علمتني الدنيا
لاتحكم على الكيكه قبل تذوقها
فعلا ياما شفت ناس وتسرعت بالحكم عليهم وفي الأخير طلعوا فشوش
مره تعرفت على وحده واعجبتني مره وتعلقت فيها بشكل خيالي
توقعتها طيبه وعلى نياتها وكنت دائما اقول انها رائعه ومثاليه
لكن بعد فتره بانت الحقيقه لما عاشرتها وتخالطت انا وياها طلعت على حقيقتها
كان عليها قناع البراءه والطيبه وانكشف المستور وشفت الذيب اللي بداخلها
ومره تعرفت على وحده بمستشفى وكانت تتصل علي واطنشها وتسرعت بالحكم عليها
وتوقعت انها مثل صاحبتي الأولى منافقه وكذابه ولسانها طويل
لكن جاء يوم ضاقت بي الدنيا واتصلت فيني بالصدفه هذي البنت ورديت عليها
وقعدنا نتكلم اكثر بالساعات بعدين صرنا نزور بعض ومن اول مازارتني جابت لي هديه
وماتروح مكان الا تجيب لي معها مثل ماتجيب لنفسها وماتقصر معي بشي انسانه ذوق وقمه في الروعه ماشاء الله تبارك الله
اما صاحبتي الأولى ياربي لك الحمد علاقتي فيها سنتين وبحياتها ماقالت لي حتى كلمه حلوه
مدري وش مصبرني عليها ذيك الفتره الحمد لله اني تركتها
علمتني الدنيا
الناس مخابر ماهم مظاهر
اي والله احنا ننخدع بالمظاهر من برا الله الله ومن جوى يعلم الله
ياما ناس نظيفين من برا ويلقون لق مثل الثريا لكن قلوبهم وصخه وسوداء
عندي خالتين وحده تاجره مره مره وعندهم فلوس وخير ماشاء الله
لكنها سبحان الله بخيله جدا وكلامها شين واللفاظها بذيئه وماتستقبل احد في بيتها
وماتساعد احد ولا حتى بكلمه حلوه ودائما تتريق على الناس وتتشمت فيهم وتتريق على فقرهم وقله الماده عندهم
وفيها تعالي وكبر ودائما تجرح الناس بالكلام وحتى اهلها اذا زاروها في بيتها ماتفرح بأحد ولا ترحب بأحد
ولا تكرم الظيف ولا حتى تصب لك فنجال القهوه
وبس تتكشخ وتتزين وتلبس من الألماسات والمجوهرات وبحياتها ما تهدي لحد شي حتى لو مسواك
تسافر وتلف العالم ماتجيب شي لخواتها او حتى امها لكنها تهدي
الخواتم والذهب لصديقاتها وربعها
اما خالتي الثانيه يالبى قلبها
فقيره جدا الله يرزقنا وياها ولا يحوجنا للناس والمسلمين اجمعين
خالتي هذي ساكنه في حي فقير جدا جدا ساكنه في بيت طين وحالتها صعبه
وزوجها مسجون وبنتها مطلقه وجالسه عندها هي وعيالها وعندها قشله بزارين الله يكون في عونها ويرزقها
ومع ذلك تفرح بالناس وتهلي وترحب وتشيلك فوق راسها وكلامها يهبل وفعلها يهبل
كريمه جدا واللي معها موب لها ومع فقرها وقله الماده عندها الا انها تهدي وتوجب الناس وماتقصر مع احد
وماشاء الله على ان بيتها صغير وهم فقراء الا انو كل الناس يرتاحون عندها ويمبسطون معها
ولا يحبون يزورون الا بيتها
اما خالتي البخيله محد يحب يزورها ولا احد يرتاح عندها
مع انو اي احد يشوف خالتي التاجره يقول وااااو هذي اكيد ذربه وقلبها طيب وتساعد الناس
وخالتي الفقيره اللي يشوفها اول مره يقول وشذي وع اكيد انها قذره ولسانها طويل ولا عندها دبره
مع انو العكس صحيح
علمتني الدنيا
مو كل من يضحك سعيد ومسرور ولا كل من يبكي دموعه حزينه
ايه اما هذي فعلا
مشكله الناس يوم يشوفون احد يضحك وينكت ومبسوط يقولون عنه ايه مرتاح وش عليه
مع انو العكس صحيح
كانت معنا ايام الدراسه بنت عسل تنكت وتضحك وتستهبل وكل بنات الفصل يحبونها
وحتى المعلمات يستانسون عليها ويوم تسولف الكل يسمع لها وسواليفها تجنن كلها خفه دم
ومره قالت لها وحده انتي دائما تضحكين مافي هم في بيتكم ؟؟
مسكينه كسرت خاطري
