بالنسبة للعطور الفرنسية البخاخة من الماركات العالمية أنصح كل عروس بالعطور التالية واللي حتى لو كانت غالية لا تكثر من العطور وممكن تخلي الباقي تاخذه بعد العرس لانه لابد انه كل شهر راح ينزل الجديد منها:
– عطر ( كو كو شانيل) من شانيل … الصراحة ما فيه حيله، وصدقيني يكفي انج ترشين بس رشتين على الجسم بعد ما تاخذين حمام دافيء وتحطين قطرتين دهن عود خلف الاذنين..امممم…نتايجة عجيبة:eek:
– عطر (هوت كاتور) الجديد من (جافينشي)
– عطر (ألور) من (شانيل)…بيجنن كتييييييير
– عطر (هوت هوجو) الأحمر
– عطر (ميراكل) من (لانكوم)…باردة جدا ريحته
– عطر (جلوريا) من (كاشاريل)…تدوم ريحته لفترات طويلة
– واذا تبين عطور عربية نصيحتي تاخذين من عطور أجمل الفرنسية، واكثر واحد بيعجبج عطر (جادور) وله نفس ريحة عطر (جادور) من (كريستيان ديور)..هذا حلو وريحته باردة جدا وخاصة لما تصبين منه قطرات على الفرش مع قطرات دهن عود الشمس ..تخلف ريحة تخبل ونتايجها اكيدة 😉
أما عن العود المعطر ( اذا فكرت العروس تضيفه لزهبتها) ، نصيحة لا تاخذ من اي مكان وتاخذ من (العود المخمر) من (ملك العود) وانتبهي عود مخمر مش مبخر تراه يفرق، وهو صح غالي سعره بس ثمنه فيه لانه عن تجربة فعلا( ما فيه حيله) ويمكن الشي الوحيد اللي يحلي زهبة العروس واللي ما بتندم على انها اختارته، وصدقوني للحين كل ما يخلص اروح اشتري من بزيادة.
وفيه عند (ملك العود) بعد خلطة على شكل بخاخ اسمه (سفير) ، الصراحة قمة في الروعة عبارة عن خلطة دهن عود وريحته(خنينة) يعني رشة وحده منه كأنج داهنه جسمج ببدهن العود، وعلى فكرة مب غالي سعره (90 درهم) ، ولو خذته العروس بتلاحظ انه مكتوب عليه افضل عطر شرقي لعام 2024 في دبي.
ونصيحة خواتي ابعدوا عن كريمات الجسم اللي يستخلصونها من العطور العربية المركزة او حتى دهن العود لانها تضر الجسم وتسبب امراض جلديةعلى المدى البعيد، وممكن استبدالها بكريمات خفيفة وطبيعية مثل اللي تنباع في (بودي شوب) .
طبعا الدخون أنواع كثيرة وكل الحريم ماشاءالله عليهن يطلعون لنا بالجديد منها، وفي هذا امهاتنا الله يطول بعمرهم مب مقصرات ممكن يعطون العرايس خير المشورة فيها وطبعا كله يرجع لذوق العروس. انا عني خذت عدة انواع من الدخون واغلبها من اللي يبيعونها الحريم.
واخيرا بالنسبة للعروس اللي تريد تاخذ عطور لعريسها ومش اي عطور طبعا المميزة منها،(وعن سابق تجربة وخبرة في عطور الرجال) أم سعيد تنصحكم بإهدائه العطور التالية 
– أحلى عطر رجالي _وعلى قولة بو سعيد_ الطابوقة (من كبره)…عطر
(71 ) للرجال هذا ريحته بعد ما تبرد ترد على العود..وطبعا احلى الروائح على الرجال رائحة العود الطبيعي.
– عطر (حجر) عربي ومخلوط بدهن العود من (محلات سيد جنيد العالمية)
– عطر (مايكل) من (شانيل) هذا من تميزه وغلا سعره يبيع منه بس باريس غاليري وبكمية محدودة
– وطبعا غير العطور من ماركات اخرى واللي هي ممكن تكون اساميها قديمة ولكن سمعتها فيها للان وصدقيني الرجل لا يهمه ان كان العطر جديد او لا ، المهم تميز رائحة العطر ولو كان من زمن اجدادنا
عندج عطر: جيفنشي الاحمر للرجال
– (دولتشي جابانا ) الابيض (الزيبرا)
– (ديزاير) الأزرق والاحمر من (دانهيل)
– كيتون
– جوووووب
– (انتيتيوشن) من (استي لاودر)
– (كو كو شانيل) من (شانيل)
– ( جوتشي راش) الابيض من (جوتشي)
اتمنى خواتي اني ما اكون طولت عليكم بس حبيت اوصف لكم تجربتي في العطور واللي ياليت اكون فدت فيها بعض الخوات المقبلات على الزواج قريبا ومحتارات في اختيار العطور والعدة الكاملة للهن منها..
واتمنى بعد من الخوات المتزوجات انهم بعد يفيدونا بتجارهن في اختيار العطور لعرسهن ويعطون العرايس الحلوات نصايحهم
والسموحة منكم..
أم سعيد
يعطيك العافيه اختي ام سعيد
بصرااااحه ماقصرتي
ربي يوفقك
الف شكر
تحياتي لك
اختك
بنت المملكة
مشكوره اختي ام سعيد
وجزاكي الله خير
وما قصرتي
اختكم
طيف القمر
عشان أشله معايه يوم أتشرا
ويعطيج الف عاااافيه وربي يوفقج انشاءالله…
تحياااتي …