فقدت الحنان وانا في عز الطفوله آآآآآآه بس آآآآآآآه من حظي 2024.

اشحالكم ؟؟

انا بصراحه من كثر ضيقي حبيت اكتب لكم معاناتي والله بس ابييكم تواسوني ..

من ييت ع هالدنيا و وعيت صرت اعرف من الاب ومن الام ومن الاخ ومن الاخت .. فقدت حنان الاب .. نحن عائلتنا صغيره جدا ..
يوم كان عمري شهرين ابوي توفى .. اتخيلوا يا بنات شهرين .. انا بصراحه من 21 سنه فاقده حنان الاب وامي المسكينة توزجت ابوي وهي صغيره وفارق السن بينهم كبير بس هذا نصيب ورضت به .. انا اصغر العنقود في البيت .. وابوي الله يرحمه عنده زوجه ثانيه قبل امي ،، وهي اتوفت قبل 5 سنين تقريبا وعندنا اخت من الاب ..
يعني الاكبر فينا كان عمره تقريبا 7 او 8 سنين يوماتوفي ابوي الله يرحمه ،، والاخت من الاب بصراحه كانت حابه انها تاخذنا من امي وتبعد امي منا بس امي ابد ما وافقت وهي في الدين بس اتراكض ورى المحكمه وغيره .. وكانت خالتي الله يخليهاا ويطول بعمرهاا عندنا في البيت وماكان عندها عيال بس متزوجه وكانت اتربيينا نحن وفوق كل هذا ساعات كانت اتخاف علينا لان يمكن في اي وقت اختي من ابوي يمكن اتيي في غياب امي وتسوي مشاكل مع خالتي .. وكانت خالتي الثانيه بين فتره وفتره كنا انروح عندهم فزوجهاا كان مدلعني بصراحه وايد ويعاملني مثل مايعامل عياله وكأنه مافيه فرق بينا نحن بس كانت بنت خالتي كانت دايما اتقولي هذا مب ابوج هذا ابوي وانتي ابوج محد .. كنت اتضايق واقعد اصيح ،، فوالله يا خواتي ان ساعات لحد الان يوم اكون نايمه انش(اقوم) من النوم واقعد اصيح لاني كنت اتذكر ابوي .. وانا قاعده اكتب لكم احس اني ابي ادمع بس ماسكه دمعتي لان اهلي جنبي ..

وبصراحه امي تعبت معانا نحن وماتزوجت قالت لآ انا عيالي صغار وزوجي توفى انا ما راح اتزوج و لا افكر في حد وحتى عمي اكثر عن مره عمي يقول حق امي وامي كانت ترفض وقالهاا لو ماتتزوجين حد غريب انا الاولى من الغريب ،، بس امي قالت لأ،، لان عمي واختي من الاب همهم انهم ياخذونا من امي ويحرمون امي ويحرمونا من حنان الاب ..:confused:

امي المسكينه كانت تقول لنا القصه وكانت تبكي :confused:.. ماتتصور اشكثر اكره عمي واختي من الاب لانهم مايخافون الله ويبون يبعدون الام من عيالهاا ،، والله ان مافيهم خير حتى اهل الاب ما اييون عندنا بس اختي من ابوي ساكنه في منطقه قريبه منا فبين فتره وفتره اتيي عندنا بس علشان اذا تبي شئ اتروح ،، قبل اسبوع راحت اشتكت عند وحده من جيرانا وقالت زوجت ابوي ما تبي تعطينا البيت وحرمت عيالهاا من اهل ابوهم ،، ابوي لا حرمتنا ولا شئ بالعكس امي والله رغم كل هذا اتقول لنا هاي اختكم واكبر عنكم روحولهاا في العيد او بين فتره وفتره اتقول اتصلوا فيهاا بس صدقوني نحن انكلمهاا بس علشان ابوي ،، اهل ابوي ما افتكروا فينا .. اضايق يوم حد يقولي وين عمج او بنات عمج او عماتج وبناتهم ،، افكر في الي سووه فين واتضايق .. بالعكس بس امي حاربت لاجلنا نحن .. والله امي تعبت وااااااااااااااااااااااااااااااااااايد واكيد لهاا الاجر عند رب العالمين ان شاء الله ..

حتى يوم كنت اروح المدرسه المعلمه كانت تقول لنا يالله كل وحده فيكم اتقول وين راح اتروحة مع ابوها او امها في الاجازة كنت اصيح واطلع من الصف ،، وكنت ما افكر في اي شئ .. لاني متألمه من داخلي والله العظيم يعلم الله الي بداخلي يا خواتي .. والله صعب علي احس بضيقه واكره عيشتي واقعد اصارخ بأعلى صوتي يوم اتذكر .. وحتى يوم اشوف مثلاً الاب يدلع بنته او ان الاب والام طالعين مع عيالهم ،، كنت اقول الله يخليهم لبعض واتألم من داخلي .. ماتتوقعون اشكثر انا بداخلي الم وضيقه وهم ونكد .. آآآآآآآآآآآآه بس آآآآآآآآآآآه ..
:confused:
ادري ان هذا نصيبي وانا راضيه فيه .. يالله يارب ..:confused: