أمهاتي العزيزات كل منا أم وعاملة بنفس الوقت وأكيد كل منا تودي عيالها أحسن الحضانات لرعاية عيالها حبيت أطلعكم على أمر والله إني مصدومة من الي شفته الاسبوع الماضي عيالي ساروا رحلة بالحضانه يلست اترياهم بالسيارة لين ما يوصل باص الحضانة المهم وصل الباص ووقف عدال سيارتي المهم المدرسة الي في الباص ما انتبهت انه حد في الباص نزلت ولدي فديته وكان راجد حسبي الله ونعم الوكيل أول ما شفته فتحت الباب وخديته واتفاجأت المدرسة اني في السيارة وكان عرقان يعني المكيف ما يوصله لانه مرجدتنه عند رويولها حسبي الله ونعم الوكيل المهم وباقي العيال والله انهم رجود ويخلونهم يمشون غمضوني والله المهم يلست اتريا الباص الثاني لانه بني بعدها ما وصلت وأنا اتريا كان يركبون العيال عشان يوصاونهم البيت الفلبينية الي في الحضانة طلغت أول بنتسين وشاله الشنط والله البنات كان يركضن قالتلهم Stop noty وقرصت وحده من البنات في ويهها مسكينة من الالم سكتت الله يغربلها وبعدين خلت البنتين في الباص يلسن يضاربن ويمطن شعر بعض وبعدين شفت راعي الباص قلتله ليش مخلين البنات بروحن قالت هذيل شياطيم ما اجدرلهم لازم المشرف مب أنا هو صح كلامه نزلت من السيارة وسرت عند البنات قلتلهن عيب ماماه لا تضاربن اوكيه حبوبات ويلسن وأنا أراقبهن شوي وطلعت الفلبينية ويابت باقي العيال وركبتهم بكل دفاشة وسارت داخل فيه ولدين كانوا ياكلون مصاص بعدين طلعت من داخل وشافتهم ياكلون مصاص والله شوف عيني يرت الولد برا الباص وفرت عنه المصاص وغسلته من دبة ماي ما ادري مال منوه في الباص وركبته وشوي اشوفها تشرب من الغرشة أنا مصدومة والله ما اعرف شو أوقول ندفع آلاف على عيالنا وما نحصل معاملة زينه ولا مشرفات يراقبن ليش حسبي الله ونعم الوكيل وغير جذا تميت اتريا بنتي شوي والمدرسة مركبة سبع من الطلاب وراء عندها في السيارة لانه الباص الثاني ما ادري وين شو هذا أترك الردود إلكم أنا بصراحة ما بسكت عن الموضوع عندي أدلة وصورة كل شى كانت الفلبينية تسويه في العيال وطريقة معاملتها إلهم حسبي الله ونعم الوكيل فالحين بس يقولون اول الشهر وين القسط طيب انتوا عاملون العيال بكل طيبه تذكرة ومرة رديت الحضانه اودي لعيالي شى وقلت بشوف بنتي الصغيرة نونوه والله اني سمعت صياحها من برا واركض وفتحت الباب واحضنها فديت روحها وقلتلها هذي معاملة الي تسونها عنبو ياهل تخلونها تصيح بها الطريقة ليش قالت انه المشرف تسويها حليب انزين ما شى وحده ثانية تشوفها قلتلها لو حد من عيالج جان صفعتي المشرفه لكن تقولون عيال مواطنين عادي برايهم حسبي الله ونعم الوكيل ….. شو رايكم في إلي صاير؟؟؟
انا توني مسجله ولدي في الروضه وبيدخل ان شاءالله شهر 9
ليحين ماجررررربت هالاشيا وان شاءالله ماجوووف ياااربي
صاجه ندفع مبالغ والله عشان يرتاحون اليهال
الله يكون بالعون
اقولج شي غناتي انتي غيرين الحضانة الي فيها هالفلبينيه وتاني شي
القانون بيعاقب المدرسة الي تضرب اليهال في وجوهم وهيج شي
اقولج شي انتي تدفعين مصاري حقج علشان تعلمين بنتج وابنج في الحضانة ويرتاح عقلج من التفكير
لازم تروحين وتحكي مع صاحب الحضانه احسسن شي
اللهم يهديها يارب
ومستغربة من الموقف اللي شفتيه انتى بلغي ادارتهم الرئيسية وخبريهم هم مهتمين جدا مايتساهلون في هالامور و مرة متصلين على مسويين استبيان رضى اولياء الامور وسألوني عن كل التفاصيل حتى عن اشياء انا ماكنت منتبه لها وهالشي خلانى ارتاح اكثر معاهم وعطوني رقمهم المجاني عسب اتواصل معاهم في اي وقت حتى ادارة الحضانة اذا غاب ولدي عنهم دوم يسالون عليه،بس ولدي يروح بالباص الصبح وامر اخذه اخر الداوم والحمد لله ماشفت شي يخوفني بالعكس فى الاول كنت خايفة ومترددة اذا اخلى ولدي فى حضانة ولا لاء بس دايما اتابعهم على الكاميرات وتطمنت اكثر واكثر و اطلب منهم تقرير يومي ومستانسة منهم الصراحة وسجلت معهم ولدي الثاني للسنه اليديدة، انتى كلميهم واتطمنى على عيالج وان شاء الله ماتشوفين فيهم شر نسأل الله يحفظهم لنا
الصراحه انا بنتي مسجله بهالحضانه الها سنه ونصف والله ماشفت الاكل خير
وايد معاملتهم زينه
ومثل ماقالت اختنا غلاموريوس والله دايما يسالون على اليهال ودايرين بالهم عليهم وايد
واذا غابت بنتي يتصلون ويتطمنون عليها ويرسلون معها بشل يومي اوراق كل شي عملته حتى شو كلت
والله وايد زينه الواحد لايحكم على شي من موقف واحد
يا اختي shamaa انتي صادقة في وصف الوضع السيئ في الحضانة
لان الاخوات:
( غلاموريوس – مريم البتول طواها- فزة الصباح- موحة خالد)
ما سجلوا في المنتدى الا عشان يردوا على موضوعك
(كلهم سجلوا في نفس اليوم الواضح من تاريخ التسجيل!!)
مالهم الا مشاركة واحدة او 5 مشاركات لاول اخت
واضح انهم من اصحاب الحضانة و خافوا جدا على سمعة الحضانة السيئة
اعتقد تحذيرك جدا مفيد للامهات انهم يبعدوا عن هادي الحضانة اللي همها الكسب المادي فقط !