صباحكم/مساءكم…كله عطر وفل وربي يرزقكم بركته …
اللهم اميييين
لكن خواتي …العرس الاماراتي …على عاداتنا نحن …يعني عايلتي…
وطبعا هالعادات تفرق من عائله لعائله
وتفرق من منطقه لأخرى ..ومن امارة لأخرى …
حسب العادات اللي يتوارثها الشخص…
وانا بتكلم عني كشخصيا …يعني تجربه شخصيه واتمنى انها تعيبكم 
وان شاء الله تكون تجربه ممتعله لكل العرايس والبنوتات
الخطوبه
بما اني شفت ريلي قبل الخطوبه …لأنه من نطاق العائله ..بس من نسايبنا يعني ما جد رمست وياه ولا حتى كان بينا سلام …
بس بالعاده ان الخطيب ايشوف خطيبته يوم الخطوبه …وتكون محجبه وبعبايتها يعني بس ايشوف ويها ..وبجود أهلها واحيانا اهله …طبعا موقف محرج ولا تحسد الوحده عليه …
صارلي الموقف لما خطبني واحد غريب مو من ضمن العايله ..ويا بيشوفني وطبعا ما شفت ويهه من الاحراج لأن العايله كلها يالسه اطالع واهله هم كانو موجودين يعني موقف محرج …ويخلي الوحده طماطه
بس ما صار نصيب والحمد لله
نرجع لموضوعنا…
اللي هو الخطبه …
بعد ما تكون الام شافت العروس وخواته طبعا ^^…تكلم ابو الخطيب عسب يسيرون يخطبون البنت رسمي من ابوها أو ولي أمرها …
…
وايسير الأب مع اخوة المعرس والمعرس وايرمسون أب البنت …وايكون ع درايه قبل…
طبعا ارمس عن نفسي ^^
لأن كل العايله كانت تدري ان اليوم بيخطبوني…
ويحددون المهر …
وكان مهري 20 ألف درهم مقدم و30 الف مؤخر ..وهذا اللي بالقانون اللي صدره الشيخ زايد الله يرحمه… ويغمد روحه الجنه …قولو امين
ويتم تحديد يوم الملجه
طبعا المعرس ما يرمس العروس …لين يملج عليها ..(بس ريلي كان ايوصل لي سلام ويا خواته بحكم انهن ربيعاتي )
ووصلنا للملجه
بعض الناس ايسون حفله للملجه بيوم غير عن يوم الملجه وهذولا الفئه الغالبه …
وبعض الناس ما ايسوون حفله الا شي بسيط بسبة ان العرس يكون قريب ..وما في وقت للحفلات …والمخاسيير …وهالشي انا ما اعترف فيه …الا اذا كان المعرس غني…
انا عن نفسي بحكم ان عرسي قريب ما سويت حفله بقاعه ولا شي…
بس حفله بسيطه بالبيت هلي سووها عسب يفرحون فيني ويفرحوني…
وكان كل شي بسيط …وكان بنفس يوم الملجه ..
طبعا بالملجه يعطى المهر للأب بعد ما اتم الملجه …
ويسأل المليج العروس اذا موافقه ولا لا…
وطبعا عقب ما اتوقع العروس لأنها اخر وحده …. تسمعون التيبيييب…ما ادري كل واحد بلهجته شوا تسمونها خخخخخخ ^^
وطبعا البنات كلهم يسلمن والحريم عالعروس وايباركن لها..
انا عقب الملجه وقبل لا اوقع حضنتني امي وجان اصيح هههههه
طبعا معروفه بالعايله اني حساسه واصيح عالدقه فكيف اني خلاص صرت حرمه
احم احم
ههههههههههههه
وايد اسولف صح
نرد لموضوعنا
وبعد ما يتعشون الناس …الرياييل والحريم …ويكون العشا من أهل المعرس …
والفواله (الفواكه …والحلوى )
طبعا على انغام المسيقى ورقص البنات بالعايله تدخل العروس على المعازيم …
انا بس كانو هلي ..وبيت جيرانا …لأنهم هم أهلنا
وكنت مستحيه ….وويهي احمر …ومفتشله
وطبعا لازم ينثرون البيزات ..
عاد تعالو شوفوا ليهال اللي بالعايله …
صرت كأني تلفزيون وهم ايطالعوني ….لايف
خخخخخخخ
ويوله وقت النثور هههههه يلقطون البيزات …ما اعتقد توصل الارض حتى ..
ربي ايحفضهم
وبعدها يدخل المعرس وهو كاشخ احم احم
وهني صدق فشله …لأن الموقف محرج …
وكنت لابسه فستان بسيط وناعم …
بس فضيحه أو مره ايشوفني جي …
يعني احراج …وما كنت ابيه يدخل …
لأني ما احب هالموقف …يعني الناس تطالعنا …
هههههههههه
يصرقون أي نضره تكون بينا
يعني صدق فشله من القلب
والتصوير مول ما وقف من ملجت لين سارو الناس
وتميت شوي وياه بروحنا …
طبعا محد رمس …الا كمن كله قالها …عيب …ما ايخبرون
وانا يوم افتشل اضحك ..
