نصيحه لكل اخت مقبله ع الزواج 2024.

من زمان وانا حابة اكتب وافضفض واطلع اللي عندي بس ماحصلتلي الفرصه

واللي ابكتبه الحين من تجربة ووالله من قلبي واقوله لكل عرووس وكل وحده

مقبلة ع الزواج وكم تمنيت ان فيه احد نصحني وعلمني حقيقة الامور

وراح اكتبلكم بالعامية علشان يدخل قلبكم ع طول

الحياة الزوجيه بحر لاساحل له وكل يوم يمر تحسين انك تكتشفين زوجك زياده

الحين كل وحده بتتزوج تحس انها متحمسه وتبغي تصلح كل شئ

شوفوا ياحبايبي انا اقولكم لاتطلعون الزين كله مره وحده يعني مو كل يوم لبس

وتمكيج وسشوار وكلفه كذا والله مايصلح تعرفون لية لان الحرمه ماتقعد فاضيه وطيبه

وانتي عروسه اكيد فاضية بس بيصير حمل ووحم وتعب ويجي البيبي ويبدا السهر والتعب

والزوج اكيد بيستغرب وين الكشخه والاهتمام وبعض الرجال مايقدرون وع قولتهم ولدك ع

ماربيتيه وزوجك ع ماعودتيه وبعدين اذا شافك دايما متكشخه وجاء يوم وما كشختي بيستغرب

وبعدين بيصير شكلك مالوف عنده انا مااقول لاتهتمين بشكلك بس يكفي انك مرتبة وريحتك

حلوه مو مبهذله احيانا تمر علينا ظروف ماتخلينا حتي نناظر وجيهنا في المراية والله اعرف

وحده المكياج مايفارق وجهها والملابس الكشخه وحاله وبعد فتره تعبت مسكينه قام الزوج استغرب

قال ليش اهملتي ولاصرتي مثل اول ,,,,,, حاولي انك ماتورين زوجك الزين كله لاتكشفين اوراقك

مره وحده كل فتره اظهري بشكل جديد كذا بتلفتين نظره اكثر واكل العنب حبه حبه………

لاتعودينه دايما ع الهدوء يعني مو ضروري يجي كل يوم وانتي مرقده العيال علشان الوناسة

هذا خطاء واكبر خطاء لازم يتعود ع اطفاله ويتعود ع ازعاجهم وصوتهم والله سمعت عن حرمه

مايدخل زوجها البيت الا هي منومه عيالها لو بالضرب علشان تسهر هي وتنبسط بس والله

حرام لازم يحسون بدخلة ابوهم ويفرحون فيه ولا اقول ازعجيه لكن عوديه ع عياله لانه بيجي

يوم وماتقدرين تتحكمين في ازعاجهم وهو ماقد تعود وهنا يبدا الملل والزعل ويمكن يضطر يطلع

علشان يهرب من ازعاجهم

ثاني شئ واهم شئ انتبهي لاتصيرين لزقه ومتصربعه عليه ترا الثقل صنعه وكل ماثقلتي

زدتي غلا عنده يعني حاولي انك تغيبين عن عيونه لفتره مثلا وهو في الصالة روحي غرفتك

وبربره وخليه يفقد حتي سواليفك وكلامك لان الرجال مايحبون كثرة الكلام والسواليف

نجي الحين للملل في الحياه واتوقع الكل يعاني من الروتين وانا انصح كل زوجها انها تغير

كل فترة في ترتيب غرفتها وحمامها وحتي غرفة الجلوس غيري امكان الاثاث او حتي التحف

لاتكونين انسانة مملة لان الزوجه عمود البيت وهي شمعتة بيتها وكل شئ في ايديها

لو انتظرنا الرجال عز الله متنا من الملل والكاية غيري حتي في الاضاءات مره شغلي الشموع

ومرة الاباجوارات ومره اكشحي بالاضاءت القوية خخخخخخخخخخ وهكذا اطردي الملل بكل

طريقه جددي في اكلكم حتي في مكان الاكل مو دايم نفس المكان حتي لو بالحوش وغيري

في شكلك من فتره لفترة قصي او اصبغي بس لاتكثرين هم تصلعين ويعرس الرجال وتدعين علية