عاد لو تدرون عن وضعها تكسر الخاطر ابوها غصبها على الزواج من شايب
وتزوجته وتطلقت بعد شهر ويوم خلصت عدتها زوجها ابوها شايب ثاني وقعدت معه شهرين وتطلقت
وعايشه عند حرمه ابوها تعذبها ليل نهار واخوانها وخواتها بس يظربونها ويتحكمون فيها
وعايشه في البيت بس تخدمهم
المشكله انو كل البنات كانوا مفكرينها سعيده بحياتها وهي مسكينه تسلي نفسها بالضحك والوناسه
علمتني الدنيا
ديني للأفضل دائما
اصلا مابينفعني الا عملي الصالح وديني وش ماخذين من الدنيا
والله محد بيدوم لك لا امك ولا ابوك ولا احد عشان كذا ياحبيبتي نوعي بعباداتك وتقربي لله
وتزودي من الدنيا ترا محد بيدخل معك في القبر انتي وعملك بس
علمتني الدنيا
خير الأمور الوسط
هذي مايبي لها كلام
خذ من كل شي الوسط والله بترتاح
كنت اتعب من الناس ومعاملتهم السيئه لي لاني طيبه معاهم
بعدين قلت خير الأمور الوسط ومن جد ارتحت كثير
حتى بأكلي اكل وسط
بنومي انام وسط ما اسهر ولا اطول بالنوم
بكل شي وسط حسيت براحه
علمتني الدنيا
الحلال مايضيع
اي والله هذي اصلا قاعده عندي اي شي اشتريه بفلوس حلال والله والله مايضيع حتى لو فقدته بفتره لابد اني
اللقاه
مره فقدت حلق اللماس كنت احبه موت ودورت عليه بكل مكان مالقيته ويأست لكني اقول في نفسي الحلال ما يضيع
اكيد بلقاه
وفعلا لقيته بعد 8 شهور بجيب الشنطه
لكن اذا فلوسه ربا او حرام مابتتهنا فيه اصلا
علمتني الدنيا
السر اذا كثروا حراسه ضااااااااااااع
فعلا لو انتي عندك سر وقلتيه لأكثر من شخص مع الوقت رراح ينتشرويضيع
اذا عندك سر احتفظي فيه لنفسك ولا تقولينه لحد
علمتني الدنيا
يوجد دائما من هو اشقى منك فأبتسم
الحمد لله اوقات تضيق بي الوسيعه واحس اني انا الوحيده اللي مهمومه ووووو
ومافي احد مثلي وانا حظي سيء وووو
لكن الحمد لله يوم اشوف اللي اقل مني اقول الحمد لله
علمتني الدنيا
اللسان الطويل دلاله على اليد القصيره
اي واحد سليط لسان ومؤذي ويجرح الناس ويغلط عليها ويسب ويشتم
انسان عطائه قليل ما يساعد احد ولا يضحي عشان احد
وعديم المسؤليه مايعرف يسوي شي ولا ينفع بشي
وغالبا يكون هرج بس يعني مجرد كلاام ويوم تجي للصدق ماعنده ماعند جدتي
اعوذوا بالله منهم
علمتني الدنيا
عيش مدام انك عايش
لا تشيل هم بكره ولا تحزن على الأمس
اطلب الله قوت يومك هذا وخلي بكره لبكره
لاتضيع ايامك على الندم والحسره على مافات
ولا تشقي نفسك بالتفكير في الغد
يمكن تموت قبل تشرق شمس الغد
اطلب الله واستغفر وعيش حياتك بما يرضي الله
علمتني الدنيا
الظربه اللي ماتكسر ظهرك تقويك
فعلا الحمد لله صارت لنا مشاكل ومصايب ياربي لك الحمد والشكر
ما متنا الحمد لله عايشين
صارت لي مشاكل كثير مع اهل زوجي كتبت البعض منها في المنتدى لكن المشاكل الأكبر ماذكرتها
واحتفظت فيها المشاكل وصلت لدرجه لاتوصف وش اقولكم حتى انهم كلموا امي وابوي وغلطوا عليهم وسبوهم
صحيح اني تأثرت وزعلت وتعبت لكني بالمقابل عرفت كيف اتعامل معهم
وعرفت حقيقتهم وصرت اتجاهلهم ولااعبرهم لين رجعوا مثل الكلا 000يعتذرون ويتأسفون
وطنشتهم ولارديت على احد فيهم وارتحت كثير
والله اني تقويت عليهم اول استحي ارد بحرف ولا حتى اقول لا
واللحين ماعندي فيهم
علمتني الدنيا
اتعلم من اخطاء غيري
فعلا تعلموا من خطاء غيركم اسرع طريقه للتعلم هي انك تتعلم من خطى غيرك
اعرف وحده الله يهديها تكذب على زوجها وتخدعه حتى لو يسألها عن بلوزتها تقوله شاريتها ب500 وهي اصلا سعرها
