الاستغلال كيف تتعاملين معه 2024.

الجيران يستغلوها

امس وحدة جايبة ورق عنب ( غرشتين ) عشان نلفهم لان ما عندها شغالة ( من سنة راحت ولا جابو غيرها )
جابت ورق العنب لوحده بدون رز وبقية مقاديره
امي تقول الشغلة ماتسوى بس انا اشوف انها تسوى .. لانها مو اول مرة تطلب … وبعدين اللي ماعندوش مايلزموش .. مو لازم تاكلين ورق عنب على حساب الناس حرام ينكسر ظهرها وهي تلف … مثل امس ماكان عندنا رز مصري وهي الاخت طالبته برز مصري ( شين وقوي عين ) امي راحت شرت !! وانا بموت من القهر
مو عن بخل والله معروفة اني كريمة على نفسي وعلى غيري … بس الحق ينقال هم مو محتاجين وخيرهم ما شاء الله

في رمضان يوصلهم فطورهم من عندنا كامل مكمل من المقبلات للحلى

وطول السنة يتصلون يبون اشياء كثيرة
مرة المكنسة
مرة تسوي لهم كيكة لان عندهم ضيوف
مرة زوجها نفسه في هريس الوالدة
بدون مبالغة بنات يطلبون كل شي … واي شي تتصوروه

ادري الناس للناس بس احس ان استغلاهم زاد عن حده يعني امي المسكينة على كل مشاغلها والتزاماتها وحتى لو ماكان عندها وقت تضغط على نفسها عشانهم … عندنا شغالة بس امي تطبخ وتسوي كل شي بنفسها ومسوية عمليتين في اليدين من فترة وما تقدر تشتغل عليهم لفترة طويلة

هم طيبين وحبوبين بس يستغلون طيبة امي ليش ؟
حتى المكسرات يتسلفوها ( يقلون سلف رغم ان هالشي ما يتسلف مو كتاب هو لو فستان ) وطبعا ما نشوف شي .. هذا مثال بسيط فقط لاغير … وتصوروا يجون يتسلفون خبز … البقالة قبل بيتنا يعني من باب اولى يمرون البقالة قبل مايمرون بيتنا وشارعنا ما شاء الله مليان كل شي
محل خضار
اكثر من بقالة وسوبرماركت وكلها فيها توصيل طلبات
محلات حلويات ومكسرات

اسئلتي لكم الحين يا حلوات

هل تعرضتي للاستغلال من جارة او صديقة او قريبة في فترة من حياتك ؟ ومانوع هذا الاستغلال ؟
ماموقفك من الاستغلال خاصة بعد ما طفح الكيل !!
شنو الحل في نظرك ؟

الحمدلله جيرانا كلهم طيبين بس فيهم استغلال مو طبيعي … طلباتهم ما تخلص ولازم يقولون في بداية كل طلب … بيت الكريم ما يخلى
وام احمد تاج الكل … بس شنو فايدة الكلام

أي والله يا ااختي الاستغلال يبط الجبد.. خصوصاً لمن حد يستغل أقرب الناس لك .. أمك..

الله يعينكم أختي..

بس انتي حاولي مع امك .. شوي شوي تقطع عنهم المعونات..

يعني مرة تعبانه ومرة عندي ضيوف ومرة مشغوله ومرة راح أطلع من البيت وهكذا..

وشوي شوي..

راح يقطعون الأمل والرجا منكم..

وبالنسبة لأسئلتك..

هل تعرضتي للاستغلال من جارة او صديقة او قريبة في فترة من حياتك ؟ وما نوع هذا الاستغلال ؟
بالطبع .. ويا كثرها مواقف الاستغلال اللي تعرضت لها..

مثال لمن رحت تدريب بعد الدراسة .. كنت في أزمة مالية في ديك الفترة ,, عاد كنت أسوي لي ريوق في البيت واخدا معاي للوزارة ..

بس أشوف وحدة كل يوم تجي وتاكل ريوقي عني وأتم طول اليوم بدون ريوق..

تفتح شنطتي بدون إذن .. و تأكل اللي موجود فيها..

لا وهي تضحك.. بكل وقاحة وقلت حياء..

في البداية قلت يمكن ما عندها.. بس مرة من المرات فتحت هي محفظتها جان أشوف الفلوس ماليه المحفظة .. بصراحة انبطت جبدي..

وموقفي أبدا.. ما حركت ساكن..

