20 طريقة لتقليص ميزانية حفلة الزواج مع RoOoOmy 2024.

تابعوني

1- بدل وضع علب العصير الكبيرة على طاولات الضيوف ( البعض يسوي هالحركة ) خلي عاملات يدورون على الضيوف بصواني عليها كاسات عصير وكل ضيفة راح يكون من نصيبها كاس بدل ما كل طاولة تفتح علبتين او ثلاث علب كبار ولا يشربها أحد

2- اشتري العصير والشوكولاتة والبيتي فور او الحلويات المتنوعة ( بقلاوة وكنافة ) والفطائر بنفسك ولا تعتمدي على خدمات تجهيز الأفراح … لا تنسي انها راح تطلب عليك مبلغ اكبر من المبلغ الأصلي عشان عملوتها .. يعني انتي لو طلبتيه بنفسك مباشرة من المخبز او محل الحلويات راح توفري العمولة تقدري تطلبي منهم خصم خاص

3- دوري على محلات البيع بالجملة … بخصوص العصير ، علب المناديل ، وغيرها من اللوازم اللي تحتاجينها للزواج أو للحفلة بعد او قبل الحفلة الرئيسية ( الجملة دائما ارخص )

4- لو قررتي تقديم فواكه معينة في بوفيه الزواج .. لا تختاري فواكه ما تتوفر في موسم زواجك عشان ما يكلفك طلبها مبلغ اضافي … دائما اختاري فاكهة تتوفر في موسم زواجك وبشكل عام كل موسم راح يكون فيه خيارات عديدة من الفواكه

5- اذا جيتي تختارين قائمة الأكل من نفس الصالة او الفندق او حتى بالنسبة للعرايس اللي يسوون زواجهم في البيت … وحبيتي تضيفي مأكولات بحرية مثلا .. بما انها غالية لا تختاريها كوجبة رئيسية لانها راح تكلفك كثير .. اطلبيها كمقبلات وراح تكون بكمية اصغر وتكلفة أقل في نفس الوقت

6- اذا حبيتي توزعي شوكولاتة او مكسرات معلبة او حتى هدايا المعازيم لا تتركيها على طاولة وكل ضيف ياخذ منها ( لأن في ناس طماعة راح تاخذ اكثر من حبة ) بدل هذا .. اطلبي من قريباتك او عاملات متخصصات انهم يدورون يوزعون الهدايا والشوكولاتة في سلات او صناديق حلوة على الضيوف وبكذا تضمني ان كل ضيفة راح تاخذ حبة وحدة

7- اذا حبيتي تضيفي ورد على الطاولات او للأطفال اختاري ورد من نوعية ما تكلفك كثير و تتوفر طول السنة مثل ال daisies وال carnations شكلهم حلو ومع اضافة وردة او وردتين من نوع ثاني يطلع شكل التنسيق حلو والتكلفة اقل بكثير من بقية الأنواع

8- بدل ما تستعيني بخدمة تجهيز وترتيب الأعراس اختاري وحدة من صديقاتك أو قريباتك تملك لمسة ابداع وحس فني عالي عشان تساعدك في تنظيم الحفلة منها توفري شوية فلوس ومنها تكوني متأكدة انها راح تسوي كل اللي في بالك بدل ما تتورطي في شركة تنظم لك زواجك بطريقة غير اللي انتي تحلمين فيها

9- بالنسبة لهدايا المعازيم … دائما الجأي لل hand made يعني الصناعة اليدوية لأنها ارخص اولا وبعدين راح تفيدين بنات بلدك وراح تكون أحلى وأرخص من الجاهز لأنها خصيصا لك مو شي منتشر في السوق واذا حبيتي توفري اكثر وانتي فنانة سوي الهدايا بنفسك بمساعدة اخواتك وقريباتك وصاحباتك وابدأي قبل الزواج بفترة طويلة عشان عامل الوقت

10- عنصر أساسي في تقليص تكاليف الزواج … اختيار الموسم المناسب … الزواج في موسم مزدحم مثل فصل الصيف راح يكلفك اكثر لأن الصالونات والصالات وجميع الخدمات راح تكون أغلى بسبب الاقبال الكبير عليها … اختاري موسم الشتاء مثلا او وسط الدراسة وراح توفري مبلغ لا بأس به وعلى الأقل تضمني انك ماراح تلاقي زحمة في الحجوزات

11- اختاري المدعوين بدقة … وحاولي تكون الحفلة للمقربين من الأهل والاصدقاء والمعارف يعني مو تروحين تعزمين 1000 شخص وتقولين ابي حفلة غير مكلفة

12- الأشياء اللي تقدري تستلفيها من صديقاتك لو اهلك لا تترددي مثلا اكسسوارات للطاولات او اكسسوارات للزفات بدل ما تشتريها أو تستأجريها

13- جهزي قائمة بالهدايا اللي تحبيها منها توفرين على اهلك وصديقاتك الوقت وهم يدورون لك هدية مناسبة ومنها توفرين على نفسك من شراء مستلزمات للزواج والبيت

14- بدل ما تستأجرين سيارة خاصة للزفة … اطلبي من زوجك او اخوك يشوف احد من اصحابه او اصحاب اصحابه عنده سيارة حلوة وتسلفوها ( كلها ساعتين وهي راجعة ) ولمن ترجعوها لا تنسوا شكر صاحب السيارة وهدية بسيطة مثلا

15- اذا كان في نيتكم السفر بعد الزواج .. خططوا قبلها بفترة ودوروا عروضات خاصة لشهر العسل بدل ما تحجزوا في الوقت الضايع وتخسروا مزايا الحجز المبكر للعروسين

16- لو حبيتي تستخدمي شموع على الطاولات بدل ما تسأجريها من محل اشتريها بنفسك حتى لو كلفتك بس تقدرين بعدين توزعيها على اهلك وصاحباتك وتخلي شوية منها في بيتك وانتي المستفيدة في النهاية

17- بطاقات الدعوة … نرجع الى الصناعة اليدوية فيها خصوصية اكثر وراح تكون مميزة لأنها مصممة لك وفيها توفير اكثر من الجاهز

18- اذا كنتي مستخدمة كمية كبيرة من الورد في الحفلة … بعد انتهاء الحفلة لا ترميه … وزعيه على مستشفى او دار اللعجزة … على الأقل ماراح يذبل بدون فايدة

19- بدل ايجار عاملات خاصات بتوزيع العصير والشوكولات وتنظيف الطاولات … اطلبي من قريباتك وصاحباتك انها تسلفك شغالتها لكم ساعة ولبسيهم لبس رسمي وبكذا توفرين 5000 بدل خدمة

20- آخر شي وهو من الأشياء المهمة في الحفلة .. فستان الزواج لو انتي مقتنعة انك ماتبين تفصلين .. الايجار احسن لك خاصة ان فيه محلات تصمم لك فستان انتي تلبسيه لأول مرة وبنظام الايجار يعني فستان جديد ما حد لبسه قبلك وايجار

ان شاء الله تستفيدون من الأفكار هذي

RONITTA9003

business_girl

بنــت النــور

أسعدني مروركم اخواتي … وردودكم الحلوة

كلكم ذوق

فكرتك حلوة … ولاحظت ان اصحاب الزواج اذا وزعوا اي شي على المعازيم يكفي ويزيد على العكس من انهم لو حطوا الهدايا أو العصيرات على الطاولة راح تصير لخبطة وكل واحد ياخذ اكثر من حقه وبكذا ينقص العدد وتصير فشيلة

انا الحمدلله زواجي كان روعة لأن كان فيه تنظيم والعصير والهدايا كلها وزعناها احنا وما خلينا شي على الطاولات

اسعدني مرورك