خلطة لصفاء وبياض البشرة والجسم, يلا يا بنات تعالو شوفو 2024.

بنات خلطتي مو جديده , بالعكس انا لقيتها في عدة مدونة وحتى منتدانا الحلو هذا….. بس خلوني اقولكم السالفة من اول

مره صديقتي خبرتني ان وحده من أهلها عطتها خلطة تنظف الايدين وتبيضها والبنت جربتها بنفسها وقالت وايد روعه….

الخلطة عبارة عن عصير ليمون وسكر وكل اللي تسوينه تفركين ايديج بيها لحد ما تحسين الاوساخ زالت وتغسلينها بعدين بالماي وتحطين مرطب………….لحظه لحظه بناااااااااااااااااات السالفة ما خلصت هاذي بس البدايه انا ما ذكرت خلطتي الابداعيه بعد اشفيكم مستعجلات :qaq:

طيب انا جربت الخلطه هذيك مره وكانت النتيجه جيده, بس بعدين قلت يلا اشوف المنتديات وخاصة منتداي الحلو العروس ولقيت هالخلطة , وخلطه ثانيه بعد وهي ليمون وملح. قلت يا بنت ليش ما تخلطين الليمون والسكر والملح مع بعض, خاصه ان الملح له فوائد في شفاء الجروح وتطهيرها..وليش بس استعملها على ايدي! ليش ما استعملها للجسم كله وبالفعل اختكم ما قصرت واستعملت خلطة سمااهر (عاد سميتها على اسمي :bigsmile: ).

يلا بنات اللحين بعطيكم الخلطة كامل والطريقة :
جيبي ليمون واعصريه( ما شاء الله اللحين موسم الليمون عندنا وثلاجتنا مليااااااااااااااااانه ليمون ما عارفين شنسوي فيه ) , اعصري لحد ما يصير كميته نص كوب تقريبا.
اضيفي كميات متساويه من الملح والسكر لعصير الليمون لحد ما يصير العصير كذا متماسك مو سائل واخلطيه شوي.

روحي المسبح وابدئي اولا بتبليل الجسم بالماي, اذا ما كنتي ناويه تغسلين راسج فإرفعي شعرج عشان ما تجي عليه الخلطه. وبعدين ابدئي بفرك الجسم بالتدريج من القدمين للرقبة او العكس على راحتك , بس حاسبي وانتي تفركين بعض الاماكن الحساسه كمنطقة الصدر عشان ما تصير لك علامات او ألم. وافركي خاصة القدمين والكوعين والركبتين وتحت الابط واي منطقه داكنة , استرخي في البانيو وافركي جسمك لمدة 5 دقائق تقريبا , بس حركي الخليط المحطوط في الاناء او الكوب بصبعج عشان السكر والملح كل مره ينزل لتحت فخليه يختلط .

انا افضل ان اخر جزء تفركيه هو اليدين اقعدي افركيهم جيدا , وبعدها خليكي لعدة دقائق في البانيو وغمضي عيونج واسترخي شوي بدون فرك خلي الجسم يستفيد من الليمون لأنه يبيض البشرة.

اخيرا اغسلي جسمك بالماي اولا لحد ما تزول الخلطة تمام بعدها ممكن تستعملي صابون عادي او صابون لوشن للجسم وافركيه مع ليفة استحمام ناعمة , نشفي نفسج وحطي لوشن للجسم مباشرة لأن البشرة تكون طرية ورطبه , انا عن نفسي احب نيفيا المفعول الثلاثي للبشرة الجافة, بس ممكن تستعملي اللي تحبينه. وحطي العطر اللي تبيه وحطي بودر على راحتك يعني الاشياء اللي متعودة تحطينهم. ممكن تجربي هالخلطة على الوجه بس لازم تفركي بطريقة ناعمة ورقيقة عشان الوجه حساس جدا واذا عندك حبوب في الوجه فأنا عن نفسي افضل ما تستخدميه عشان ما تلتهب الحبوب بسبب الفرك.
جربو يا بنات وبتلاحظو الفرق من اول مره ان شاء الله وصدقوني الخلطة وطريقتها جدا سهله, وانا ما صدقت نفسي لما شفت النتيجة, انا صحيح جسمي ابيض بس في شوية علامات داكنه خفيفة وما كانت بشرتي صافية لهذاك الحد خاصة بسبب علامات حب الشباب, بس من اول مره جربت هالخلطة وانا لقيت بياض جسمي واااضح بالفعل وبشرتي صارت صافية .