..و لهذا لما ابي البلاش حقي يكون واضح استخدم هذي البرش..من الفرش المفضلة عندي

الفايبر برش..لوضع البلاش و ايضا البرونزر..تحط اللون بطريقة خفيفة..و طبيعية اكثر..و تدمج بطريقة جميلة…مع الليكويد فاونديشن روعة جدا..لانها تدمجه و تعطي ال "اير برشد لوك" اذا استخدمت بالطريقة الصحيحة…ممكن استبدالها بفرشة ثانية..لكنها حلوة نون ذا ليس

فرشة للفاونديشن الليكويد او الكريمي..اللي تستخدم فرشة لوضع الفاونديشن بتشوفها اساسية..لكن انا احس ممكن الاستغناء عنها (انا عادة استخدم ايديني بعد تعقيمهم..و لهذا ما استخدمها الا ناااااادرا)

فرشة الكونسيلر الليكويد او الكريمي…صغيرة و حلوة فسهل جدا الدمج فيها..انا ما استخدمها وايد..استخدم فرشة الدمج (الثالثة بالتسلسل بالموضوع هذا) اكثر..احسها افضل بالذات للمنطقة الهالات السودة

يتبع

نجي الحين لمجموعة البريميام و اللي فيها 15 فرشة

هذي الفرشة للي ما يحطون مكياج معقد..او يكتفون بالبيسكس..يمكن يحسوها ما تسوى..لكن اللي تحط ميك اب وايد و تسوي لوكس ادفانسد شوي..بتشوفه روعة..بس ما يمنع افصل لكم المجموعة لسبب مهم بأذكره بنهاية الموضع ان شاء الله

مرة ثانية نبدي بسم الله

صورة المجموعة كلها (الصور من موقع سيغما)

صور الفرش فرشة فرشة مرة ثانية

سوري على شكل البرش..كنت توني مستعملتها بطلعة..و تذكرت اني لازم اصورها..فغسلتها و صورتها قبل ما تجف..و لهذا شكلها غريب..احلى برش للشفايف اللي يميزها انها تتغطى فا ما تتسخ و توسخ و حجمها صغير..استخدمها دائما..و اشوفها اساسية

برش للكريم او الجل لاينر…ميزتها رفعها..روعة جدا بهالشي لان ممكن تحط كحل رفيع و عريض على حسب حركة و خفة اليد..ممتازة و فيها تكون اساسية

فرشة لتحديد الحواجب و للاينر الكريمي او الجل..انا استخدمها للاينر و لدمج اللاينر القلم..روووعة بهالشي..و استخدمها بكثرة..لكن لتحديد الحواجب ما قد استخدمتها..لاني اكتفي بالتحديد بالقلم

فرشة لدمج الاينر او لوضع الشادو تحت العين…هي الحين فرشتي المفضلة لوضع الشادو تحت العين..لانها دقيقة و رفيعة..انا اشوفها اساسية

متعددة الاستخدمات هذي البرش..تستخدم لوضع الشادو على العين..على كسرة العين..الاضاءة تحت الحاجب..و حتى الدمج..ممتازة جددداااا

برش للدمج و وضع الشادو على كسرة العين..رووووعة..استخدمها بكثرة لهالشيين..لانها ارفع شوي من فرشة الدمج اللي تكلمت عنها بالبداية

برش لوضع الشادو بكسرة العين كلها..استخدمها بعد لوضع اللمعة بمقدمة العين (مرات)..صغرها و شكلها المدبب يخليها ممتااااازة لوضع الشادو بالكريس

فرشة كبيرة لوضع الشادو على كل العين..ممتازة جدا لوضع لون واحد على كل العين من الحاجب لين الجفن..و لوضع و دمج اضاءة الحاجب و هايلاتر الخدود (لانها صغيرة بحيث تكون دقيقة بهالشي) بعد..استخدمها بكثرة..و مفضلة عندي

فرشة للبلاش..حلوة جدا..متوسطة الحجم..و تحط اللون بشكل بارز (مثل الفرشة البيضا اللي تكلمت عنها فالبداية)..تعجبني وايد و استخدمها بكثرة للبلاش و البرونزر بعد

فايبر برش للبلاش و البرونزر…استخدمتها للفاونديشن لكن ما كانت جيدة..بس للبلاش و البرونزر حلوة وااااايد..ممكن استبدالها بالفايبر برش الاولانية..او بفرشة بلاش و برونزر ثانية

فرشتي المفضلة على الاطلااااااااااق للبلاش و البرونزر..و حتى وضع باودر الوجه..لانها تحط اللون بطريقة متوسطة..و طبيعية..سهل من خلالها الدمج لانها كبيرة و بوفي..احبها وااااييييد..و اشوف انها افضل بديل لكل فرش البلاشرز و البرونزرز الثانيين!

