حفلة التكليف 2024.

السلام عليكم اخواتي
بعد أسبوع بنتي بتكمل التسع سنوات، وحابة اسوي حفلة تكليف بسيطة لها بمناسبة حجابها والتزامها بالصلاة من باب التشجيع لها
يا ريت تساعدوني بافكاركم

متباركه خيو والله يبلغش فيها

ما اعرف شنو اسووون بس الهديه اخذي لها عبايه جديد وشيلتها
وحرام صلاة وسجاده جديد وتربه وقران
حطيهم في بوكس حلو اناسب لعمرها وغلفيهم بطريقه حلوة

ماشاء الله والله يهدي الحلوة

واحب هالحفل وانتظر الله يخلي بطاتي ويهديهم حق اسوي ليهم جديه

رحت حفل التلكيف لبنت خالتي كانت الحفلة حلوةةة وهيه عبارة عن

ادعية وقرآن وقصيدة التكليف ومسابقات كل من الأطفال

وبعدها تصلي الحلوة ركعتين وتكون لابسة لبس مناسب !

وكانت مسوية مثل السفرة فيها قرآن وشموووع

والتوزيعات كانت مصحف صغير وووووو

ان شاء الله تستفيدي من الأفكار << رادة عالسريع

اقتباس

المشاركة الأساسية كتبها ilshj

	متباركه خيو والله يبلغش فيها ما اعرف شنو اسووون بس الهديه اخذي لها عبايه جديد وشيلتها وحرام صلاة وسجاده جديد وتربه وقران حطيهم في بوكس حلو اناسب لعمرها وغلفيهم بطريقه حلوة

الله يبارك فيش حبيبتي
حاطة في بالي آخذ لها سجاة جديدة وقرآن وتربة وسبحة حسينية وفصلت لها حرام جديد
اللي متحيرة فيه هو الحفلة نفسها يعني شلون الأجواء والبرامج
مشكورة خيتو

اقتباس

المشاركة الأساسية كتبها بسمة أطفالي

	ماشاء الله والله يهدي الحلوة واحب هالحفل وانتظر الله يخلي بطاتي ويهديهم حق اسوي ليهم جديه رحت حفل التلكيف لبنت خالتي كانت الحفلة حلوةةة وهيه عبارة عن ادعية وقرآن وقصيدة التكليف ومسابقات كل من الأطفال وبعدها تصلي الحلوة ركعتين وتكون لابسة لبس مناسب ! وكانت مسوية مثل السفرة فيها قرآن وشموووع والتوزيعات كانت مصحف صغير وووووو ان شاء الله تستفيدي من الأفكار << رادة عالسريع

مشكورة بسمة على الدعوة الحلوة
والله يبلغش في بطاتش وتسوين لهم ان شاء الله
بالنسبة للقصيدة لقيت لحسين الأكرف قصيدة عن التكليف ان شاء الله احصل السيدي
وايد عجبتني فكرة انها تصلي ركعتين
و السفرة يعني قصدش تقريبا مثل سفرة العجم واحط فيها توزيعات قرآن وبعدين أوزعهم على الأطفال اللي بسنها؟

اقتباس

المشاركة الأساسية كتبها ما في أسماء

	متباركة خيو والله يبلغش فيها خليها في البداية تقرا سورة النور أو حتى جزء منها لأن من خصائص هالسورة انها تعف البنات اني كل ليلة اشغلها لبناتي وبالنسبة للركعتين خليها تصليها في النهاية بنية الشكر لرب العالمين انه شرفها بالتكليف ولو وحدة من الكبار تلقي كلمة تبين فيها أهمية هالمرحلة والتزاماتها يكون افضل اكيد انتين ما قصرتين وعلمتينها بس يكون كتذكير ليها وللي في سنها او بيدخلون هالمرحلة من الحضور ولو تهدينها كتب عن فاطمة الزهراء والسيدة زينب بس اللي حق الصغار لأنهم قدوة حقنا علشان تتعلم من سيرتهم وكتاب نهج البلاغة للصغار بعد… والتوزيعات ما أأيد سالفة القرآن الصغير لأنهم بياخذونه وبيخزنونه يعني ما بيستفيدون منه لو توزعين سيديات مثلا أو كتيبات أو اي شي ثاني البنات يستفيدون منه وعندي بعد فكرة حلوة اذا حبيتين راسليني عالخاص وبقول ليش واي شي ثاني احنا في الخدمة

الله يبارك فيش خيتو
عجبتني فكرة المحاضرة
وان شاء الله أجهز كلمة للموضوع
وفكرة السيديات بعد حلوة
مشكورة حبيبتي

بنت أختي في حفلة تكليفها ابتدوا الحفل بقراءة قرآن وبعدها كلمة من أبوها لأنه رجل دين هذا الشي المميز في الحفله

في أناشيد انعرضت في قناة هادي تي في عن التكليف: يا ابنتي قومي وصلي ……..

