يسعد مساكم أخواتي بالخير و المسرات…
اليوم جيتكم و بعد طول غياب و معاي طريقة عجينة الرقائق أو الجلاش، و اللي بنسوي فيها البقلاوة…
العجينة بتحتاج شوية وقت وجهد، لكن في النهاية النتيجة تستاهل…
نبدأ بسم الله…
العجينة: (و هذي المقادير ثابتة و مضبوطة 100% إذا استخدمتوا المقاييس الصحيحة إن شاء الله… و أنا أخذتها من الشيف أسامة السيد و سويتها أكثر من مرة و ضبطت معاي الحمد لله)…
2/1 3 كوب طحين
4/1 كوب زيت
1 ملعقة صغيرة سكر
1 ملعقة صغيرة ملح
بيضة
1 كوب ماء
و للرق بنحتاج تقريباً 2/1 2 كوب نشا… لأن هذي العجينة ما نستخدم فيها الطحين للرق…
نعجن مقادير العجينة مع بعض (طبعاً ما عدا النشا)، لحد ما تصير عندنا عجينة ملساء و متماسكة و لا تلصق باليد…
الحين نجيب صينية كبيرة و نرشها بالنشا… نقسم العجينة إلى كور بحجم البيضة و نصفها بالصينية… أنا طلعوا لي تقريباً 38 كورة…
نجهز المكان اللي بنرق فيه العجينة و نرشه بالنشا، و نبدا نرق الكور إلى أقراص رقيقة، لكن ما نرققها كثير لدرجة إنها تصير شفافة…
نجهز مكان على جنب في الكاونتر، نرشه بالنشا و نصف أقراص العجين… و لازم ننتبه إنه نرش بين الطبقات زين ما زين خصوصاً الأطراف عشان ما تلصق في بعض… و نغطي الأقراص بفوطة عشان ما تنشف…
هذا نصف مقدار العجينة بعد ما رقيته…
و هذا شكل الأقراص على جنب…
بعد ما نخلص رق كل الأقراص، نحطهم في نص الكاونتر و نبدأ نرقهم كلهم بعض… نحاول يكون الرق بخفة و الضغط متساوي على جميع الأطراف… بتلاحظون إن العجينة بتنمد معاكم بسهولة و بتشكل قرص كبير…
و هذي صورة لطبقة من العجينة و شوفوا شلون صارت رقيقة و خفيفة…
في هالمرحلة تقدرون تحتفظون بالعجينة بالفريزر لحد وقت استخدامها… لكن أول حطوها على ورق الزبدة و غطوها بعد بطبقة ثانية من ورق الزبدة و لفوها مثل الرول… و بعدين لفوها بورق نايلون عشان نتأكد إن الهوا ما يدخلها و تنشف… و بعدين دخلوها الفريزر…
و هذا شكلها بعد ما لفيتها و غلفتها…
و قبل ما نستخدمها تقريباً بساعة أو ساعتين، نطلعها برا عشان تصير بحرارة الغرفة…
طبعاً استخدامات عجينة الجلاش كثيرة، تصلح للحلو و المالح… لكن هنا حبيت أسوي فيها بقلاوة…
و عشان البقلاوة بنحتاج:
250غ زبدة مذوبة، أو سمن، أو الأثنين مخلوطين مع بعض
للحشوة:
كوب جوز عين جمل
كوب فستق
كوب صنوبر- ممكن تستخدمون اللوز
ملعقة كبيرة سكر
2/1 ملعقة صغيرة قرفة
2/1 ملعقة صغيرة بهار مشكل (هيل – مسمار – زنجبيل – جوزة الطيب)
1 ملعقة ماء ورد
1 ملعقة ماء زهر
نحط المكسرات في صينية فرن و نحمصهم بالفرن على نار هااادية تقريباً لمدة ربع ساعة، و ننتبه عشان ما نحرقهم…
بعد ما تبرد المكسرات نطحنها طحن وسط… يعني نفرها بالمطحنة بس فرتين عشان ما تصير مثل البودرة و تعجّن…
بعدين نخلط معاها باقي المقادير… و هذا شكلها…
و نجهز بعد الشيرة و فيها سر النكهة: (نجهز الشيرة لما تكون البقلاوة في الفرن، عشان نصبها عليها و هي حارة)
2 كوب سكر
1 كوب ماء
1 ملعقة كبيرة عسل
عود قرفة
عودين مسمار (قرنفل)
2/1 ملعقة صغيرة بشر ليمون
نرفع مقادير الشيرة على نار هادية و نحرك لحد ما يذوب السكر… بعدين نزيد الحرارة و نخليها تغلي بدون تحريك لمدة 4 إلى 5 دقايق بس… عشان ما تصير تقيلة كثير… بعدين نتخلص من البهارات…
الحين يبدا الشغل…
نحمي الفرن على درجة 350 فهرنهايت = 180 مئوية…
نجيب صينية مستطيلة او دائرية، ( أنا استخدمت بايركس مستطيل) حسب رغبتكم، و ندهنها بالزبدة… و نصف فيها من 4 إلى 5 رقائق من العجينة اللي جهزناها… و ندهن بالزبدة بين كل طبقة و الثانية… و إذا كانت العجينة أكبر من الصينية، نقص الأطراف و نساويها بحجم الصينية…
نقسم مقدار الحشوة إلى 3 أقسام، و نرش القسم الأول بالتساوي فوق طبقات العجينة المدهونة في الصينية… مثل الصورة…
و نكرر العملية نفسها لحد ما يصير عندنا 3 طبقات من الحشوة… و آخر طبقة تكون من العجينة و بكذا تكون عندنا 4 طبقات من العجين…
ندهن الوجه بالزبدة و نقطعها معينات أو مربعات بسكين حادة، و آخر شي نرش على الوجه شوية ماء و يفضل بالبخاخ بس لمجرد ترطيبها…
ندخل الصينية الفرن في الرف اللي قبل الأخير لمدة نصف ساعة… بعدين نخفف الحرارة إلى 300 درجة فهرنهايت =150 مئوية و نخليها لحد ما يشقر الوجه…
نطلعها و نصب عليها الشيرة على و هي حارة، و نخليها تبرد قبل ما ناكلها J
و هذي صورتها عند التقديم…
إن شاء الله تكون عجبتكم… و ألف عافية على قلوبكم (f)
ما شاء الله عليكي
يسعدني اكون اول حد يرد عليكي
تسلم الايادي يا قمر
ماشاء الله تبااارك الرحمن
مرررررررررررررررة رووووعه ومشهية
تسلمين وجزاااكـ الله خير ,,
ماشاء الله شكلها يشهي ويفتح النفس حفظتها عندي عشان اجربها ان شاء الله
يعطيك العافية غاليتي
و الحمد لله إنها البقلاوة عجبتكم 
تسلم الايادي دائما مبدعه الى الامااااااااااااااااااام
رووووعة آش …
كما عهدناك.. متميزة بأطباقك اللذيذة …
تسلم يداك…(y)
انتوا الأروع بطلتكم الحلوة (f)