دجاج كنتاكي بيتي مقرمش ولذيذ من مطبخ أم المهند ،، هلموا وفقكم الله 2024.

اليوم اشتهيت على العشا آكل دجاج كنتاكي بعمل ايدي .. سبق وجربتها بس عن طريق الشوي بالفرن وليس القلي << باغية تبدع حضرتها :p ،، بس طلعت أضحوكة بربكم وشكلها كان الله المستعان :thumbs_down: .. وهالمرة نويت أسويها ثاني بس بالقلي ،، رغم إني ما كثير أحب المقالي بس مجبر أخاك ..

شفت كثير طرق من النت ومن صاحباتي جزاهم الله كل خير ،، بس لازم شوي نبدع من بنات أفكارنا :p ..

ومع شوي تخريفات واضافات بسيطة طلع الكنتاكي يمممممممممي ،، :thumbs_up:

بخليكم مع الصور والشرح ،، :L:

دجاجة كاملة غسلتها ونظفتها ودلعتها وقطعتها أرباع ،،

حطيتها على النار مع شوية ماي تنسلق ويا بهارات عبارة عن نص ملعقة من ( الملح + الكركم + الكمون + الفلفل الأسود + الهيل )

وقطعت بصلة صغيرة عشان تعطي نكهة يمي وتشيل زفر الدجاج :thumbs_up: ،،

للعلم ،،

أغلب طرق دجاج الكنتاكي اللي شفتها ما يسووا هالمرحلة :rolleyes: ، ، وحبيت أسويها عشان أضمن إن الدجاج راح يكون ناضج عدل مدل من داخل وبدون ما تصير معاي مفاجآت لاحقاً :worn_out: ،، والسبب الأهم إني ما بغيتها تنقلي وتطول كثير بالزيت لين تتشربه .. من مبدأ الحفاظ على الصحة ..

تأكدت إن الدجاج نضج ، شلته في المشخال وخليته فيه لين ما يتصفى تماماً من الماي ويبرد شوي معاي ،،

في هالأثناء زهبت التتبيلة الخاصة بدجاج الكنتاكي وهاي التتبيلة اختيارية ..

تتبيلتي كانت عبارة عن ( عصير ليمونتين + شوي ملح ( لأن الدجاج سلقناه وفيه ملح ) + فلفل أسود + كمون + شوي قرفة + فص ثوم مهروس عشان النكهة الشهية ) ..

صبينا التتبيلة فوق الدجاج المسلوق وتركناه يتشربها حوالي الربع ساعة مثل هالصورة ،،

بعد ما طافت الربع ساعة ،، بالطحين نلبس الدجاج المسلوق والمنقوع مسبقاً في التتبيلة ،،

ونتركه 10 دقايق بالفريزر عشان يتماسك الطحين مع التتبيلة ( قبل مرحلة القلي ) ..

في هالأثناء نكسر 4 بيضات ونجهز البقسماط عشان مرحلة القلي ،،

البقسماط اللي وياي تلاحظون فيه قطع صغيرة من الورق الأخضر اليابس ( ذاك زعتر بري أو ما يسمى بالأوريغانوو ) .. عطاه نكهة إضافية ..

واعذروني ما صورت المرحلة الأخيرة لأن العملية يبالها سرعة ،، 😮 ..

وفيها تم قلي الدجاج الملبس بالطحين ،، غمسناه بالبيض وعقب في البقسماط وعلى طول في الزيت الغزير ( المسخن مسبقاً ) ،، :thumbs_up:

طبعاً ما أخذ مني وقت في القلي بس عشان التحمير قليتها ( وهذا هو المهم ، عشان ما تكون زيتية ودسمة كثير ) ..

وكانت النتيجة النهائية ولا أرووووع ،، شكل وطعم ومذاق ونكهة غير طبيعية ،،

سموا بالله .. وتفضلوا بالعافية على قلوبكم ،، :adore::adore: