المقادير:
1:رز مصرى وبأكد على الرز المصرى لأنه بيستحمل السوى ومش بيعجن زى الرز البسمتى.
2:شعرية لزوم الرز
3:عدس بجبة أو العدس الغامق
4:حمص مسلوق او حمص معلب
5:مكرونة صغيرة والافضل الصغيرة لأن شكلها بيبقى احلى.
6:عصير طماطم
7:خل وليمون
8:بصل وثوم
9:ملح وفلفل أسود وكمون وشطة ومكعب مرقة أو شوربة.
الطريقة
نبدأ بالحاجات السهلة السريعة :
1:اسلقى المكرونة بالطريقة المعتادة وبرديها وصفيها .
2:جه وقت تجهيز الصلصة:
ا:هنحتاج لثوم تقريبا 7فصوص ثوم مهروس ونبدأ نحمرها فى شوية زيت وخلوا بالكم هنقلب الثوم فى الزيت ثوانى بسيطة ومعيارك هنا هو ظهور رائحة الثوم وأن يبدأ يلتصق فى الإناء ب:وقتها ضيفى 1/4 كوب من الخل وقلبيهاثوانى .
ج:ضيفى عصير الطماطم وأظبطى الملح وضيفى بقية التوابل.
د:ضعيها على نار هادئة إلى متوسطة حتى يغلظ قوامها.
3:نيجى لتقلية البصل:
أنا عن نفسى بحب التقلية تكون كتير فى طبقى فبزود البصل المهم… اعملى الكمية اللى تحبيها البصلة الكبيرة قسميها نصفين بالطول ثم شرائح رفيعة بالعرض والبصلة المتوسطة أو الصغيرة تقطع على طول لشرائح رفيعة ،فى الوقت ده إقدحى كمية زيت كتير فى طاسة عميقة ولما يقدح جيدا ضيفى البصل ودعيه حتى يأخذ اللون البرتقالى الجميل واحترسى فالبصل فى المرحلة قبل النهائية يتحمر سريعا فإن غفلتى عنه لدقيقة قد يحترق فالأفضل أن تقومى بتحمير البصل وأنت واقفة امامه ومتفرغة له.
طبعا بعد تمام تحميره إنشليه وضعيه على ورق ماص للزيت.
4:نيجى لدقة الثوم:هنحتاج تقريبا لعشر فصوص ثوم مهروسين نحمرهم فى شوية زيت زى الصلصة بالضبط فوق ثم نضيف إليه ربع كوب خل و عصير ليمونتين وثلث كوب ماء وملح وفلفل وكمون وشطة ونتركها حتى تسخن ثم نضعها على جنب.
5:نيجى للأرز :
ا:اولا العدس عندنا فى مصر فى نوعين من العدس عدس بجبة بلدى حبته غامقة أوى وصغيرة وقريبة لكور الصغيرة فالنوع ده بيحتاج إنه ينقع من الليلة السابقة فى ماء بارد…. اما النوع الثانى فهو العدس المستورد حبته كبيرة ومفلطحة ولونها قريب للرمادى أو البيج الفاتح المهم النوع ده يكفيه إن ينقع نصف ساعة فى ماء مغلى بعد ذلك يغسل جيدا ويصفى.
ب:نجيب 6 فصوص ثوم مهروسين ونحمرهم فى شوية زيت زى الصلصة فوق وبعدين نضيف الشوربة أو ماء يناسب كمية الأرز التى ستسويها ..إذا أضفتى شوربة فأضيفى فقط ملح وكمون وفلفل وشطة أما إذا أضفتى ماء فزيدى عليهم مكعب المرقة.
ج:عندما يغلى الخليط ضيفى العدس وحسب نوعه ستبقيه على النار فإذا كان عدس بلدى أتركيه على النار مدة ربع ساعة إلى ثلث ساعة أما إذا كان عدس مستورد فيكفيه عشر إلى 15 دقيقة المهم أن تجدى الحبة قلت قساوتها فلا هى مستوية تماما ولا هى قاسية والسبب ان العدس سيكمل سواه مع الأرز.
أثناء سواء العدس ستقومى بتحمير الشعيرية فى قليل من الزيت فى إناء آخر حتى تحصل على اللون البرتقالى الجميل ثم ضيفى عليها قليل من شوربة العدس ثم بعد ذلك ضيفيها على إناء العدس وسبب ذلك ألا تفعلى مثلى فى أول مرة صنعت فيها الكشرى وعندما أضفت الشعيرية مباشرة على شوربة العدس أجاركن الله وكأن بركانا إنفجر فى المطبخ من الطشة الهائلة التى حدثت.
د:أتركى خليط العدس والشعيرية قليلا على النار ثم اغسلى الرز وضيفيه وأتركى خليط الارز يغلى على النار لمدة 3 دقائق ثم إنقليه لنار هادئة والأفضل ان يكون أسفله شياطة وبعد عشر دقائق قلبيه وتأكدى من كونه يحتاج إلى ماء آخر ام لا حتى يكمل سواه.
الآن وقت الوليمة
نرتب الطبق كالتالى:
طبقة ارز
طبقة مكرونة
طبقة صلصة
طبقة تقلية بصل
طبقة حمص
وفى طبق جانبى الدقة الخاصة بالثوم.
يارب يعجبكم الكشرى ومستنية ردودكم وإلا زعلى وحش ومالكمش طبق من الكشرى اللى عملته .ولو عجبكم الكشرى ياريت تقيمونى فضلا لا أمرا .
مررررررسى عسولة
الله يعطيكم العافية (f)
يسلمووووووا
يمي يمي
يعطيك العافيه
وربي يخليلك الوالدة و يطول بعمرها يااارب..
يعطيكي العافيه