مفاجأة 2.2 الثانية . شي بسيط وجديد وغير متوقع! 2024.

عضوات شلة 2.2 أربع بنات وانا وحدة منهم

انخطبت الأولى وسوينا المفاجأة ( القصيدة الشعرية والإهداء في براويز) بالإضافة إلى مساعدتنا لها في التجهيزات وسوينا توزيعات الفساتين

وبما أن العضوة الثانية من الشلة انخطبت وبحسب التوقعات الترتيبية
ما يصير ما نسوي لها مفاجأة خاصة منا مثل ما سوينا للأولى

ملجتها كانت الخميس اللي راحت ( أول أمس ) بس المفاجأة تمت قبل أكثر من سبوع تقريباً

لسبب بسيط

أن صديقتنا القمر ما عندها وقت بالمرة.. والفترة ما بين مواساها وملجتها أقل من 3 أسابيع

فكان صعب ان احنا نسوي توزيعات او نخطط لشي للحفلة!

وما في وقت أصلاً نشتغل على شي متميز غير

فــــســـــتـــــان الـــــمـلــــجـــــة

استغربتون؟؟

صديقتي كانت متورطة .. من بيسوي لها فستان في سبوعين؟؟
وما تقدر تروح السعودية وفي نفس الوقت معظم اللي في المحلات كبار وصعب تضبيط القياس يخترب الموديل

احنا لقطنا السالفة من المواساة

واجتمعنا عدة اجتماعات

تكللت بالنجاح

وكانت المفاجأة اللي لازم نشتغل عليها هي

فستان ملجة لعروستنا

نفاجئها فيه ونفكها من عبالة التدوير والمحاتاة

وبدأنا الخطة وفي غضون سبوع جهزت
لكن تعبنا تعب

من قماش
من تصميم الموديل ( تصميمي)
من الخياط اللي دبحته عشان يسويه في وقت قياسي وبما انه يعرفني فسواه

بقى عندنا القياس! وكنا خايفين واجد منه وكنا نحاتي ونفكر شلون بنجيب قياسها ونسويه ضبط عليها؟؟

واهتديت اني لفكرة..

صديقتي تخيط عند نفس خياطي.. ومن فترة كذا سبوع كانت وقعة وياه على فستان خطوبة بت خالتها! وهني على طول اتصلت في الخياط وسألته عندك قياس فلانة مال الفستان كذا كذا كذا؟ قال إيه.. قلت تمام التمام

اخذت من عنده القياس

ورحنا الخياط وشرحنا الموديل وكل شي وعلى نفس القياس

وسواه

لما استلمنا الفستان واللي اخترنا ان يكون موديله ناعم كلش وبسيط ويناسب جو ملجة صغيرة
كنا نفكر في شلون نعطيها اياه ونفاجئها

وفي نفس هالفترة.. هي كانت هالكتنا هلاك.. كنا طوال الوقت احنا نجهز في المفاجأة وفي نفس الوقت نطلع وياها لأنها ما تدري بشي
وقاعدة تدور فستان لروحها

فكنا نحرص على ان احنا نروح وياها كل محل للفستان ونكرهها فيهم

يعني.. من تقول شوفوا دا الفستان حليو؟ نقول لها لا مو حليو.. أو ما يناسب.. او دفش

وكنا نتعذر لها بمليون عذر

واخترنا موديل فستان يشبه الموديل اللي بنسويه
وخليناها تستخف وقلنا لها الا تجربينه وهذا كشخة وهذا حليو وموديله روعة
وحببناها فيه غصب لين قالت ما امبي الا موديل نفسه
والسبب انها ما اخذت داك..لأن لونه مو لون ملجة وكبير عليها:shy:

بس الموديل عاجبنها!
وهني اشتغلت عليها اني ان بطلع وياها نشتري القماش وكل شي واني اقنعت خياطي يخيط لها في سبوع.. واقتنعت مسكينة

