في موضوع محيرني وحبيت اخذ رايكم فيه ممكن؟؟
انا توني توظفت مدرسة … ودوامي الاسبوع الجاي
زهبت ملابسي بعضها خيطتها وبعضها شريتها
وكذلك بالنسبة للجناط والاكسسوارات والعبي والملافع والجواتي والصنادل عزكم الله
بقت مشكلتي بالمكياج …
عندي كمية هائلة من المكياج من مختلف الماركات وبعضة حتى ما استخدمتة.. لذلك ما شريت اي شي جديد
مشكلتي هي اني ما احب المكياج الصبح كلش… وبنفس الوقت مو حلوه اكشخ بكل شي ووجهي خالي من المكياج … صح والا انا غلطانة ؟
فكرت بعد ما اغسل وجهي واحط الكريمات اللي من مجموعة التبييض من جيرلان …
احط كونسيلر وطبقة خفيفة من البودرة المضغوطة..
واحط بلاشر ناعم واثقل حواجبي بظل بني غامج ..
واحط ظل فاتح من غير لمعة تحت الحاجب …
واحدد عيني من تحت بقلم كحل واحط ظل يمشي مع لون ملابسي على الجفن المتحرك ..
وزاوية العين الخارجية احط عليها شويه ظل اسود بس مو ثقيل بحيث يبين ممسوح وامده شوي لما خط الرموش … واكثف الماسكرا
وشويه بلاشر .. مع تحديد وجلوس
شرايكم ؟؟
انا ما ابي مكياجي يبين كثيف وبنفس الوقت ابيه مريح لي وسهل عساس ما يعطلني الصبح واتاخر عن الدوام؟؟
قولولي رايكم؟؟
واذا عندكم طريقة سهلة وسريعة تقدرون تساعدوني فيها انا بانتظاركم 
وبعد تقدرين اتحطين ماسكرا وكحل داخل العين وغلوس وتضبطين حواجبج عادي وبلاشر بدون ظل بعد ينفع
ويعطيج العافيه مقدما
اختي الجادل في كريم اساس روعه اختي تستخدمه وهو مخصص
للنهار ولاا كأنج حاطه فانديشن..بجيب لج اسمه بكره ان شاءالله ..
وهو من ماركة استلودر…
سي يو حبيبتي ….باربيه
أنا أسير المدرسة وجهي أملح و مرات أتأخر بعد >>>>>> شفتي الفرق
لكن معاوضه السنه الجايه بسوي نفس طريقتج
والله يسهل لك امرك
يمكن المدرسه ومجموعه المدرسات اللي بتقعدين وياهم من النوع اللي يحب الميك اب اللي جرئ وجيه حركات
وممكن العكس
عشان جيه انتى اول يوم داومي وانتى حاطه ميك اب عملي
وحاليا الموضه عندنا بالدوام نحط فونديشن فقط لاغير وتحت البيس من غيرلاين بلمعه خفيفه ونحط بعده كحلتنا وشويه بلاشر خيف
وغلوس خفيف ركزي على العيون كحل برمسه وماسكراا وجيه
وانا عن نفسي احب يكون لي ستايل في الميك اب
وحطي بالج على بشرتج ومو ضروري سالفه الكونسيلر
اهم شئ الفونديشن يناسب ويهج وبس
ونصيحه اشتري فونديشن غيرلاين وماسكراا يا لانكوم او كريستين ديور
روووووووووووعه شويه على هالمنتجات صراحه
مممممممم شورايج بعدسات بعد ما تتأقلمين في الدوام
شكرا لج .. وتسلمين على مرورج الحلو
باربي الدوحة
انا عندي كريم استي لودر وهو حلو بس ما ادري اذا نفس اللي عند اختج او لا؟؟
اناهيد
انا شكلي اول اسبوع بكشخ تالي بجيهم بوجه املح هههههههههههه
نقاء الروح
مشكورة
رمز المحبه
شكرا على مرورج
بس حتى لو لقيت البنات اللي بالقسم يحبون المكياج الثقيل ما راح اقلدهم … لاني ما احب المكياج الصبح … واخاف اتاخر ابي شي سريع
وعجبتني طريقتج .. بس ببدل الفاونديشن بالبودرة المضغوطة لاني احسة ثقيل على وجهي …. انا الحمدالله ملامحي زينة وعيني وسيعة
يعني ما يحتاج اتعب روحي… لمسات خفيفة ويمشي الحال
وبالنسبة للعدسات ما عمري لبستها بس شكلي بجرب
اما كريم اساس جيرلان وكريستيان ديور وماسكرا لانكوم بالفعل رائعييييييييين
وطريقتج بصرااحه بيرفكت … بتطلعين ميه ميه …. انا اختي وخالتي مدرساات .. تعالي شوفيهم وهم رايحين الدوام الله لايروويج ملحاات من قلب .. وجنهم رايحين يكملوون نووم هنااك …
احس لو تتسمرين على هاللوك الناعم لصبح .. بتكونين بيرفكت ..
وجربي بس كريم مرطب وبعده البودره الكومباك .. وكحل داخل العين وماسكارا ..
والاروااج حاولي قد ماتقدرين تختارين الواان تاانسب الصبح المشمي الفااتح .. الوردي النااعم .. والبيج .. وتقدرين تستخدمين غلوسات بدون روج .. وحاولي من غير ليب لاينر .. يعطيج منظر طبيعي اكثر ..
ويالله ننطرج اداومين وقولي لنا عن مكياجج لاول يووم
اول يوم رحت وانا مشتطه ( قاعده شهور بالبيت ) ..مزهبه شغلي ومكياجي من الليل وثاني يوم اروح الدوام وانصدم بالوجيه هناك كلها جلحه ملحه 😮 ..يالله صباح خير … ثاني يوم رحت كاشخه نفس الشي وثالث يوم رحت وانا حاطه ماسكارا وقلوس … ياختي الجو هناك ما يشجع ..قلت يا بنت وشو له المخاسير والتأخير :s2
تصدقين اريح لج اذا البنات ما يكشخون عشان ما تحاتين اللبس والشكل كل يوم ههههه بس السلبيه الوحيده انج تحبين تكشخين ويصير عندج اكتئاب مثلي انا تعقدت وربي
بس اذا تبين شي خفيف استعملي الكيك و ماسكارا وكحل وقلوس نفس نظامنا ايام الجامعه ( أخخ ليتها تعود)
وخبرينا اشصار معاج هههه
جويل
الله يبارك فيج … انشاالله اول ما اداوم بقولكم تفاصيل مكياجي
جويل
انا متوقعة يصير لي نفسج …
انا لما كنت بالكورس الميداني .. كانوا المدرسات اللي وياي ما يكشخون كلش
بعد دوامي باسبوع بس.. بدت الكشخة تبين عليهم هههههههههههه <اثرت فيهم>