عندي مشكلة ماتخليني انام الليل وهي وزن طفلي
ابني عمره سنة و7 اشهر …من 4 شهور كان وزنه اقل من المعدل ب 200 جرام …وكان عنده تطعيم والدكتورة نبهتني واعطتني فيتامينات وموعد بعد شهرين على اساس نتابع وزنه
فانا قمت اهتميت زيادة في اكله وزدت كمية الموز والبطاطا
ولما رحت راجعت لقيت وزنه وصل للمعدل الطبيعي … ومن الاسبوع اللي فات كان عنده موعد اللي هو بعد مرور شهرين …لقيت ان وزنه اقل من المعدل ب2ونص كيلو ….يعني اقل عن وزنه قبل شهرين
مع اني دائما احط له الوجبات اللي يحبها وهي :
معكرونة بالخضار المسلوقة
خضار مطبوخة بالفرن
رز بالخضار
كبسة دجاج
قطع لحمة مع البطاطا
عصيدة
فتة (شوربة مع خبز)
شوربة خضار عدس دجاج
بالاضافة الى بيضة مسلوقة كل يوم موزة او تفاحة كل يوم زباددي فواكه كل يوم حليب بالفراولة
واقل شي 3 رضعات حليب بالمرضعة واخلط له ملعقة سيرلاك مع الرضعة
وياكل معانا لقمتين ثلاث لما نحط الاكل … وياكل مع امي اذا كلت وهكذا
الطبيبة ما اهتمت بالموضوع وايد وقالت لي ان هو اصلا وزنه قليل من المرة اللي فاتت عشان جذي ما اعطتني موعد ثاني قريب …
وهالايام احاول ازيد الوجبات او ازيد النوعية اللي تزيد الوزن بس هو ما عنده اي شهية يركز اكثر شي على السوائل و ساعات اقول لان الجو ما يشجع بس هو طفل لازم يتغذى … وعلى فكرة حتى امي قالت لي ان شكله وزنه نقص قبل ما اروح اصلا الموعد….وانا بعد كنت حاسة بس شاكة …..وهو طفل كثيييييييير الحركة
ممكن تساعدوني تكفون انا خايفة عليه شنو اسوي
على فكرة وزنه 9ونص كيلو بس
/
::
الله يكون بعونج يارب
انت بالليل لا تعطينه الحليب كلش
واكليه وجبه عشاء مشبعه
لان الحليب هو الي يخلي الاطفال يفقدون شهيتهم وما ياكلو
فحاولي تخلين الحليب بس اول ما يصحى من النوم بالصباح فقط
وباقي اليوم اكل
وعلى فكره نظام اكله ما شاءالله حلوو ..استمري عليه
/
::
الحمدلله امس اكلته فواكه وبطاطا بالليل واخذ نص رضعة ومن اليوم بجرب الغي الحليب قبل النوم
معاناه صدق معاناه
انا ولدي عمره سنتين و 8 شهور ووزنه 14
مادري لو هالوزن طبيعي او لا ؟
يوم ياكلون ويوم كلش ما يأكلون
حاولي حبوبه تأخري وقت الحليب وتعطيه عشاء بعدين الحليب
والله يحفظه لج يارب