هذا موقف واحد,,

أما الموقف الثالث اللي تعرضنا له كلنا ( أقصد بيتنا)

كان عندنا عمال يبنون الطابق الثاني.. وأمي كل يوم تطبخ لهم..

يجون الصبح الساعة 6 وبعدها يطقطقون شوي .. عشان تعرف أمي انهم وصلوا..

وتبدأ في إعداد الريوق ( الافطار) .. وياكلونه..

وبعد الريوق يجي وقت الغداء ونفس الطريقة يتغدون ..

بس أبوي لاحظ إن ما في تغيير يجون كل يوم بس البنيان ما يتغيير..

وقام يراقبهم..

واهني كانت الصاعقة عليننا.. بعد الريوق يجي .. واحد من أهلنا اللي ساكن بنفس المنطقة .. وياخدهم بيته يشتغلون .. وبعد آذان الظهر يردهم البيت للغداء .. يدخل من الباب الخلفي للبيت ..

ولمن كلمهم ابوي.. جان يقولون ( هذا نفر يجيب خشب يضرب)..

ياريت جت بس على الأكل … انا مثلك المسألة مو مسألة فلوس بس مثل ما قلت البقالة قبل بيتنا بمسافة يعني اللي بترسله ياخذ الغرض من بيتنا ترسله للبقالة

والمشكلة الاكبر ان الله منعم عليهم …. هم يجمعون بهالفلوس وبريال خبز ما يشترون واحنا نصرف خيرنا على غيرنا !!!

امي ماترضى اتكلم اذا جوا عيالهم خاصة في رمضان … بس احيانا اعطيهم في الوجه
مرة جو يبون خيار ( لاحظي هم عائلة كبيرة فوق العشرين ) يعني اكيد ما بتعطيهم امي حبتين ثلاث
انا اللي فتحت الباب
قلت للولد روح البقالة يبي لكم صندوق خيار

قال يالله رومي يمكن ما فيه ( طبعا عليهم لسان )
قلت له خلاص اذا مافيه مو لازم تسوون سلطة خيار !!!

والله حالة

وياريت جت على الأكل عذوب فيه اشياء ثانية

بس خليها على ربك

انا معاك احسن حل ان الواحد يواجههم مرة ومرتين يمكن يستحون رغم ان مثل هالاشكال وجهها مغسول بمرق مثل ما قالت صديقتي ولا يفيد فيها لا تلميح ولا حتى تعطينهم في الوجه

الله يعين

شي يقهر ويبط الجبد بعد …

اوكي صديقتي معليش بس مرة مرتين مو كل مرة
ذكرتيني بوحدة الله يذكرها بالخير

في الدوام دائما تقول نست فلوسها وقت الغدا واحنا طبعا نضرب على صدورنا
الغدا اليوم علي
وكل وحدة تعزمها يوم

بس السالفة طولت
كل مرة نست فلوسها !!
انا يوم اللي انتبه ان مافيه محفظتي ولا ريال والله اجلس ما اتكلم … يااروح الصراف وهم مشوار او اسكت رغم ان صاحباتي معاي علاقتنا مرة قوية بس استحي

صدقيني ناس ما ينفع معاهم
اقول لك ارجعهم احيانا وامي تهاوشني وحتى الام مثل اللي تلمح لامي في الديوانية اليوم رومي تقول لفلان هالكلام .. قالت لها امي تعرفينها رومي تحب المزح

والله ثاني يوم يجون يطلبون شي ثاني !!

هذا غيض من فيض ترى … والمشكلة مو بس بيت واحد الا عندنا كم وحدة الله يهديهم طلباتهم ما تخلص
امي وابوي ما يقولون شي بس لو تشوفيني انا واختي اللي اصغر مني

نحترق

لان الواحد اذا مقصر على بيته وهو بخير حرام الواحد يعطيه يمتع عياله من جيبه وهو يجمع في هالفلوس
اكل ولبس واغراض للبيت ومشاوير واتكالية واستغلال ما بعده استغلال

ومثل ما قلتي حتى في العمل نلاقي استغلال بشكل مو طبيعي
انا لو وحدة تكح قالوا جيبوا رومي بدلها …. احيانا انبسط لاني اغطي عن ناس مهمة وهالشي في صالحي
بس ان فلانة تغيب وهي مافيها شي وانا اكرف وبعدين ارجع مكتبي والاقي اكوام الشغل على راسي

!!!!!!!