عكاوى باللحمه مع ارز بالخلطه على طريقتى بالصور 2024.

ازيكم يا حلووووووووووووووووين
عاملين ايه فى البرد الجميل ده 😎
النهارده جايبلكم اكله ترم العضم على رأى جدتى وهيا طاجن العكاوى باللحمه وهتقولولى اذاى عكاوى باللحم ما العكاوى اصلا لحمه
هقولكم العكاوى اللى جوزى جابهالى كلها دهن وماشوفتش فيها ريحه اللحمه وعرفت النها عكاوى بتاعت خروف سودانى 😐 عشان كده حطيت معاها لحمه عشان نلاقى حاجه ناكلها وانا للأسف اول مره اعملها او اكلها اصلا عملت سيرش على النت شوفت طرق كتير بس عجبتنى طريقه الشيف شربينى بس عملت شويه اضافات بسيطه يعنى اخدت منه الاساسيات وضيفت لمساتى
ملحوظه بقى : انتوا ممكن تستخدموا العكاوى العجالى ومش لازم تضيفوا معاها لحمه لأنها بتكون كلها لحمه وبيكون طعمها تحفه
المهم اسيبكم بقى مع الصور والطريقه .

المقادير : لحمه عجل خالى من العظم – عكاوى خروف سودانى ( او عجالى ) – 2 بصله كبيره مقطعه مكعبات – 4 فصوص ثوم مقطعين قطع صغيره – 2 ملعقه معجون طماطم مذابه فى كوب ونص ماء – 1 حبه طماطم مقطعه قطع صغيره جدا وتضاف لمعجون الطماطم – 2 حبه بطاطس مقطعه مكعبات كبيره

شايفين فى الصوره العكاوى شكلها ايه

وطبعا بهارات ( ملح – فلفل اسود – بهارات لحمه – زعتر – كمون )

نبتدى مع بعض الطريقه

نحضر حله ونضع فيها زيت وسمن والبصل ونترك البصل حتى تصفر لونها

نضيف اللحم والعكاوى ونقلب شويه

بعدين نضيف البهارات ماعدا الملح ونضيف الثوم والطماطم ونقلبهم مع بعض كويس
ملحوظه : لو بتحبى الاكل سبايسى ممكن تضيفى فلفل حار

وبعدين نضيف البطاطس المقطعه مكعبات ونضيف كوب ماء او على حسب الاحتياج بس مش اكتر من كوبيتين عشان مايبقاش صايص يعنى الصوص عباره عن ماء ومش متماسك ونتركها على النار حتى تستوى نصف سوى

بعد كده نضع المحتوى اللى فى الحله فى طاجن او صينيه انا معنديش طاجن عشان كده حطيتها فى صينيه وندخلها الفرن لمده حوالى 30 دقيقه او لحد ما اللحم تستوى

ودلوقتى نعمل الارز اللى انا اخترعته

مقاديره : 2 كوب ارز – 2 وربع كوب ماء ساخن مذاب فيه مكعب ماجى – ملح – فلفل اسود – بهارات مشكله – قرفه مطحونه – قرنفل صحيح (مسمار) – فلفل رومى مقطع قطع صغيره – نصف حبه طماطم مقطعه قطع صغيره – ا بصله صغيره مقطعه قطع صغيره

الطريقه : نضع بالحله سمن وزيت والبصله ونقلب حتى يصبح لون البصله دهبى او تذبل

نضيف الطماطم والفلفل الرومى والبهارات كلها ونقلب شويه

نضيف الارز المغسول ونقلب شويه

وبعدين نضيف الماء المذاب فيه مكعب الماجى ونتركها لحد ما الماء يتشرب وننقلها على نار هاديه لحد ما يستوى ومش بياخد 10 دقائق فى السوى زى اى ارز

نرجع بقى للعكاوى نطلعها من الفرن ونرش عليها الملح حسب التذوق ونقلب وندخلها الفرن تانى لمده 5 دقايق ونطلعها

وده شكل الارز بعد ما خلص صوره زووووووووووووم

وده الطاجن بتاعنا زوووووووووووووووم العكاوى كانت مديا طعم للحمه والبطاطس راااااااااائع

ودى بقى السفره النهائيه مع السلطه والبيبسى وده اساسى فى اكل اكله عندى

وبالهنا والشفا على قلوبكم حبيباتى

ماتحرمونيش من ردودكم ولا تقيماتكم الحلوه يا حلووووووووووووووووين

وزى كل مره لا احلل نقل الموضوع بتاتا الموضوع حصرى لمنتديات عرووووووس الموضوع والصور مجهودى الشخصى
اشوفكم على خير مع طبق جديد ان شاء الله
تصبحوا على خير

F:

:L::L::L::L::L::L: