قبل ما تصبغي شعرك
1- لازم تقري الإرشادات الموجودة على علبة الصبغة حتى لو كنتِ عند الكوافيرة لأن ده ممكن يجنبك مشاكل كتير ممكن تقعي فيها وتضر بشعرك.
2- لازم تجربي لون الصبغة على خصلة من الشعر الأول علشان تتأكدي من إن ده هو اللون اللي إنت عاوزاه.
3- لازم تخلي بالك إن ماينفعش تصبغي شعرك لو ضعيف أو فيه في فروة رأسك حبوب علشان مايحصلش تهيج في فروة الرأس لأن زي ما إنتِ عارفة إن الصبغة بتحتوي على مواد كيميائية.
4- ياريت ماتعمليش الصبغة على فترات متقاربة علشان تدي فترة راحة لشعرك.
5- لازم تحطي طبقة كثيفة من الفازلين أو الكريم على الجلد القريب من منابت الشعر داير ما يدور حوالين الرأس علشان جلدك مايتأثرش بالصبغة.
6- لو إنتِ اللي هتصبغي شعرك بنفسك لازم تلبسي جوانتي بلاستيك أو مطاط علشان تحمي إيديكِ من تأثير الصبغة.
7- آخر حاجة هي إنك لازم تعملي اختبار الحساسية قبل ما تستعملي الصبغة، لأن فيه بعض الناس عندهم حساسية، والاختبار ده بيكون إنك تجربي شوية صبغة على مكان متداري من جسمك زي الرجلين مثلا علشان بعد الشر لو أصبتِ بحساسية ماتتحرجيش وسيبيها لمدة 48 ساعة، ولو ظهر احمرار يبقى تعرفي إنك بتعاني من الحساسية، ولازم ماتستخدميش الصبغة.
اختيار لون الصبغة
احنا عارفين إن اختيار لون الصبغة ده مهمة صعبة جدا خصوصا مع الألوان الكتير المنتشرة وعلشان كده احنا ناويين نساعدكم على الاختيار.
1- لو كان لون بشرتك أبيض ولون عينيك أخضر أو أزرق فأغلب ألوان الصبغة تناسبك كالأشقر والبني ولكن ابعدي عن الأشقر الذهبي المائل للاصفرار لأنه بيبهت لون البشرة.
2- لو كنتِ بيضاء ولون عينيك عسلي فاللون المناسب لكِ هو كستنائي فاتح أو بني مائل للأشقر أو نحاسي.
3- لو بشرتك قمحية ولون عينيك عسلي فاللون المناسب لكِ هو نحاسي متوسط أو أسود أما اللون اللي مفروض تبعدي عنه فهو الأشقر والأحمر.
4- لو كانت بشرتك بيضاء ولون عينيك بني أو أسود فاللون المناسب لكِ هو البني.
5- لو كانت بشرتك سمراء ولون عينيك بني داكن فاللون المناسب لك هو الأحمر الداكن.
طريقة صبغ الشعر في البيت
1- قسمي شعرك إلى 4 أجزاء وبعد كده قسمي كل جزء لخصل.
2- حضري الصبغة زي ما هو موجود في تعليمات الصبغة.
3- وزعي الصبغة على الشعر خصلة بعد الأخرى، ويفضل البداية من منبت الشعر.
4- سيبي الصبغة على شعرك مدة دقيقة حتى تأخذ الصبغة مفعولها.
5- اغسلي الصبغة بالشامبو لغاية ما شعرك يتخلص من أي لون.
6- نشفي شعرك كويس.
العناية بالشعر المصبوغ
فيه كام خطوة للعناية بالشعر المصبوغ ودول هنقول لك عليهم.
1- علشان تمنعي تأثير الصبغة الضار على شعرك لازم تعملي حمام زيت بعد ما تصبغي شعرك بيوم.
2- لازم تستعملي الشامبوهات والبلسم المخصص للشعر المصبوغ علشان شعرك مايفقدش حيويته وبريقه وكمان علشان لون الصبغة مايبهتش بعد فترة.
ياريت في العدد ده نكون جاوبنا على الأسئلة
اللي بتدور في دماغك عن الفرد والصبغة
مستنية رأيكم
***ياضايق الصدر بالله وسع الخاطر…دنياك يازين ماتستاهل الضيقة***