أكيد كل وحدة منكم سمعت من عيالها موقف صار له في أول يوم دراسي…. مضحك ، محزن، هواش، صراخ… طبعا ياحبهم حق السوالف والإحتجاجات….
راح ابدأ بالأول ، بما أن ولدي أول مرة يدخل روضة، ماكان حاط في باله أن أمه بتوصله وغير مسموح لها تدخل، طبعا هو شافني طالعة وقعد يصيح ماما ماما،، وآنه طبعا مشيت وطول الطريق و آنه آصيح أنهم ماخلوني آدخل معاه مادخلت الدوام الا الكل يسأل شفيها عينج منفخة..
لما رجع الظهر، قعد يقول خليتيني ورحتى آنه صحت شوي.. وكل ساعة يرد يقول خليتيني ورحتي عني.
ومحتج على ولد أن هو داس على حذائه سبايدرمان ولعوز سبايدر، يعني مو زعلان على حذائه، زعلان على سبايدرمان.
يله ننتظر منكم سوالف عيالكم الحلوين…
اختي اخذتني المدرسة انا واخي الي المدرسة وتركتنا هناك وجلسنا نبكي نبكي بهستريا عجييييييييييبة :cry::cry:
احتي الاصغر مننا اول ما دخلت المدرسة كانت معنا انا واخي في نفس المدرسة واحنا كنا في الصف الرابع والثالث
وكثير عجتها المدرسة … اليوم الثاني جائت امي تصحيها علشان تروح المدرسة ،،، قامت جلست في السرير :21_211::21_211:وقالت لامي
" ليش اروح المدرسة ،، ما خلاص انا رحت امس ،،، ليش هو لازم نروح المدرسة كل يوم:think: ؟؟؟ "
مساكين أنا بعد أول مادخلت المدرسة قعدت أصيح صياح،، بس أنت أخوك معك يعني المفروض ماتصيحين….
وقصة أختك الصغيرة روعة،، يعني كل يوم يروحون المدارس….
يله ننتظر مواقف البقية…
عقبال ما اودي حمودي عقب 3 سنوات ان شالله 
بس احس من الحين اتخيل اني يوم بوديه بصييييح…احسه موقف مؤثر…حبيبي بيكون كبر و بيدخل مدرسه ..هههه على قوله ريلي انتي تنفعين ممثله دراما :21_133:
هلا رانيا
انا وصلت ولدي اول يوم للروضة وهو طبعا موب اول سنة فيها ووديت معي بنتي واول ماوصلت صفه قلت يلا ادخل وهو
راافض يقول لا برجع معاج للبيت وانا احاول اقنعه يدخل تخيلي شصاااااااار
بنتي دخلت الصف وقعدت فيه ههههههههههههه ولما اقتنع وييت بمشي بنتي رفضت تمشيييييي وتقول لا بقعد
ههههه وبالغصب سحبتها ومشييييينا <<< عمرها سنتين و5 شهور خخخخخخخ
صدق ذكرتينى باول يوم مو امصدقه ان ولدى كبر وبروح الروضه فكنا انى زوجى حدنا فرحانين فى اول يوم ومسوين
حاله استنفار كله علشان ولدى حبيبى المهم رحنا ودينا الروضه ودخلت معاه الروضه وقعدت اصوره بالكاميره الفيديو
وهو مستانس فدخلته الصف فعاد بمشى اله قعد يصيح فديته ابغى ماما بروح ويه امي البيت والمعلمه امجودتنه فكسر
خاطرى عدل او انى اصوره واصيح من رجع من الروضه حه ركيض ليش ماما رحتين ماقعدتين وياى ويتهدد فينى ويقول
فى كرسي لج ماما بكره قعدى وياي ويوم ثانى جه ليه الباص ومارضا اروح يبينى انى اوديه
والكلام اطول بس يالله مانبى انطول عليكم
يحليلهم عيالنا
عمره ثلاث سنوات وبوديه السنة الي بعدها ان شاء الله
يعني قبل المدرسة بسنة وحدة بسس
متحمسة للهاليوم وفي نفس الوقت خايفة من هاليوم
لانة ولدي متعلق فيني وانا بعد متعلق فيه وااااايد
المهم اني ولدي السنه ذي أول سنه ليه روضه
بس أني مهيأته عدل من السوالف عن الروضه حتى هو قبل مايروح الروضه صار يحكي عنها وكانه صدق رايح وشايف
المهم أول يوم صحيته من النوم وسبحته وريقته ولبسته …………>>> أكيد كل ام تسويها
ولمن جه الباص ركبته وقعد يطالعني بإستنفار لأني قلت له انه مايروحون وياه ماما وبابا بس علاوي
بصراحه كسر خاطري وكنت متوقعه صياحه ونياحه بهذا اليوم وعدم الاستجابه بس اللي اتوقعته ماصار
ولمن جه من الروضه ماسكت يمكن ساااعه كامله ما خلا شي والاقاله وأحلى شي يوم قال (( أصدقاتي ))
وطبعا طول النهار وكل أشوي صار يحكي عن موقف أو شي شافه ووووالخ (( أغلبها شلخ )))
ومن المواقف اللي قالها (( شلخها ))) ليي أنه في بنيه قعدت على كرسيه وقام يطقها طق لين كسر راسها
هذي من أولها الله يستر تاليها
بصراحة اليوم بس ماسكة بطني من الضحك على المواقف اللي صارت
أول موقف لما جيت اقعده من الصبح قعد يصيح ومارضى يقوم يبي ينام بعد مع اني هيأته للروضة وكلمته وايد عنها بس لأنه نايم متاخر ولما صحصح قعد يهددني ويقول لي انا بروح الروضة علشان انام
وحطيت له الأكل في الشنطة وقلت له ماما هذا علشان تاكل مع أصدقاءك قال أنا ماباكل مع اليهال بس بقعد أشوفهم وهم ياكلون
وثالث موقف كان لما دخل الروضة دخلت معاه وديته الصف بس شاف المدرسة راح لها وحضنها ونام ولاأفتكر فيني
يعني فكرته بشوفني ماشية بيقعد يصيح
ورجعت على الدوام وأنا أفكر فيه واتصلت أسأل عنه وكلمني وهو مستانس…………
هذا اللي صار اليوم وسامحوني على الاطالة
غداري،، يحليلها بنتك خلاص سجليها مع أخوها يكون يتشجع ومايصيح…
منار.. يحليله ولدك حاجز لج كرسي بعد لا تحاتين… بس لا تعودينه تدخلين معاه بعدين بيتعود..
حبيبة جيمي… ليش أختي ماتاخذينه من الحين الروضة يكون يتعود ومايلصق فيج أكثر…
أحلى شهد.. الحمدلله الله يهديه ومايتغير وذكري الله عليه كل صبح لحد يحسده.
فستان العروس.. يحليله حمودي النوم مقطعه،، خليه أختى ينام مبكر بتشوفيه من نفسه يصحى الصبح نشيط…