قبل كم يوم كنت أتابع نايجيلا لاوسون على قناة فتافيت وكانت تسوي كسرولة لحم… عجبتني الطريقة وجربتها على طول وفي نفس اليوم، لكن غيرت فيها شوي عشان تناسب ذوقنا…و مع أن فيها نكهة غريبة وطعم جديد، الحمد لله عجبت زوجي وخلص صحنه كله…
والحين اتركم مع الطبخة…
المقادير والطريقة:
كوبين جزر مقطع شرائح عرضية كبيرة
رأس بصل أبيض كبير مفروم خشن
في مقلى كبير وغزير حمي شوية زيت و أضيفي له الجزر والبصل، وخليه على نار هاااادية بدون ما يتحمر بس يذبل البصل ويصير شفاف…
بعدين ارفعيهم في طبق جانبي…
الحين نجيب:
كيلو لحم بقر مقطع مكعبات
ربع كوب طحين
ملعقة صغيرة بهارات مشكلة
نص ملعقة صغيرة ملح
رشة فلفل أسود
اخلطي كل المقادير في كيس بلاستيك عشان اللحم يتشرب الطحين ويتغطى بالكامل
في نفس المقلى زيدي شوي زيت وأضيفي اللحم وحركيه لين يتحول لون اللحم من الأحمر للبني، بعدين ارفعيه على جنب مع الجزر والبصل.
ملاحظة: أنا استخدمت مقلى ستينلس ستيل ولصق اللحم فيه، والمرة الثانية استخدمت مقلى تيفال ولا لصق فيه.
لنفس المقلى نضيف هذي المقادير:
2 كوب ماء
بشر برتقالة
عصير نص برتقالة
2 ورق غار
و هذا شكلها بعد ما أضفنا المقادير للقدر… و نخليه يغلي…
بعد ما يغلي رجعي الجزر والبصل واللحم اللي رفعناه على جنب وغطيه وخليه على نار هااادية لمدة ساعتين… أنا تقريباً أخذ ساعة ونص يمكن عشان سويت مقدار قليل لي ولزوجي بس…
طبعاً خلال هالوقت لازم تحركينه من قترة لفترة عشان مايلصق ويحترق…
في البرنامج تقول تقدرين تحطين المقادير في كسرولة وتطبخينها بالفرن، و طبعاً هذا اختيار لثاني لطريقة الطبخ…
و في النهاية راح يتحول المرق لصوص ثقيل، طبعاً انتي هنا زيدي الملح والفلفل حسب الذوق…
و أنا قدمت معاه رز أصفر ورشيت عالوجه كزبرة مفرومة…
أتمنى يكون عجبكم… و هني و عافية…
تسلم يدج …شكله لذيييييييييذ
دايما اشوف الانجليز يطبخون اكلات بالبرتقال و خاااطري اجرب بس ما اتشجع لكن شكلي الحين بجربها …بعد ما شفت تطبيقج الرائع ما شاء الله
و تسلم ايدج و يعطيج العافيه
ان شاء الله تعجبج لما تسوينها وهني وعافية :shiny:
حتى زوجي عجبه وايد …و تعحب انه بالبرتقال
تسلم ايدج على الطريقه فعلا لذيذه انصح الكل يجربها… و نكهت البرتقال فيه عجيبه الصراحه ….تسلم ايدج
تصدقين أنا قاعدة أقول المرة الجاية اسويه بزيد ثوم وبهار عشان التغيير…
وأمس كنت عند أهلي وسويته لهم بس عاد الكمية دبل!! بس الحمد عجبهم وكلوه، ولا قلت لهم ان فيه برتقال الا بعد ما ذاقوه عشان ما يستنكرون ويعافونه :shiny:
ماشاالله عليج ابداااااع…
بس للاسف ما طلعو الصور كان خاطري اشوفهم …