محشى ورق العنب على طريقتى بالصور روووووعه 2024.

ازيكم يا قمرات

انهارده جيبالكم ورق العنب بس بطريقتى انا وامى وبصراحه دا احلى ورق عنب دوقته فى حياتى

ندخل فى الموضوع بقى :

اولا المقادير : شبت – كزبره خضرا – بقدونس- رز – طماطم مبشوره – بصله كبيره اوى مبشوره وطبعا ورق العنب بتاعنا

الطرريقه بقى:

1- هنبشر الطماطم وهنغسل الرز وننقعه فى مايه لمدة 10 دقايق او ربع ساعه فقط لا غير

الرز بعد ما نقعته وصفيته

ودى الطماطم المبشوره

2- هنبشر البصل ونقسمه قسمين قسم هنحطه على النار مع زيت او سمن حسب الرغبه بس انا بفضل الزيت ونقلب لغاية لما يبقى لونه دهبى فاتح والقسم التانى من البصل هنحطه فى طبق وعليه ملح وفلفل اسود

3- هنضيف الطماطم للبصل ونقلب ونسيبه على النار هاديه ونغطى الحله لغاية لما الطماطم تشرب كل مايتها وتتسبك عدل

4- هنضيف عليها بقى الخضرا (الشبت والبقدونس والكزبره) بعد تقطيعهم صغير جدا وممكن نستخدم مخرطة الملوخيه فى تقطيعهم وانا بعمل كدا علطول عشان اسهل واسرع (خلينا ننجز واحنا فاضيين)

5- هنحط بعد كدا بقى البصله اللى كنا شايلنها على جمب وكمان الرز والطماطم المتسبكه بالخضرا على بعض ونحط ملح وفلفل اسود و نعناع ناشف نطحنه بأيدينا كدا وشوية جنزبيل ناشف لو عندنا ونعصر نص لمونه للناس اللى بتحب المزازه بس انا مش بعصر عشان جوزى مش بيحبه

6- هنجيب ورق العنب طبعا ونوضبه ونسلقه فى مايه وملح لغاية بس لما لونه يتغير من الاخضر الفاتح للاخضر الزيتى ونشيله نحطه فى مصفاه ونسيبه يبرد عشان نعرف نلفه

ملحوظه مهمه جدااااااا:: لما اجى الف ورق العنب بحط الحشوه على الجزء الخشن

فى الورقه هتلاقوا جزء خشن كدا وجزء تانى ناعم اوى وبيلمع هنفردها على الجزء الناعم بحيث انه يبقى تحت والخشن هو اللى فوق عشان نحط عليه الحشوه

وعشان متتلغبطيش ابدا افتكرى دايما انك لما تحشيه لازم يطلع بيلمع ولو لقيتى ورقه لونها مطفى اعرفى ان دى ملفوفه غلط

7- هنلفه كويس اوى ونحطه فى حله والحله دى بقى ليها كزا طريقه يا اما اخد ورق العنب اللى نحسه مقطع ومهربد كدا ومينفعش نحشيه فى قعرها من تحت فا يعملنا طبقه عازله عن النار او اننا نحط ورق فويل او اننا نحط بطاطس وبصل بس انا بحب الورق الفويل لكزا سبب اولا لانه بيحكم ورق العنب مش بيخليه يفك وكمان عشان لو حبيت اقلب الحله بعد كدا عشان اقدمها بيطلع ورق العنب مرتب جدااااااااااااا وكأنه تورتايه كدا واللى بيسهلى كدا ان ورق الفويل مش بيلزق فا ممكن اشده من الاطراف عشان يطلعلى ورق العنب مرتب كدا وحلو

8- بعد ما هنلفه كويس اوى ونرصه هنحطه على النار ونكون مسخنين شوربه قبلها ونسقى بيها ورق العنب بحيث انه يادوب يغطى الورق عشان ميفكش منك لما يبدأ يغلى على النار

ولما يشرب 50% من مايته هتوطى النار عليه خالص وتغطيه وتحطى الشياطه تحته وتسيبيه 20 دقيقه لغاية لما يتسوى بمزاجه

ملحوظه بردو: انا كل مره بسقيه بحاجه مختلفه يعنى مرات بسقيه بتمر وشوربه ومرات بسقيه بحزء من الخلطه من غير رز بشيلها على جمب وبسقيه بيها وعلى فكره دى بتبعتبر احلى نتيجه لانه بيطلع حلو اوى اوى وساعات بسقيه بشوربه ودا سقيته بشوربه عشان كنت عامله عزومه وعايزه شكله يطلع مرتب ولونه حلو كدا وانتى لكى حرية الاختيار

وانا بصراحه صورته لما استوى فى الحله بس نسيت خالص اصوره لما قلبته فى طبق وكنت هحط صوره من على النت تبين شكله بس بصراحه ملقيتش صوره زيه خالص

ويارب يعجبكم

اقتباس

المشاركة الأساسية كتبها دموع الملائكه

	ايه دا ياعم الاكل ده انا قايمه ع الصبح لما شفته اعصابى تعبت ونفسى اعمله بجد شكله تحفه اوى ربنا يسهل لك ولا دتك يابسبس والتقييم مش بعرف

ههههههههههههههه بصى يا ستى عشان تقيمى حد هتلاقى تحت اسمه صورته وحاجات كتيره كدا انزلى للاخر هتلاقى ميزان كدا جمب العلامه اللى عامله زى اشارات المرور دى

دوسى على الميزان بتاع الشخص اللى عايزه تقيميه هيطلعلك صندوق كدا تكتبى فيه بقى اى حاجه عايزه تقوليها للى بتقيميه وبعدين تدوسى بقى ارسال وبس

تسلم ايديكي وربنا يقومك بالسلامة انتي والبيبي

وبحب اكلاتك على فكرة بحس انها السهل الممتنع