شلون تفرقون بين MAC الأصلي و التقليد 2024.

(f) صباح الخير بنوتات

اكيد الموضوع واضح من عنوانه

لكن يمكن تستغربون ان ممكن يكون في مكياج ماك تقليد ..

ايه في ماك تقليد 🙁

الفرق بين التقليد الـ fake والاصلي واضح للي دوم تتعامل مع ماك وتركز على كل شي من الوان و علب ..

بداية ..

محلات ماك المعروفه والمعتمده ما منها خوف لأنها اكيد اصليه ..

لكن …

انا بقول لكم

سمعت ان في محلات في شرق اسيا ،، تنغشين فيها ،، تشوفين المحل بكبره حق ماك وشي طبيعي بتعتقدين انه اصلي و تنصدمين من الاسعار و تشترين بالهبل وبالنهايه .. يطلع fake

كذلك في موقع Ebay الشهير ،، تلقون عروض وايد ما تتفوت وتصدم .. يعني كمية كبيره من مكياج ماك ،، لو تشترونها بسعرها الأصلي ما تقل عن 7000 ريال ..
وتحصلونها بـ 300 دولار او اقل في الموقع وهذا شي لا يصدق .. حتى لو قلنا عندهم اسعار ماك أقل ،، لكن مب لهذي الدرجه ..

نقطه اخيره و اعتذر عنها ،، في ركن التسوق وما اخص فقط منتدانا ،، لكن اكثر من منتدى ..
يطرحون مكياج ماك بأسعار منافسه وبعضها بأسعار ما تتصدق ..
وغالباً التاجره ماعندها علم او خبر ان بضاعتها تقليد .. لأن لاحظت اغلبيتهم ما يكونون يستخدمون ماك او مالهم تجربه كبيره مع الماركة ..

وهالشغلات ممكن نتعرض لها خلال تسوقنا عبر النت ،، لأن نعتمد فقط على النظر وما يكون ملموس ..

بعرض لكم النقاط المهمه اللي من خلالها تضمنين شراء منتجات ماك الأصليه ::

1/ خلال تسوقك عبر النت سواء من المنتديات او موقع الـ e bay اطلبي فقط صور المنتجات من خلال تصوير التاجر ،، ولا ترضين بالصور المنقوله من موقع ماك الرسمي ..

2/ اذا شفتي منتج مطروح غريب عليج وكان التعليل او السبب انه فقط مطروح لـ آسيا او اوروبا او كندا وامريكا ،، اعرفي ان المنتج غير مضمون لأن ماك تطرح جميع المنتجات في جميع البلدان حتى ولو كان في فرق وقت وتاريخ في الوصول ..

3/ كل منتجات ماك من بودرات و شادوات و كحل و ارواج وقلوسات ،، بالمختصر كل منتجات ماك ما عادا الفرش ،، تحمل اسماء مو ارقام مثل باقي الماركات ..
يعني لما تشوفين وصف لشادو من ماك مثل هذا : Shimmery Eye Shadow Shade #6
يعني شادو بلمعه ورقمه 6
اعرفي انه تقليد على طول ..

4/ شادوات ماك مستحيل مستحيل مستحيل تجي بعلبتها مرايا او اسفنجه لتوزيع الشادو ،، ارجع واقول مستحيل بأي حال من الاحوال ..
وكذلك علبة الشادو ماتكون مقسمة الى طبقتين ،، مثل بودرة ستديو فيكس اللي تكون طبقه فيها الباودر و ترفعينها تلاقين طبقه فيها الاسفنجه ،، هالشي موجود فقط في البودره ولو شفتي هالطريقه على شادو على طول اعرفي انه تقليد ..

5/ علب ماك بمختلف الألوان دائماً تكون باللون الاسود المتعارف عليه ،، الا بعض الكولكشنات المعروفه مثل Lure, Belle Azure, ICONs وهالكولكشنات تنزل في الموقع وممكن تتعرفين عليها اكثر

6/ اذا بتشترين درجة معينه من شادو او روج او قلم كحل في البدايه راجعي موقع ماك الرسمي وشوفي لو الدرجه متوفره عندهم او لا .. لأن في كثير من الاوقات تجار التقليد يحطون اسماء جديده من عندهم ويغفل عنها المشتري لأن الدرجات كثيره في ماك فما يركزون عليها ..

حاولوا كثر ما تقدرون ترجعون لموقع ماك الرسمي لأن اي درجه تنزل عندهم في البدايه وقبل اي موقع آخر حتى الكولكشنات الجديده ،، تنزل عندهم اول ما يعتمدونها ..

7/ ارجع واكرر على شكل وصنع العلب .. حتى ممكن طريقة طباعة اللوقو مال ماك هي اللي تكشف اذا كان تقليد او اصلي ..
احياناً العلب التقليد تكون مقسمه بطريقة مختلفه ما تعودناها من ماك .. وهالشي اذا ما كان مطروح عند ماك اعرفي على طول انه تقليد ..

8/ لاحظت بعض علب البودره او الشادو نفسها ما تفرق عن الاصليه لكن بشوية تركيز ،، تشوفين محتوى العلبه بمستوى العلبه نفسها او نافر لبرا شوي ،، لكن الشادوات والبودرات الاصليه لو تلاحظونهم في العلب يكون محتواهم شوي اعمق من العلبه بمسافة صغيره ..اتمنى فهمتوا قصدي ..

وهذي بعض الصور لمنتجات مقلده : fake

صورة الشدوات هني توضح اللي قصدته في النقطه 4

هذي الصوره توضيح لما ذكر في النقطه رقم 7

هذي الصوره توضح اللي قصدته في النقطه 8

اتركوا كل شي في هذي الصوره و ركزوا على الـ 3 علب على اليسار وهم علب الماسكارا ..
اللي في النص مكتوب عليها ماك ،، وماك ما نزل ماسكارا بهذا الشكل
غالباً هالشكل يشبه ماسكارا مايبيلن او ريفلون ..

هذي اول ما تشوفونها اكيد قلتوا تقليد ،، لكن انا احترت واللي اثبت لي انها تقليد طريقة الكتابه على العلبه

شوفوا اختلاف الشكل في القلوس ،، قلوسات ماك الاصليه عادة تكون حجمها اصغر وطريقة الكتابه مختلفه شوي ..

واذا لقيت صور زياده لمكياج ماك مقلد ،، بضيفه هني ..

اتمنى الموضوع نال على اعجابكم وتحققت منه الفائده المرجوه ..

لا مانع من نقل الموضوع عشان تعم المعرفه على الجميع وعشان كلنا نتجنب الغش ..

(f)
(f)

موضوع خطير

واكتشاف اخطر

تبارك الله عليك اختي مرشمولس

تسلمين على هالطرح اللي ينبه الجميع

وانا بصراحه ما اشتري الا من ماك اللي في الستي،، ولا قد فكرت اشتري من حد من هالحريم

مشكورة على التنبيه

مشكووووووووووووووووووره الغاليه على التنبيه …
ماخلوا شي ماقلدوه …

جزاااااااااج الله خير حبيبتي على هالتنبيه ….

وانا نفس اختي سفيرة ماخذ الا من ماك اللي فالسـتي ….

تسلمين عالموضوع

تسلمين عزيزتي على الموضوع الحلو بصراحه كثير ماركات ينزل لها تقليد فعشان كذا افضل شي مايشترى الواحد الا من المحل نفسه ومن محلات معروووووفه بس ماك يتقلد هذا شي ثاني الله يستر بس الحمدالله انا ماشتري الا من ماك المحل نفسه لان عندنا ماعمري شفت احد يبيع ماك غير محلات ماك المعتمده وعلى قولتك التقليد اذا صارت الوحده خبيره بالاشياء يبين زي التقليد حق شانيل وديور ولانكووووووم الله ينجينا من الغش

يعطيج الف عافيه

غاليتي Marshmallows

ومشكووره على التنبيه المهم

مشكورة اختي مارشمالوز على الموضوع الرهيب

وصاجة اختي انا لاحظت هالشي في موقع ايباي

في بعض العلب تكون صج تبع ماك مثل الباليتات الفاضية اللي تبيعها ماك
ويحطون فيها شدوات تقليد يكون حجم الشدو مالها نفس حجم شدوات ماك واستغربت من حركتهم هذي

عموما انا من اكتشفت هالشي صرت ماشتري ماك الا من محلات ماك المعروفة

واللي بيسافر لدول شرق آسيا مثلا يقدر يدخل موقع ماك ويشوف المحلات الموجوده في هذي الدولة ويتاكد من عنوانها

سوري طولت وايد بس صج الموضوع مهم جداا

مشكورة على النصايح مرة ثانية