كان فيه بت صينية اسمها خواه(يعني وردة بالصيني نزلت لكم الترجمة اهه عشان محدش يبقي له حجة)
البت خواه ديه كانت زميلة في الشغل مع صديقتي وصديقتي قالت تستفيد من البت خواه
سالتها هو انتي ليه بشرتك صافية يا بت انتي ورايقة ومنورة علي طول مع اني شايفاكي بتغسلي وشك بالصابون العادي وساعات من غيره كمان وما بتصرفيش علي بشرتك
ردت البت خواه وقالت ايه عارفين قالت ايه؟
انزلوا بعد الفاصل
قالت لها احنا الصينيات جداتنا علمونا طريقة حلوة قوي ومش مكلفة نعتني بيها ببشرتنا ونبيض بيها وشنا
والطريقة ديه بتثبت كفائتها احسن من كل مستحضرات التجميل وعناية البشرة مهما اتطورت
الطريقة هي كالاتي:
بنجيب نص كباية رز وننقعه يجي ساعة في ميه باردة
وبعدين نحطه يغلي علي النار لحد ما يبقي زي العجينة
وكل مايحتاج ميه نزود له عشان لازم يبقي معاه ميه كتير
ناخد بقي الرز اللي بقي مهري وميته معاه ونضربهم في الخلاط كويس قوي لحد ما يدوب الرز في الميه لازم الرز يبقي مهري خالص وكل مايزيد السوا علي النار كل ما يبقي احسن
نعبي الخليط ده زجاجة نضيفة جدا وندهن منه علي قد ما نقدر مرة مرتين علي قد ما نقدر كل يوم وبيندهن للوش والرقبة مفيش مشكلة
بيبيض الجلد ويوحد لونه جدا ويخلي الجلد منور بيبرق كده
وكمان كل كام يوم بنعمل تقشير للبشرة بالسكر البني والقرفة مع معلقتين عسل ابيض نعجنهم مع بعض ونبلل وشنا ميه ونمرر الخلطة عليه مع عمل شوية مساج علي خفيف وبعدين شطف بالميه
راحت صديقتي وعملت خلطة الرز ديه بس زودت عليها اضافات من عندها بقي
غلت مع الرز شوية بابونج (من العطار بيتشري)
وضربته معاه في الخلاط وصفت الخليط كويس
وقبل ما تحطه في الزجاجة حطت معاهم شوية ميه ورد(من العطار برضه)
وبس بقت تدهن منه كل ما تشوف الزجاجة وتسيبه ومش بتشطفه لانه بيكون عامل زي التونيك كده بعد ما بينضرب في الخلاط عشان كده قلنا لازم الرز يبقي مهري
وبقت تعمل وصفة التقشير للبشرة كمان مرتين في الاسبوع(بس اللي بشرتها حساسة ماتعملهاش)
والنتيجة انها في ظرف اسبوعين من الاستمرار علي الوصفة
بشرتها الحمد لله رب العالمين بانت فيها النضافةبطريقة مذهلة للجميع
بصوا اهم نقطتين
الرز يبقي مهري عشان يدوب في الميه وتستفيدي بيه هو وميته مع بعض
وكمان انه مش بيتشطف لانه بيبقي خفيف زي التونيك بعد ما بتضربيه في الخلاط مبيقاش فيه رز تقريبا بيبقي ميه كثيفة شوية فبيمسك في الوش
اذا عجبكم الموضوع لاتحرموني من ردودكم الرائعه وتقيمكم الاروع
نغسل الرز قبل أو لا؟
تم التقييم 😉