السلام عليكم ورحمة الله وبركاته
>>> قصيدة شاب عق بأمه ثم تـــــاب <<<
يمه أنا شفت الرسالة وهليت
دمعي على خدي وزادت همومي
ضاقت بي الدنيا واستاحش البيت
ضاقت على جسمي وساع الهدومي
ما فكرت نفس الردى لا ولا أوحيت
كلمه نصوح جاب عنك العلوم
يقول أمك عايشه جسمها ميت
تعجز عن الوقفه إذا جت تقومي
نسيت كم ليله في حضنها تبيت
من ثديها الطاهر طعامك ترومي
ما همها الاوجاع يوم انك ألفيت
مع مخرج ضيق ورحم ظلومي
وكتوفها لك مركب أن طحت واعييت
ما يركد الخاطر غير انك تقومي
تبيك في عز وراحه في البيت
لو داسوا العالم عليها القدومي
خف من ولي العرش يوم انك تناسيت
وإبليس حط بوسط قلبك سهومي
حزنه عليك يفتت الكبد تفتيت
ما تسمعه تقول بازحف واقومي
ياليت أشوفك واسعد القلب ياليت
واجلس معك لو كان حقي مهضومي
هذا كلامك يمه بقلبي أوحيت
اثري بسبب هجرك شقي محرومي
ما ينفع الليل لا والليل صليت
لو الدهر كله أزكي وأصومي
ما ينفع الا لو طعت ربي وسميت
برك وحقك وسط قلبي معدومي
من أول عايش وفي داخلي ميت
أحسب حياتي عز وأثري محرومي
لا منهم جابوا لي أسمك توذيت
ألف بالموضوع لا أحد يلومي
وافتح كتاب الله وأقراء وأن جيت
عند أية الأف العظيمة أحومي
ومن يوم جاني عيال بالأم حسيت
ياليت مثلي كل عاصي يقومي
تايب وبأعلن توبتي لحامي البيت
وأرجيه يغفر ما مضى من جرومي
حق الأميمه ما أعده لو أحصيت
من قام به يلقى السعادة تدومي
وأن كان جاء تفريط بشمعة البيت
ترى العقوبة نحس دايم وشؤمي
يمه أنا جيتك وللرأس وطيت
أطلبك عارف أن قلبك رحومي
جيتك أشيل هموم ما شالها هيت
موجود بين الناس كأني معدومي
أنا سجين الضيق شبيه بالميت
أبيع نفسي لأجل ترضين دومي
أنا اعترف وأصيح للعالم أخطيت
يوم أني بهجرك عقدت العزومي
تمت وبأصلي على ذايع الصيت
رسولنا صفوة رجال قرومي
وعليكم السلام ورحمة الله وبركاته
اختي العزيزة / تحرير
جزاك الله خير ونفع بك
قصيدة رائعة ومعبره
نعوذ بالله من عقوق الوالدين
ونسأل الله رضاه ورضا الوالدين
جزاك الله خيرا
أختى نبع الوفا
بسم الله الرحمن الرحيم
السلام عليكم ورحمة الله وبركاته
جزاك الله خير
وربي يعطيك الف عافيه
اختك
بنت المملكة