برش لباودر و لمعة الوجه و البلاش و البرونزر..انا استخدمها مثل الكابوكي برشز..بعد ما احط الباودر..امرر الفرشة هذي على الوجه بخفة و كأني ادمج المكياج..يطلع كل شي روووووعة..حلوة حيل لانها كبيرة و مدببة (يعني دقيقة) و بوفي

هذي الفرشة نسخة للفرشة اللي قبلها..بس هذي صغيرة..تصلح لهايلايتر الخدود و الكانتورينغ..حلوة جدا للهايلايتر لانها تبرزه بطريقة طبيعية و مدموجة بشكل جميل

فرشة للكونسيلر و البلاش الكريمي..العجيب فيها انها ناااااااااااااعمة رغم انها مو ناتشرال هير..لكن سينثتك هير..هي تعتبر افضل برش للبلاش الكريمي

برش لوضع الشادو على العين..و الاضاءة تحت الحاجب..و ممكن ايضا تستخدم للكريس (كسرة العين)..عادية..في بدائل وايد لها..و لهذا ما استخدمها وايد

اخيرا عندي فرشة شريتها لحالها..استخدمها بكثثثثرررةةة للفاونديشن المينيرال و الليكويد..و هذا شكلها (مع اثار الدمار اللي بدت تطلع فيها ههههههه)..

لهنا و انتهى شرح الفرش

الحين بذكر تفاصيل عن الاسعار و الجودة

الجودة:

المزايا الجيدة:

السعر…مثل ما ذكرت هي رخيصة مقارنة بماك (اللي يعتبرونه منافسهم) و جودتها

النعومة…الفرش كللللها حتى اللي مصنوعة من السينثتك هير ناعمة بشكل رهييييب…و انا يهمني هالشي لان بشرتي حساسة و اذا استعملت فرشة خشنة عليها اولا تحمر و ثانيا احس بحرقة و كأنه احد حك المكان بقوة…و بشرة عيوني بعد اشد حساسية…مع فرش سيغما ما اعاني من شي اببببد و الحمدلله لانهم ناعمين جدا

الفرش اللي شعرها ابيض…ما تتصبغ من اي شي ينحط عليها…يعني او ما تنغسل او تتنظف ترجع بيضا و تلق حتى لو انغسلت بعد فترة من وجود المادة الملونة على شعر الفرشة..في فرش من ماركات ثانية..ما فيها هذي الميزة..اذا نسيتي الفرشة وسخة كم ساعة بس..خلاص راح بياضها

الجودة بشكل عام ممتازة…يعني الفرشة مصنعة بأتقان..مو شي اي كلام..لانهم رخيصين يبيعون شي بعد شهر و لا شي ينكسر او يتدمر…انا صار لي سنتين استخدم الفرش و ما شاء الله ما عليهم ايييي كلام

المزايا "المزعجة" (ما اقدر اقول سيئة لانها مو مزايا دايمة):

لاحظت في فرش البريميام كيت تساقط شعرة او شعرتين من بعض الفرش..مو كل مرة واجهت هالشي..بس ازعجني..لكن اول ما غسلتهم غسلة عميقة…راحت هالحالة..و لهذا انصح البنت اللي تشتريهم و تواجه هالشي..تغسلهم غسلة عميقة..و ان شاء الله بيختفي التساقط

لاحظت ايضا انه اول ما تنغسل الفرش اللي شعرها اسود ينزل منها صبغ…هالشي لاحظته او مرتين غسلتهم بس..و بعدين راح ايضا..سألت بنات على اليوتوب و راسلت سيغما عن الموضوع قالوا انه شي طبيعي و يصير مع واااايد فرش لان الفرشة لساتها جديدة

الحين نتكلم عن الاسعار..

اسعار المجموعات او الفرش لحالها:

مجموعة الكومبليت كيت سعرها بدون الشنطة 79.00 دولار امريكي (297 ريال سعودي)

مجموعة الكومبليت كيت سعرها بالشنطة 99.00 دولار امريكي (372 ريال سعودي)

مجموعة البريميام كيت بالشنطة 149 دولار امريكي (559 ريال سعودي)

المجموعات الثانية (في عندهم مجموعات مصغرة للسفر و مجموعات مختصرة للفرش الاساسية) و هذول اسعارهم تتراوح بين ال42 دولار امريكي الى ال59 دولار امريكي (او ما بين ال158 ريال سعودي الا ال222 ريال سعودي)

الفرش اللي ممكن تنشرى بالمفرد:

فرش العيون سعر الفرشة 9 دولار امريكي (43 ريال سعودي)

فرش الوجه سعر الفرشة يتراوح ما بين ال9 دولار امريكي الا ال25 دولار امريكي (او ما بين ال43 ريال سعودي الا ال94 ريال سعودي)

فرشة الشفايف سعرها 9 دولار امريكي (43 ريال سعودي)

و مؤخرا طرحوا فرشة للجسم (للبودرة و الخ) سعرها 42 دولار امريكي (158 ريال سعودي)

علما بأنه بعض الفرش للوجه مو موجودة بأي مجموعة جاهزة و العكس صحيح..فاللي حابة تاخد فرش مفردة خلها تركز زين على هذي النقطة

و مع كل طلبية بسعر معين (مع المجموعات الكبيرة مثل الكومبليت و البريميام) تجي هدية فرشة مصغرة هذا شكلها..

