خواتي بما اني والكثير من العضوات على وشك الزواج ان شاء الله… حبينا ناخذ من تجارب خواتنا المتزوجات..
1. شو الشي الي سويتيه في مرحلة الاستعداد وندمتي عليه؟..
2. وشو الشي الي ما سويتيه وتمنيتي انج سويتيه؟
3. وشو الشي الي سويتيه ومستانسه انج سويتيه وتنصحينا به؟
أدري لخبطتكم بس بعطيكم مثال على الاجوبه على لسان ربيعتي:
1. ندمت لأني فصلت 6 فساتين فخمه للزهبه.. وعقب العرس بشهر حملت ومتنت واااايد وما قدرت اتهنا بفساتيني وعقب الولاده ما قدرت أرد أضعف لأن طبيعة جسمي خلاص تغيرت.
2. الشي اللي ندمت اني ما سويته قبل العرس هو اني ما تعلمت كيف يكوون الغتر وهذا من أهم الأشياء عند الريال.. وكنت احاول أراقب خوات ريلي وحريم اخوانه كيف يكوون الغتر عشان اتعلم وتلعوزت وايد..
3. أنا مستانسه لأني ما شلت شعر ويهي وشعر الجسم الخفيف مثل البطن والظهر مع انهم نصحوني اشيله بس انا ما رضيت لانه خفيف وخفت يزيد… واللي نصحوني قالولي زين سويتي لأن شعرهم وايد زاد ولعوزهم يوم شالوه..
يلا يا بنات همتكم …. ونصايحكم
وسلامتكم
هلا والله وغلا فيك روح الأمل
عجبتني فكرة الموضوع مرة ……
راح أرجع لك مرة ثانية ، أنتظر أشوف تفاعل البنات
والله فكره حلوه اختي وخاصة كوي الغتر عاد هذي حدثي ولا حرج مااعرف ومفكره اخليه هو يكويها بنفسه شرانيه انا
![31372811190 عروس](http://forums.3roos.com/images/new_smiles/31372811190.gif)
باااااااااااي
حبيت اقولكن عن تجربتي علشان تستفيدن
الي سويته و ندمت عليه اني اشتريت الكثير من القمصان والتنانير لكن حملت و ما قدرت البسها و بعد ما ربيت كلها صارت موضه قديمه
و الشي الي ما سويته وندمت اني ما كثرة في شراء قمصان النوم(تعرفون عروس وتحب التغيير كل ليله)
والشى الي سويته ومستانسه اني ما رتبت حواجبي وخليتهن رفاع
هلا اختي العروس الحزينه الله يجعل أيامج كلها فرح.. عاد الغتر هاي أهم شي ما وصيج عليهن.. تدربي على غتر اخوانج أو ابوج.. وجهزي بيزات عشان تشترين لهم بدل الغتر المحترقه..
هلا اختي شوق العين… ويزاج الله خير على مشاركتج..
الكل تقريباً نفس المشكله يندم على التنانير والقمصان والفساتين .. وما نعرف شو الحل لان لازم كم فستان وتنوره وقميص.. بس بنحاول ما نكثر..
وان شالله بنمشي على نصيحتج الثانيه… وعن الشي اللي ما سويتيه انا ان شالله ناويه بعد ما اسوي شي في حواجبي.. لأن السالفه فيها لعن وانا راضيه بحواجبي جيه الحمد لله..
وين باقي البنات؟؟ نتريا خبراتكم خواتي..
أني فصلت فساتين كثيرة للسهرة ، ومالبستهم كلهم
السبب : أهل زوجي ماأدري وش فيهم طبعهم (عزيمة وحدة ) وبس
وعقبها ….حملت ،والجسم طبعاً طلع يهبل ، ولا جت مناسبات ألبسهم
في أول الحمل ..قبل لا يتغير كثير
وبعد …. إني شلت ظهري ، وتحسفت لأنه بصراحة عقب 3 أسابيع
صار شيء غير طبيعي من المرتفعاااات ألي فيه (( طلع لي حبوب ))
2) شو الشي الي ما سويتيه وتمنيتي انج سويتيه؟
اني ماعملت زفة ، كنت أتمنى ، لكن ابوي وأمي رفضو …
ماأدري ليش ….؟؟
للمعلومية أنا أول بنت تعرس لهم
3) شو الشي الي سويتيه ومستانسه انج سويتيه وتنصحينا به؟
أني ماشلت ( بطني ) ….وبعد أحب أقولكم بنات لا تنتفون حواجبكم
مو تقولون مرة وحدة وبس …… ,وإلا الكوافير تلعب برأسك ،وتقول
أرتبهم لك ……. تراه حـــرام ومايجوز أخذ شيء من شعر الحاجب
اللهم قــد بلغت اللهم فأشهد
وانتي بعد اختي همسه مشكوره على ردودك يعطيك الف عافيه على خبراتك بس موب تزعلين علشان اهلك ماسوو لك زفه عااااادي عوضيها بعيالك انشاااالله
طبعا الحين تتنظرون خبراتي .. ااااسفه ماعندي خبرات ولا شي بس دخلت استفيد منكم الله يعطيكم العافيه ..