ما اعرف اسوي شي ثاني غير الضحك ….
هههههههه
فشله من الخاطر…
الحين يقول بخاطره اخاف يالس اقول نكته وانا ما ادري…
هههههههههههههههههههههه
وعقب سار بيتهم
وكان ماخذلي هديه تلفون قبل الملجه …
ومن طلع من البيت اتصل فيني ..
بس ما طولت يعني بس لين وصل بيتهم ..
لأن الوقت كان متأخر …
وكان فيني رقاد من الخاطر
وبسخلصت الملجه
وأيامها كلها عسل
وخاصه وقت الزياره
تكون أحلى الأيام
وناسه …عقبال كل البنات يارب
والحين اني لترتيبات الجهاز
وكانت زهبتي 100 ألف …
اشتريت ب 40 الف ذهب وسوع
والباقي قسمته
سويتلي جدول والله انه حلو ومرتب عالاخر ….وصدق ما تعبت ولا شي ولا ندمت ع شي …وترتب جهازي بالكامل …
اللي تبيه لا يردها الا الكيبورد انتو بس تدللو يا عرايس
وعاد من خلصت جهازي ما بقى الا الاهتمام بالبشره …
وعاد اختكم الحلوه يهمها الترتيب
فسويت لي جدول حلو ونسقت كل شي فيه بالايام ..
والعنايه بكل شي بالجسم
^^
والحين العرس
طبعا بداية بالحجوزات
يعني هالاشياء وايد مهمه ..
وكنت اتابعها ويا ريلي واهله
وكنت اتابعها ويا ريلي واهله
من صالون لقاعه ..لكل شي …وكان من ضمن الجدول ^^
والحين خلونا بالاساس
طبعا العروس ما تظهر من بيتها بشهر العرس الا للضروره ..يعني الصالون ومن هالسوالف …
وقبل العرس بأسبوعيل تحط ع جسمها صندل العرايس وهو روعه للجسم ..نعومه ونظافه وبياض
يعني كلمة رهيب شوي عليه واتم حاطته طول اليوم تستعمله ما بين ثلاث الى اربع مرات باليوم..
واهم شي ما تنسى الترطيب…
وقبل العرس حسب ترتيبها … اتشقر جسمها وعقب اتحف وعقب اتسوي حمام مغربي …
وبعدين تتحنا..
وعندا العروس تحني ايدها كلها وريلها لين الركبه
وأفضل شي ان اتييب المحنايه البيت عن العين والحسد وحلاتها بيمعت البنات ^^
وطبعا البنات يرقصن ومسويات حفله
ههههههه
انا حجزتلي محنايه اتيني البيت ان شاء الله حق عرسي…
وحتى الحمام المغربي سووه بالبيت أأمنلج
انا بعد حجزتلي وحده اتسويلي حمام بالبيت
واحينه ينا ليوم الحنا
وهو قبل العرس بيوم
وهني العروس تلبس فستان ناعم بقصه عند الخصر وعقب يكون نافش..ويكون ناعم وايد يعني ما ايكون عليه شغل وايد
ويكون لونه بين الاحمر او الاخضر او الذهبي..
يعني كل وحده وذوقها
انا اخترت ذهبي ويا بنفسجي ..طلع حلو
وفي بنات يأجرن
انا عن نفسي فصلت …
وتلبس العروس ع خصرها حزام من الذهب (الحجب)
وفي صدرها قلاده من الذهب..(المرتعشه)
وتفرد شعرها يعني اتخليه مفتوح
وتلبس عليه الذهب (الطاسه)
وتلبس في ايدها أساور الذهب (الحيل)
أو الكف
يعني ع حسب ذوق الوحده
وتحط مكياج خفيف وعربي..
يعني ما اتكثر من الميك اب
وبهاليوم ادق الطقاقه ..يعني وناسه ^^
وفي بيت المعرس هم يكون الحنا وايحنون قاعة رجل المعرس
والمميز بها الليله .. ان اصدقاء المهرس كلهم يحضرون العرس وطبعا ايبون رزف أو يوله والشباب يرقصون وايولون ويا المعرس… وناسه
وبعد كل واحد من ربعه واخوانه واهله يساهمون بشي من البيزات كهديه ومساعه لمعرس لبدأ حياه جديده
وطبعا ويا الدق واليوله ايزفون الحنا من بيت احد اقارب المعرس او اصدقائه لين بيت المعرس ^^
ويبدا الحنا
ويتحنا ويا المعرس اقرب ناسه واصدقائه
اللي يحبون الحنا ^^
بس المعرسين ما يتحنون عسب ما ايبون عدايل حق حريمهم ….
هههههه سوالف عيايز
ما ادري اذا نسيت شي
ويوم العرس …اليوم المميز لكل بنت
يعني من اتنش من الرقاد وتاخذ لها شاور حلو
وتتريق ريوق ملوك
ههههه عيبني الوصف
وتلقي نضره ع اخر اغراضها (نسيت اقولكم ان زهاب العروس ياخذونه اهلها وايودونه بيت ريلها وايرتبونه واتخلي حق عمرها شنطه حق يوم العرس وحق السفر ..يعني تكون مجهزه اغراض السفر لو بتسافر )
بعد ما تتغدا وتاخذ لها قيلوله عسب تكن مرتاحه
تاخذ لها حمام ثاني ..وترطب جسمها وتتعطربافضل العطور ودهن العود
واتسير القاعه واتكون عندها غرفه خاصه
وعقب ما توصل الممكيجه ..واتسويلها المكياج والتسريحه
تلبس فستانها الابيض واترتب الطرحه
وعالساعه 10 تدخل العروس القاعه ع انغام ناعم هاو ابيات شعر
واين البنات والاهل والاصدقاء ايسلمون عليها قبل لا يدخل المعرس
وعالساعه 12 يدخل المعرس ويا ابوه او ابو العروس او احد اخوانها
وايسلمون عالعروس
وايتصورون وياها
وعقب تتغطا العروس ويدخلون اخوان المعرس وايتصورون وياه …
وعقب ايزفون العروس وايسون مسيره حلوه من القاعه لين بيت العروس …
ومبروك للعرايس
واليوم الثاني ايزورون أهل المعرس في بيته …
وتلبس العروس جلابيه تكون فخمه وراقيه
وايتغدون في بيت اهل المعرس
(هني وعافيه)
وبس
وان شاء الله استمتعتو وياي بالموضوع
ألف مبروك
ويحلات العادات الخليجية وين ماكانت .. فديت الخليج كله
والله يبارك لج ويهنيج يارب
ويحلات العادات الخليجية وين ماكانت .. فديت الخليج كله
والله يبارك لج ويهنيج يارب
اسلوبج رووووعة و وصفج ارووووع … عشت وياج كل التفاصيل … الف مبروك حبيبتي
 |
اقتباس |  |
 |
المشاركة الأساسية كتبها بحرينية وأفتخر  |
 |
 |
| ألف مبروك ويحلات العادات الخليجية وين ماكانت .. فديت الخليج كله والله يبارك لج ويهنيج يارب |
||
 |
 |
الله يباركلج حبووووبه …
تسلمين فديتج
وربي يرزقج الخير ..اللهم اميييين
|
اقتباس | |
|
المشاركة الأساسية كتبها nanoosh84 |
|
|
| اسلوبج رووووعة و وصفج ارووووع … عشت وياج كل التفاصيل … الف مبروك حبيبتي | ||
|
|
ربي ايباركلج الغلا….
شكرا غلاي…:o
واتمنى اني وصلت لقلوووبكم
ربي ايوفقج ويسعدج ..اللهم امييين
ماشاء الله تبارك الرحمن
وصف وتعليق في منتهى الروووعه<<يسلمووووو
وصف وتعليق في منتهى الروووعه<<يسلمووووو
سبحانك اللهم وبحمدك أستغفرك وأتوب إليك
الف مبروووووووك وموضوعج يونس حلو
ماشاء الله روووووووووووعه وصفك….وعطيتيني معلومات جديده….مع اني خليجيه….
ويوم الحنا احسه مررررررررررره رووووعه …بعض العوايل بالسعوديه يسون حنا وبعض العوايل مايسون ….وعايلتنا مايسون ليلة حنا………
وفي شي غريب اول مره اعرفه ….الحنه الى الركبه؟
وبالنسبه ليوم الشوفه …لازم المعرس يشوف العروس من غير عبايه وحجاب….يعني لازم يشوف الشعر….
والله يوفقك ويرزقك الذريه الصالحه…..
روووعه والله يوفقك ويتمم زواجك على خير
واعجبني تعلقياتك الحلوه خخخخ
بس في شي استغربته واول مره اسمع عنه الي هو
واعجبني تعلقياتك الحلوه خخخخ
بس في شي استغربته واول مره اسمع عنه الي هو
|
اقتباس | |
|
|
وفي بيت المعرس هم يكون الحنا وايحنون قاعة رجل المعرس
|
||
|
|
صدق يحني المعرس رجله 😮
وبالتوفيق لي ولك ولكل العرايس:o
ماشاء الله اسلوبج جدا حلو وشيق ورغم انه احنا خليجيين وعاداتنا متشابهه ومتقاربه وايد لكن سبحان الله بموضوعج هذا عرفت معلومات اول مره اعرفها مثلا انه المعرس يتحنا احنا عندنا في البحرين بس العروس وطول الحنا غالبا ما يكون لللركب يعني على حسب رغبة العروس بس غالبيتهم يخلونه وسط لا طويل حيل ولا قصير
واخر شي الف مبروك حبيبتي ربي يسعدج ويهنييج ويسخر لج زوجج ويخلييكم لبعض طول العمر ياربي وتستاهليين احلى تقييم لانه موضوعج مو لمجرد الكتابه صراحه موضوع شيق وينقل لنا تصور عن عاداتنا الخليجيه والعربيه في المناسبات المهمه مثل الزواج