و حاليا المجموعات طرحت بألوان غير الاسود..شفت في

فضي (للبريميام كيت المصغر للسفر)..

و بينك و فوشيا (للمجموعات المصغرة و الكومبليت كيت)..

و بنفسجي..و كورال (لون بينك مايل للاورانج)..و تركويز (الثلاث الوان هذول اكسكلوسيف للكومبليت كيت..اللي ايضا صارت تجي *بعلبة* بدل الشنطة)

وسائل الدفع:

وسيلة الدفع بموقع سيغما عن طريق باي بال و ياخذ كل وسائل الدفع تقريبا (لكن ما ادري اذا وسيلة الدفع بالتشيك او الصك مفتوحة للطلبات الدولية)..و اللي عندها كارد مسبوق الدفع..بيمشي بعد..خصوصا اذا كان فيزا او ماستركارد (انا شريت بكارد البنك حقي و بكارد مسبوق الدفع)

و تراهم ثقة من هالناحية..هنا القانون شدييييد يعني ما يقدرون ينصبون على احد و لا شي..فأطمأنوا من هذي الناحية

وسائل الايصال:

يستخدمون البريد الامريكي و هو ثقة ثقة ثقة..و عندهم عدة خيارات…

فيرست كلاس..يطول اسبوعين الا 12 اسبوع على حسب الدولة و المدينة

برايوريتي ميل..يطول 10 الا 30 يوم على حسب الدولة و المدينة

ايكسبريس…يطول 6 الا 20 يوم على حسب الدولة و المدينة

(انا قد رسلت بريد للسعودية بالماضي عدة مرات…افضل وسيلة هي البرايوريتي..الايكسبريس يكتبون 6 ايام..لكن مع دخول البريد للكوستمز و كذا..يطول اكثر من جذي..فهي احسن وسيلة و "اوسطها" بالسعر)

سعر البريد:

يتراوح سعر البريد (بخدمة الفيرست كلاس اللي هي ارخص شي) بين ال5.60 دولار امريكي و ال14 دولار امريكي (اي ما بين ال21 ريال سعودي الا ال53 ريال سعودي)…و السعر يتراوح على حسب وزن الطلب اكيد

الفرش بشكل عام انصح فيها اللي…

1. تبي تكون كوليكشن مكياج

2. تبي تتعلم فن المكياج و لسه ما تبي تصرف وايد على الفرش (مثلا)

3. العرايس (بصراحة بيستانسون عليها وااااايد..خصوصا اللي بتتجهز!)

احب اذكر بأنه سيغما عندهم خيار روووووعة بدوا فيه من قريب..

الا و هو ان الوحدة تقدر تنسق لها كيت او مجموعة فرش حسب اختيارها الشخصي…يعني تقدرين تنقين البرشز اللي تبيها و تكونين مجموعة خاصة فيج حسب احتياجاتج و ذوقج…و خيارات الفرش تضم فرش الكومبليت كيت و فرش البريميام كيت و فرش ثانية من خارج المجموعتين (حسب ما اتذكر)…و هذا هو السبب اللي خلاني اعلق على بعض الفرش و اقول اذا هم اساسيين او لأ…حتى اللي تبي تجرب هذا الخيار فيها ترجع لهالدليل و تختار الفرش اللي تحسهم بينفعوها ان شاء الله 🙂

و لهنا خلصت كل المعلومات اللي قدرت اشارككم فيها

يا ليت اللي تشوف اني نسيت نقطة او شي..تسألني عنها…
بس بليز يا ليت السؤال ينسأل هنا بالعام حتى الكل يستفيد منه و حتى اقدر اجاوب على السؤال بأسرع وقت ممكن..او حتى وحدة من البنات اللي عندهم تجربة مع المنتج تجاوب عني..اي اسألة على الخاص ما راح اقدر ارد عليها..لان وقت فراغي محدود حبتين بهذي الفترة و لاني نسااااية بعد ههههههه

و اعتذر بشدة على سوء جودة التصوير لبعض الفرش..بس لاني مشغولة دائما ما اقدر ارتب الموضوع الترتيب اللي تستحقوه..اعذروني من جد

و انا سويت الموضوع لوجه الله..حتى اساعد اللي مفكرة تشتري برشز او تجرب ماركة سيغما

و ما ابي منكم الا انكم اول ما تخلصون قراءة الموضوع ترفعون ايديكم بدعاء لي تطلبون لي فيه خير الدنيا و الآخرة و ان الله يوفقني لما يحبه و يرضاه و انه سبحانه يحقق لي اللي ابيه عاجلا ليس اجلا

و جعل ربي يسعدكم و يسلمكم

مشكووووووووووورة عالمجهود في التصوير و الشرح

تم تقييمك و بانتظار جديدك

موضوع رَوعه و مجهُود تُشكرين عليه حبيبتي!
و بصرآحه فرش سيغما ماعليهم كلآم, اليوتيوبرز كله يمدحون فيهم ..
و بإذن الله رآح أطلبْ لي مجموعه منهم لأن حـــدي خاطري فيهم =)
يعطيج العآفيه و تستآهلينْ أحلى تقييمْ !