إلى ان جاء اليوم الموعود

واللي لازم نطلع وياها نشتري قماش

كان يوم جمعة! وكنا نبي نفاجئها بالفستان بحيث تتكنسل الطلعة

والمشكلة أن احنا صدقنا السالفة:qaq:

وتهاوشنا على تحديد الموعد ( اللي يسمع صدق بنطلع! )

وحدة تقول نطلع الصبح.. ووحدة نقول نطلع في الليل

ووحدة نقول نودي الفستان بيتهم.. ونقول شلون بتشوفه وشلون بندش بيتهم اذا احنا بنطلع وبس بنمر عليها
ووحدة تقول خلوه لبيتنا ودخلوا يا زعم تنتظروني

المهم.. مني مناك مني مناك

اتفقنا على ان الطلعة تتم في الليل ونروح بيت وحدة وننتظرها في المجلس أول ما نوصل بيتهم ( مجرد خدعة) وبس ندخل المجلس نلقاها هي تنتظرنا داخل بالفستان مجهز

واخترنا في الليل لعدة أسباب

الأول… أن الفستان ما غلفناه ونحتاج نشتري كارد وبوكس
الثاني… أن يوم الجمعة محلات الأقمشة ما تفتح الصبح وقنعناها ان نروح بو كوارة
الثالث… أن اللي اخترنا ان نروح بيتهم ونفاجئها فيه بدل ما تطلع وتركب ويانا السيارة.. تخلينا ندش بيتهم ( فيها دقات تأخيرية!) ونضطر كذا مرة ننتظرها لين بنطلع لأنها تكون رايحة مشوار أو شي وننتظرها على باب بيتهم لين تجي.. فبما انها بتطول بيكون مناسب ان ندخل داخل وتتم المفاجأة

يومها.. قعدنا من صباحة الله خير.. وعوارة من مجمع لمجمع ندور بوكس حليو ومميز.. وبالوقعة حصلنا شي حليو ويناسب بس كان يحتاج تغليف بس يأسنا وقلنا بس بوكس كفاية محنا مغلفينه بعد

وطلعت حبايب عيوني وعيون رفيقتي.. لأن أضطرينا نتنفرق وكل وحدة صوب تدور كارد مال خطوبة! مو محصلين!! اختفوا من الوجود! مافي شي حليو وعليه الإيمة!!

المهم.. العصر حصلنا الكارد.. وبعدين جتني الفكرة! قلت ليش ما اسوي حركة سريعة تغليفية للبوكس عشان يصير منظره تمام التمام؟؟

واضطريت اروح محل ورد ومحل قماش اشتري تور ووردة بيضاء

ما رجعت البيت إلا أذان المغرب.. وكل شي ركيض ركيض حق التغليف! لأن يا زعم عقب الأذان بنطلع

ولكن لظروف خاصة وبقدرة قادر قدرنا نقلب السالفة ونخليهم يجون بيت أوريانا!! بدل ما يروحون بيت صديقتنا اللي اتفقنا ان الاجتماع والمفاجأة تكون في بيتها.. ما علينا

يوم وصلوا بيتنا تمت الخطة كما يجب

اتصلت فيني وحدة منهم.. يلا اطلعي احنا على الباب
جان امثل الدور التمثيلي العالمي

أي أطلع!! صلوا على النبي! دشوا البيت بليز بليز ما بتأخر توني متسبحة وقاعدة البس ثيابي
قالوا بنحارسش برة

والحمد لله الحمد لله يوم عجبها
وبدل ما نطلع

بسطنا في بيتنا سوالف

وجيكت الفستان وكان مضبوط يحتاج بس تضييق شوي من فوق
اما كله كله تمام التمام

والأحلى انها فرحت فرحة ما بعدها فرحة!

وبتظل تتذكرنا طول عمرها
لأن فستان ملجتها مو هي مختارتنه ولا هي تعبانة عليه
وانما هدية من صديقات عمرها!

ألحين بترككم مع الصور

وسوري على الإطالة.. بس حلاة المفاجاة بالشرح التفصيلي