اللي فهمته منكم ماشيل شعر بطني ولا ظهري ..
وبخصوص فساتين السهر الحمدله مافصلت واايد اشوا ( لان امي منبهتني للنقطه انهن بيطيحن بكبدي وماراح استفيد )
بس الحين لازم نرع نكوي الغتر !!!!
ياربي صعععب ماااعرف اكووووي .. تدرون عاد قلت لامي تشتري لي مكواة بخاار اسهللللللل لي والله يعييييين
يالله اخواتي خبرااااتكم
انا حاليا قاعده اتجهز وامس رحت الخياط لكن اخاف اني اكون مخيطة ثياب وااايد واخشى اني اثقل نفسي بمبالغ كبيرة وبعدين اندم لكن ما اقدر اخفف تدرون ان العروس الكل يريد يشوف ثيابها ما عندنا هذه العادة ما ادري في الدول الأخرى كيف
لكن قمصان لأ ما خيطت اشتريت جاهز
لكن الجلابيات المخور هم اللي كثار
والله يا خوفي يطيحون بكبدي وما اقدر اتصرف فيهم
وتدرون شوي خياطة ملابس العروس تكون غالية
لكن انتظر ردود اخواتي المتزوجات علشان يوافونا بخبراتهم في ههالمجال
وأما عن الزفه.. ماعليه.. اهم شي تكونين مستانسه فحياتج.. وان شالله تتوفقين لأنج طعتي اهلج وما سويتي شي تمنيتيه عشانهم..
وسالفة الحواجب متفقين عليه احنا وكل العرايس ان شاالله … "لا لنتف الحواجب"
هلا والله فيج اختي كرزه الحلوه..
الله يعافيج.. ويزاج الله خير على دعائج لي الغاليه..
(سبحان الله.. نفس احساسي والله.. الله يثبتني وياج على طاعته.. اللهم آمين)
زين سويتي بسالفة البطن والظهر..
أما الغتر.. عيوني السالفه مب سالفة كوي وخلاص.. حضرتهم يبون هالمثلث اللي يكون عند مقدمة الراس يكون واقف.. ماعرف شو اسمه.. مادري فهمتي علي ولا لا.. اشوف خدامتنا تحط نشا وهالسوالف عشان يكون واقف ومرتب.. وبيني وبينج أنا حاطه في بالي اشتري مكوى وطاولة مكوى واحطهم بحجرتي الحين.. وآخذ غتر اهل البيت واجرب عليهم.. بس بصراحه للحين ما بديت أقول لاحقه على التعب العرس في الصيف ان شالله..
هلا والله اختي شهد78.. تسلمين والله ردودكم هي اللي حلّت الموضوع..
هالمشكله العادات اللي تخرب علينا.. الله يعينج صج مشكله إذا الناس يطلبون يشوفون ثيابج.. انزين ماعليه لا تكثرين وايد من الملابس وقوليلهم انج خذتي احتياطج لتغير الجسم بعد الزواج.. وبالعكس يمكن تكبرين بعينهم ويقتدون فيج ان شالله..
واطمنج أكثر شي يتم ويا العروس تقريباً هي الجلابيات المخور لأنها تكون وسيعه فتنفع حتى لو امتلى الجسم شوي… اذا ما متن وايد.. اما الفساتين هي اللي تطيج بجبدج لأنها تكون مفصله على الجسم وان تغير يتكنسل الفستان..
بانتظار المزيد من المشاركات والخبرات..
بالفعل جلابيات المخور تبقى لكن الخوف تدري من ايش ان موضة الكريستال اللي فيه او نقوش اللي تكون فيه تروح
ما دري قدرت اوصل المعلومة او لا
يعني اختي قبل كم سنة كانوا يحطوا الشك والخرز
لكن الحين صارت بخياطة يد وكريستال (( فصوص ))
وبعد فترة الله اعلم ايش بيطلع
والله كل يوم يطلعوا لنا شيء جديد
والله يعين
هذا غير البخور اللي لازم يكون نوعين :::::
نوع للعروس خاص لها
ونوع للمعازيم اللي يجوا يوم ما يحطوا العروس بالجلو والغذاء قبل ليلة الزفاف
يعين العرس مصارررررررررررررررررريف ما تنتهي ابدا
أمس رحت اشتري للبخور وطبعا الأسعار والعة نار ما ادري ايش السبب
يمكن علشان الأزمة في الخليج (( الله اعلم )))
هذا غير الذهي اللي التولة منه وصلت الى مبلغ خيالي
ما قدرت اشتري ذهب قلت خليني انتظر
عاد الذهب اللي مستحيل ان نخفض منه
لأن الذهب تتزين العروس فيه خلال فترة العرس وبعده لما تنعزم
يعني بالمختصر الله يعينني ويعين كل عروس تتجهز
ولي عودة ان شاء الله