و عن تعليم الأم لبنتها أمور الدين : علمتني الواجبات شرع ربي و الرسول…….

ممكن تحصلينها بالنت مع أناشيد أخرى

مثل أصول ديني لصلاح الرمضان و غيرها و تحطينها في الحفل

و في كتب حلوة مبسطه للأطفال مثل مفاتيح الجنان و الفقه و غيرها موجوده في المكتبات حلو انها تكون هديتها و حاولي تعودينها على القراءة عن الرموز الإسلاميه لأنها بتتعلق فيها في هالسن

الله يخليهااا لج ان شاااء الله وتبلغين فيهااا
انا رحت حفلة تكليف كااانت وااايد حلوووه
كانوا مسوينها في ماتم
وحاطين لها سفره عجم وكيكة كبيره وفيها التوزيعااات عباااره عن قرآن صغير مع كرسي القرآن
وغير الكب كيك
وحاطين على جنب البوفية
في البداية كان قراءة قران وبعدين دعاء كميل لان كان ليلة الجمعه
وبعدين حديث الكساء
ودخلو البنت عباره عن زفة مع انشوده باسمها وكانت تسلم على الحاضرين
وبعد ما دخلت لقت الام كلمة مع بعض الاناشيد وعرض لصور البنت
بعدين طلعوا البنت ولبسوها فستان ابيض وحجاب ابيض ودخلوها عشااان يجلسونها يعني
سوت لها جلوه " جلسة "
وصااار واااايد حلووو
ان شاااء الله تستفيدين من الافكااار

ما شاء الله تبارك الرحمن ..
ردود الامهات جدا حلوة ومفيدة وتثلج الصدر وان شاء الله تستفيدي منها.

اولا حبيت ابارك لك تشريف بنتك بهالشرف العظيم .. واهني بنتك على اهتمامك فيها وبهالموضوع خصوصا الي قليل الامهات يركزن عليه.

اتمنى اني اخدمك في بعض الافكار البسيطة الي في بالي .. وبعضها استوحيتها من صديقتي في حفل سن التكليف السنوي الي تسويه مع بعض الاخوات في المركز الديني وغير ان بعضها جمعتها لك ممكن تستفيدين .
____________________________

1. ممكن تجمعين صور مختلفة لبنتك من يوم كان عمرها يوم واحد إلى آخر صورها الجديدة وحبذا لو تكون فيها محجبة، ممكن تنسقينهم بطريقة حلوة وتضيفين عليها قصيدة حلوة مثل قصيدة التكليف للشيخ حسين الاكرف. وتخلين الفيديو يشتغل على طول الحفل على شاشة التلفزيون.

2. تجهيز مسابقة بسيطة للحضور – مع مراعاة الاطفال – عن طريق سحب رقم بشكل عشوائي للحضور يتم توزيعها مسبقا. ويتم سؤالها سؤال ديني.

3. توزيع هدايا على الحضور ولو شيء بسيط يحتفظون به للذكرى خصوصا زميلاتها.

4. تجهيز العروس (بنتك) بلباس ابيض ناعم جدا ممكن بعد نصف الحفل يتم تلبيسها حجاب بسيط مع تاج بسيط مصنوع من الورد .. او حتى من بدايته .. عشان تتميز كونها "أميرة الحفل".

وهذي صورة التاج الي اقصده، حلو وسهل التنفيذ

وممكن صنع وسام بسيط بنفس هالفكرة

5. ممكن عرض محاضرة بسيطة من والدة المكلفة واهم شي تكون مفيدة للاطفال نفسهم وباسلوب سلس للاستيعاب. ممكن تذكرينها فيها بمعنى الحلال والحرام والمكروه والمستحب. وفضيلة الحجاب وشلون انه يعزز من مكانه المرأة ويصونها مثل الجوهرة.
6. دفتر مذكرات .. يتم الطلب من الحضور كتابة تعليقاتهم وأمانيهم وتبريكاتهم في دفتر خاص يكون ذكرى للفتاة المكلفة.

7. مجرد إقتراح لهدية الطفلة المكلفة. البنت المكلفة مقبلة على حياة التزام ديني .. لازم نحببها في المرحلة الجديدة موب العكس .. واكثر شغلة تهرب البنت من هالمسؤولية انها تحس انها راح تحرم من طفولتها من اللعب وكل شي راح يصير جد .. عشان جذي اقترح انك تدمجين بين الاثنين حتى في هديتها ..

يعني دام انك راح تعطينها سجادة صلاة وحرام .. بإمكانك تعطينها مجموعة صلاتي من فلّة عشان تفرح فيهم اكثر .. ممكن تعطينها معاها ساعة منبه على شكل شخصية هي تحبها عشان تستخدمها خصوصا الى وقت صلاة الصبح ..

في النهاية احب أقول لبنتك "كل عام وأنتي بخير .. كل عام وأنتي أقرب إلى الله .. ويارب ماما تفرح فيش وتشوفش في الكوشة"