ب50 ريال ومع الوقت زوجها اكتشف كذبها وماعاد يصدقها لو تحلف عالمصحف
تعلمت اني مهما كان مااكذب على زوجي لو وش مايكون
علمتني الدينا
الطيب احسن
اي والله دائما ابدء بالطيب لو مانفع شد شويه
احيانا احد يغلط علي واعصب وازعل واروح بزاعق عليه واهاوشه بعدين اقول لا خليني اتعامل بالطيب معاه اول
لو مانفع وريته العين الحمراء وفعلا
اول ماتزوجت كان زوجي عصبي وما ينطاق وكان دايم يصارخ علي بأتفه الأمور
واجي بزاعق عليه واقوله احترم نفسك انا ماني عبده ابوك لاترفع صوتك علي ووو
بعدين ارجع اقول في نفسي لا خليني ابدء بالطيب اول لو ما نفع اتخذ اسلوب ثاني
وفعلا قلت شوف ترا ما ينفع تزعق علي هذا اسلوب
مش حظاري وانا زوجتك ولازم تكلمني بأحترام الزعاق والصراخ ما بيفيدك هذا سلاح مع الوقت بيضرك
وبينقلب عليك
علمتني الدنيا
الدنيا اخذ وعطاء
لو تعيش مع شخص بس يأخذ ما بتقدر تتحمله بعدين
ولو انت شخص بس يعطي مع الوقت بتتعب
عشان كذا دايما تعامل مع شخص يأخذ ويعطي
كنت اعرف وحده انا نيه بس تفكر في نفسها ولاتبي احد يأخذ عليها الجو
تبي هي تسولف تبي هي تطلع احسن وحده تبي هي اللي تفضفض وتشكي تبي هي اللي نعطيها ونخدمها
ويوم اجي بسولف تصرفني اجي بفضفض لها وبقولها عن مشاكلي تقول انا مشغوله باي
يوم اجي ابي منها خدمه او ابيها تساعدني بشي تتعذر بعذر اقبح من ذنب
تبي بس تأخذ
اخر شي سحبت عليهاااا
والله طفشت
والحمد لله ربي عوضني بوحده اهديها وتهديني اساعدها وتساعدني الحمد لله
مو بس بالصديقات حتى الزوج والزوجه
اذا ماتاخذ وتعطي صدقني بتتعب معاه
علمتني الدنيا
هذا اهم شي تعلمته بصراحه استفدت كثير وعرفت الناس لما عرفت هذا الشي
الا وهو
اي شخص يقلدك هو شخص يحسدك ويغير منك
فعلا جربوها وشوفوا
لي اخت من ابوي اختي هذي سبحان الله فلوسها اكثر من فلوسي وبيتها احلى وافخم من بيتي
وتشتري اغلى من لبسي
ويوم اتقابل انا وهي بخرجه او عزيمه على طول اليوم الثاني تشتري نفس لبسي ونفس عطري
ونفس كل شي
حتى مره كنت انا وهي بالسوق اجي اقولها خوذي هذي البلوزه حلوه تقول لا ما ابيها
اقول انا بشتريها مدامك ماتبينها ترجع تقول اجل بأخذ مثلك
مع انها ماتحبني ولا تطيقني وادائما تنتقدني وتفشلني
تقولي وش التنوره الغبيه هذي وبعدين تلبس مثلها
وش العطر البايخ هذا وتفتح شنطتي وتتعطر منه
ااااااااااخر شي قامت تاخذ اسم الدلع حق زوجي وتدلع فيه زوجها
وش جاب لجاب انا حروف زوجي غير حروف اسم زوجها
حتى بكلامي يوم اقول كلمات غريبه ومصطلحات غريبه تقول مثلها بالضبط وقدامي بعد
ماتستحي تقلدني وتنتقدني
يعني لو هي تحبني بقول اوكيه
ياما ناس عجبهم لبسي وقالوا ماشاء الله وش اللبس الحلو هذا من فين جبتيه بشتري مثله
هذي تستاهل
لكن المصيبه من اللي يسب ذوقك ويشتم فيك وبعدين يأخذ مثلك
كلامج موزون بذهب وعين العقل ماشاءالله
فعلاً خير الأمور الوسط ولاإفراط ولاتفريط …
سلمت يداكِ غاليتي ..
شكرا جزيلا على الموضوع المتميز
شكرا لك..IZE]
يعطيش العافيه والله يحقق جميع امنياتج
علمتني الدنيا
عيش مدام انك عايش
لا تشيل هم بكره ولا تحزن على الأمس
اطلب الله قوت يومك هذا وخلي بكره لبكره
لاتضيع ايامك على الندم والحسره على مافات
ولا تشقي نفسك بالتفكير في الغد
يمكن تموت قبل تشرق شمس الغد
اطلب الله واستغفر وعيش حياتك بما يرضي الله
تسلمى ياقمر على الموضوع الرائع