ولاتنسين انك تفرحينه اذا صار عنده مناسبه مثل ترقية او عيد او نجاح في عمل صلحي حفلة لك

انتي وياه وانبسطوا بس نصيحه لاتصير الحفلات عمال ع بطال وتصير ماصخه مالها طعم

الحياه لاتخلو من المشاكل والزوجة الحكيمه هي اللي تقدر انها تتحكم في نفسها وحياتها

دون تدخل خارجي مشكلتنا ياالحريم انا عجولات ونفهم خطاء ونطير بالمشكلة ونبكي وساعات

تصغر عقولنا ونطلب بالانفصال والعياذ بالله وهنا انصح كل زوجة انها تخاف الله في نفسها وزوجها

واذا شافته زعلان لاتوقف في وجهه او تقول يالله ودني لاهلي وش ذا الحياة وكلام ربي اعلم فية

لكن الحمدلله ان العصمة بيد الرجال والا كانت علوم

تذكري دايما ان زوجك جنتك ونارك ولاتفضلين احد علية او تزعلينه علشان فلانة وعلانه

واحمدالله انه رزقك واشكرية ع نعمه اللي ماتعد ولاتحصي

لاتفكرين ان الحياة كلها رومانسية وطلعة ونزله الزواج مسئولية واسرة وأطفال لكن لاتخلو من اللذه

والالم ومال الانسان راحة الا في الجنه

انشاء الله يكون موضوعي خفيف دم ع قلوبكم والله يعلم انه من قلبي

واختم موضوعي بهذة الابيات

لا تحسبين العرس توفـي وكتكـات …..
ولا تحسبينـه تويـكـس والا بونـتـي

ولا تحسبين العرس كيكة وطرطـات ….
وصلـة قطعتيهـا ووصـلـة بلعـتـي

ولاتحسبين العرس تصفيق واصوات ….
وانتي علـى صـوت الغطاريـف همتـي

ولاتحسبين العرس كوشـة ولمبـات….
وانـتي كمـا الطـاووس فيهـا جلستـي

ولاتحسبين العرس احلام في الشات …..
يـامـا بنيتيـهـا ويـامـا هـدمـتـي

ولا تحسبين العرس روحة وجيـات ….
هيـا اقضبـي بيتـك عسـى مانهبلتـي

ليلة سعيدة وانتي احلـى الجميـلات …..
تشخـص عيـون النـاس اذا حضرتـي

( واللاينر ) حطيـه بــلا زيــادات …
لا يـخـرب المكـيـاج اذا دمـعـتـي

( والمسكرة ) تحتاج لطـف ومـدارات ..
حتـى يـبـان الـزيـن اذا رمشـتـي

( والاسبريه ) رشيه حتى البصيـلات ..
يمسك شعـرك زيـن لـو كـان زدتـي

وترى ( المحدد ) فن يحتـاج رسمـات
يبـان رسمـه زيــن اذا ابتسمـتـي

العـرس يابنيـة ماهـو شعـارات …..
تفنـى مراسيـمـه وتبقـيـن انـتـي

ويبقى شريك العمر راعي الطويلات …..
هـذا هـو العـرس حقيقـه عرفـتـي؟

اول نصيحة لـك حفـظ الصلـوات ….
صلي العشـا والفجـر فـي كـل وقـتِ

وفي ليلة العرس الموفـق بالـذات …..
ادعـــي الـكـريـم إذا سـجـدتـي

والتعري لاترضين عند الكوفيـرات …..
ولبسـك يملـى العـيـن اذا لبسـتـي

واللي على زوجك تحرضك مـرات ….
ارجـوك شوتيهـا شـوتـت بلنـتـي

والصبر في العشرة حتى على فتات ….
ياماحـلا فعلـتـك يـومـك صبـرتـي

واذا حفظت السـر مـع المـدارات ….
زوجـك تـرى فـي عيونـه كبـرتـي

والسوق يعني هاه وقت الضرورات ….
والاتـرى زوجــك يــدور لمفـتـي

زيدي الغطاية وكثري في العبايـات …..
والله يـرضـى عـنـك اذا ستـرتـي

اوصيك بالكبسـة وكثـر اليدامـات …..
حتـى لوانـك مـن سببـهـا متنـتـي

يسلمووع المرور