حياااكم شوفوا طبختي قالب كفتة اللحم والدجاج بالخضار 2024.

السلام عليكم يا عروسات

امس كان العشا فبيت الوالدة.. والعادة نطلب شي من برى حق العيال .. هالمرة قلت ليش ما اطلع مواهبي.. لاني في فترة الحمل اعتزلت الفن.. اقصصصد الطبخ :tongue:

وفتحت الثلاجة ولقيت كم شغلة ..
علبة كفتة دجاج وعلبة كفتة لحم من ساديا وخضار واجبان

وقلت يااااربي شسوي شسوي؟؟!!!

تذكرت اني مرة من زمان قريت في مكان طبخة باستخدام الكفتة .. بس شلون وكيف مادري

قلت خلني ابدى وبنشوف شيطلع بالنهاية

بسم الله نبدأ

المقادير:-

1 علبة كفتة دجاج
1 علبة كفتة لحم
فصين ثوم مهروسين
فلفل بارد الوان مقطع شرايح ( ما استخدمت الفلفلة بالكامل بس نص من كل لون)
4 بصلات متوسطات مقطعة شرايح
2 جزر كبير مبشور خشن
2 كوسا كبير مقطع انصاف دوائر
2 باذنجان متوسط مقطع مكعبات متوسطة
كمية من مشروم الطازج مقطع شرايح
بهارات مشكلة ( كلها بحسب الرغبة والذوق- فلفل اسود – رشة كركم- رشة قرفة- رشة كمون- رشة ملح الليمون- ملعقة صغيرة دبس الرمان)
2 فصين ماجي مذوبين في كمية قليلة من الماء الدافي

الطريقة :-

1- رتبت الكفتة بنوعيها في قالب الفرن وشوي دهنتها بزيت خفيف ودخلتها الفرن لحد ما احمرت من برى.. ( لم تنضج بالكامل بس وصلت لدرجة الاحمرار من الخارج).
2- بعد ان بردت الكفتة قطعت كل حبة الى نصفين وصفيتها بالترتيب في قالب فرن بايركس مربع.
3- حمرت الباذنجان بالزيت لحد ما اشقر شوي وبعدين خليته على ورق نشاف.
4- حمرت الكوسا ونفس الشي خليتها على ورق نشاف.
4- قسمت البصل قسمين.. مقدار كوب تقريبا خليته للتزين والباقي حمرته بالزيت مع الثوم.

5- ضفت الجزر والفلفل البارد.
6- ضفت الباذنجان المقلي والكوسا.
7- ضفت البهارات المشكلة وبعدها الماجي المذوب بالماء.
8- خذت الخلطة وبالملعقة الكبيرة اضفتها على قطع الكفتة اللي بالقالب لحد ما تغطت بالكامل بالخلطة.

9- خلطة الكريمة للوجه:-

1 علبة كريمة للخفق
1 علبة كريمة حامضة
4 ملاعق كبيرة جبن سايل (جبن كاسات)
4 ملاعق كبيرة مايونيز
جبن مازرولا مبشور
– خلطت جميع المقادير مع بعضها البعض ورشيت عليها شوي فلفل اسود ونعناع مجفف وصبيت الخليط على الوجه لحد ما تغطى القالب بالكاااامل ودخلت القالب بالفرن لحد ما احمر الوجه.

* تذكرون اني خليت جزء من البصل ما سويت فيه شي.. قليته بالزيت لحد ما صار مقرمش واول ما طلعت القالب من الفرن اضفت شرايح البصل على الوجه

وهذي صورة الطبق لما وصلنا بيت الوالدة .. وان شالله تجربونه ويعجبكم.. واذا عجبكم قيموني 😮

تسلم يدج يالغالية ,,, خوووش طبخة صراحة

الله يعطيج الف عافية ,,, وننتظر جديدج

كلها نعومة

حياج الله حبيبتي.. ان شالله تجربينها وتقولين لي شلون تطلع وياج

مشكوره يا قمر روعه
ويعطيكي العافيه

الله يعطيج العافيه إختي
موفقه دوووم.