فارس الأحلام، من هو؟؟ وهل التقيتي به؟؟ 2024.

هالموضوع صار له فتره وأنا أفكر فيه،، وأعتقد ان الكثيرات من البنات اللي في سن الزواج ممكن يفكرون فيه
وأتوقع كل بنت منا في بالها أو كانت في بالها مواصفات معينة لفارس الأحلام، وشروط حاطتها لقبول زوج المستقبل

وطبعا، لاختلاف البيئات والخلفيات والثقافات، فان هاذي المعايير او المواصفات تختلف من شخص الى آخر
في بعض البنات اللي يفضلون ان زوجهم يكون أكبر منهم بكذا سنة
والبعض يبونه من نفس عمرهم
والبعض الآخر تبيه متعلم ومثقف
والبعض مايبونه متعلم
وأعرف وحده تبيه أصغر منها،، عشان يكون حنون أكثر :think:
وحتى الشكل أكيد له دور، لازم طويل ووسيم وشعره ناعم كأنه هندي :bigsmile:

وهالاشيا كلش مافيها شي غلط ومن حق كل وحده انها تحدد المعايير والشروط اللي تشوف انها تناسبها وتناسب شخصيتها، والمواصفات اللي تحس انها راح تسعدها اذا توافرت في زوج المستقبل

طيب، الحين أبي كل وحده منكم تقول لنا:
1- على أي أساس اختارت زوجها؟؟؟
2-ماهي المواصفات اللي كنتي تحلمين فيها لشريك الحياة؟؟؟
3-وهل تتوفر هاذي المواصفات في زوجك؟؟
4-واذا ماتوافرت، ليش رضيتي بزوجج؟؟ (ماهي المواصفات اللي شفتيها فيه وممكن تغني عن شروطك اللي كنتي حاطتها؟)
4-وشنو هي الشروط اللي تنازلتي عنها والشروط اللي ظليتي متمسكه فيها ؟؟؟
5-وهل ندمتي على التنازل عن أي من الشروط اللي كانت في بالج؟؟ او هل ندمتي على التمسك باحد الشروط وبعدين طلع ان مامنه فايده ؟؟؟ او ماله أهمية مثل ماكنتي متوقعه؟؟

طبعا الأخلاق والدين هذا شي مفروغ منه، وماعتقد في وحده عدله ماتبي هالشي
لذلك
كلمونا عن المواصفات الثانيه 😮

وترى هالموضوع له أهميته للبنات اللي قاعدين يخططون للزواج أو يحددون أولوياتهم،مع ان الأولويات تختلف من وحدة لثانيه
بس نبي نتعرف على طريقة تفكير عرايسنا الحلوات
فياليت تفيدونا من خبراتكم

وأتمنى ان الكلام يكون بعيد عن الاجابات النموذجيه
يعني كل وحده تدخل تفضفض عن اللي في قلبها

وحتى اللي مش متزوجه
شاركينا خيالج وأفكارج………..

ولا تخجلون أو تترددون من كتابة اللي يجول في خاطركم حتى لو حددتوا طول رموش العريس :21_131: مافي مشكلة أبداً

وأتمنى ان موضوعي يكون خفيف عليكم
وألقى تفاعل منكم