طريقتي اللذيذة والشهية في عمل البسبوسة الشبكية ،، تفضلوا حياكم الله 2024.

اليوم على العشا كان خاطري أسوي بسبوسة ،، وطبعاً مثل ما تعرفون للبسبوسة طرق كثييييييييييرة ،،

وكل وحدة لها طريقتها الخاصة تتفنن فيها ، حتى أم المهند تراه لها طرقها الخاصة بعد :p .. <<<< ما تجوز عن الفشخرة

ووحدة من هالطرق أذكر إني العام الماضي في رمضان سويتها للأهل :adore: .. وقررت إني أسويها ،،

تابعوا معاي وإن شاء الله تعجبكم ..

مثل المرة الماضية ما مداني أصور المقادير ، بس بإذن الله راح تعرفونها من الشرح ،، F:

نبدأ بسمه تعالى ..

حطيت في الخلاط التالي :

بيضتين + علبة قشطة + نصف كوب سكر + كوب نارجيل ( جوز الهند ) + كوب سميد + نصف كوب زيت أو زبدة سايحة اللي تحبي ..

ونخلط فيهم لين ما نلاحظ إن جوز الهند اختفى أو ذاب ، نصبهم في ملة ونضيف عليهم التالي :

ملعقة كبيرة نشا ..

ملعقة صغيرة فانيليا ..

ملعقة صغيرة بيكنج بودر ،،

ثم ندهن قالب الفرن بالزيت عشان نصب فيه الخليط ، ويا ليت أيضاً من النوع اللي قاعدته تتحرك ،،

نصب الخليط ،،

بعد ذلك نجيب كيس نايلون ونحط فيه علبة قشطة ونربطه ،، أنا استعنت بكيس من الأكياس اللي ياخذ المهند فيهم أكله للمدرسة :p

نثقب الكيس من الطرف ، ونبدأ نشكل خطوط شبكية بهالشكل ،، وزين لو تكوني دقيقة وانتي تسويهم ،، معاي شوي ما ضبطوا بس مشيت الحال فيهم

ندخلها الفرن وهاي بعد ما طلعناها مستوية :adore: ، بخليكم شوي مع كم صورة للشكل ..

نصب عليها الشيرة الباردة مباشرة أو ما تطلع من الفرن ،، عندي شيرة جاهزة مسبقاً أضفت عليها نكهة ماي الزهر والزعفران ،،

بعد ما بردت فكينا جوانب القالب ،،

وهنا بعد ما قطعتها :adore:

وصور أقرب للبسبوسة بعد تقطيعها ، يمممممي لاحظوا القشطة وهي ذايبة عاطية شكل ونكهة رائعة ،،

وهنا وعافية على قلوبكم ، إن شاء الله استمتعتوا بالطبق الشهي ، عقبال ما تجربوه ..