أختكم عطر الأنوثه تجذب كل شي تبيه مثل المغناطيس ويتحقق تبون تعرفون كيف ؟؟تعالوااااا 2024.

السلام عليكم ورحمة الله وبركاته

لاتستغربون من العنوان
أيه أنا أقدر أجذب كل شي لي مثل المغناطيس ويتحقق

بقولكل من البداية من كنت صغيره

أنا يوم كنت صغيره كنت لما أبي شي
أتخيله في بالي وأتخيل أنه عندي
ومافي يومين أوثلاث يجيني
أجذب الشي بحسن الظن بالله وبتفاؤلي وأجذب بتفكيري فيه وتخيلاتي
صدقوني ماأكذب عليكم وبعطيكم أمثله من حياتي

أذكر مره كنت صغيره أخوي ملك وبيتزوج
من ملك يابنات وأنا أتخيل أني أشتري فستان حلو وأطلع روعه في الزواج وأن الكل يطالعلي
وكل يوم أتخيل كذا

ألين مارحت السوق وألقى فستان حلو
وبالفعل جاء الزواج أخوي وطلعت روعه والكل يطالعني

ومن يوم كنت صغيره كنت دوم متفائله و أتخيل أني أطلع الأولى وأن وزارة التربيه
تكرمني وبالفعل سنويا أتكرم وجوائز
يعني إذا أبي الشي أتخيله بكل تفاصيله وربي أنه يصير

يعني أفكر دوم بالإيجابي وأبعد السلبي عن تفكيري

بعطيكم أمثله كثيره من حياتي عشان تصدقون

أنا كل ماأدخل مرحله جديده (متوسط_ثانوي_ جامعه)
كنت أتخيل أن المعلمات يحبوني والطالبات يحبوني وأتخيل بالتفاصيل يعني أجذب الناس لي بتفكيري

والله أن المدرسات يحبوني حيل لدرجة مره أن الوكيله نادتني وقالتلي أنا أحبك مع أنها متزوجه وعندها أطفال
وقالتلي أنا أجي المدرسه عشانك وأخذت رقمي وكانت تكلميني دوم

ومره قالوا المعلمات أن فيه معلمة حاسب بتجي جديده
رحت البيت وجلست كل يوم أفكر وأتخيل أن المعلمه بترتاحلي وتنجذب لي غير عن كل البنات

وربي يابنات أنها جتنا في حصة فراغ وتطالعي كل شوي وسألتني عن أسمي وقالت أنا أنجذبت لك بسرعه أنتي مبتسمه

حتى صديقاتي كانوا يستغربون
مني ويقولون شنو السر فيك

وبالمدرسه كثير معجبات فيني جذبتهم بتفكيري الإيجابي

بعد أنا كنت في المدرسه أشارك في الحفلات ال****ديه والتمثيل ع مسرح المدرسه
مره طلبت مني معلمة الدين أمثل مسرحيه
أنا رفضت وقلتلها أنا عندي دراسه وإختبارات إذا بمثل أمثل جزء بسيط من المسرحيه
وصديقتي هي بتاخذ الجزء الأكبر من المسرحيه
طبعا صديقتي ماشاءالله ممثله درجه أولى وغير كذا عندها موهبة الكوميديا

جلست أتخيل وأتفاءل أن المعلمات راح يعجبون بدوري وأدائي ويشكروني
مع أن الدور بسيط
وبعد ماسوينا المسرحيه صديقتي أبدعت بالدور
وقدمت أداء روعه
وأنا جزء بسيط من المسرحيه

وربي يابنات جني المعلمات ويشكرون فيني ويقولون أنتي مبدعه
حتى صديقتي أنقهرت حيل
وقالت ليه محد شكرني

وبعد مره صديقتي ماشاءالله تمتلك صوت جهوري في ال****د وصوتها لحاله كأنه موسيقى ماشاءالله
أحسن من صوتي بمليون مره
وطلبت مني أني أشاركها في أنشوده نلقيها بالحفل طبعا أنا وافقت
وماقلت لا بتطلع أحسن مني وأنا صوتي أقل

بالعكس جلست كل يوم أتخيل وأتفاءل وأحسن الظن بالله
وأتخيل أن الكل راح يجيني ويشكرني ع صوتي الحلو

وبالفعل والله يابنات بعد ماخلصنا الأنشوده وأنا أنشدت جزء بسيط جني المعلمات وقاللي شهالصوت أنتي بكيتينا بصوتك

وصديقتي ماقالولها شي

والله حتى الطالبات بالفصل يقولن للمدرسات أنتوا ليه تحبون عطر ليه تسمعون كلامها

حتى وربي وحده من معلماتي كانت تقولي إذا تبين تطلعين من الصف لاتستأذنين أطلعي من غير أستئذان

حتى قبل لا أطلع لحفله أو زواج كنت أتفاءل حيل وأتخيل أن الناس يخطبوني وأن المعاريس طابور عند الباب
والله يابنات خطبوني ناس كثير لدرجة أمي تقولي أنتي راح تعنسين من كثر الخطاب

صدقوني يابنات التفاءل وحسن الظن بالله والتخيل الإيجابي مفعوله أكثر من السحر

حتى أذكر مره كنت في الثانوي كان تو طالع جوال الشيطان ((أول جوال فيه كامرتين))
وأول ماطلع كان غالي حيل
كنت أتمنى أمتلك هالجوال
وكان معي جوال عادي كنت دايم أتخيل الجوال اللي معي هوجوال الشيطان
وكل يوم أتخيل هالشي
أخوي أشترى الجوال له

مافي أقل من شهر الا عطانياه

حتى قبل لاأتزوج كنت أتخيل وأتفاءل
أن بيوم الزواج راح أطلع جميله ومميزه وكل شي فيني مميز

جاء يوم الزواج ورحت الصالون كان ترتيبي رقم 3 بين العرايس
لأني جيت شوي متأخر
دخلت الأولى وبعدها الثانيه ومكياجهم كثير بس حليو

دخلت أنا وربي سوتلي مكياج خورافي حتى الكوافيره كانت مبسوطه فيني أنا الوحيده اللي كل شوي تطلع من غرفة المكياج وتطالعلي وتضيف لي لمسات ع وجهي وترجع
حتى تسريحتي كانت غير كل العرايس تسريحه غريبه

وطلعت مميزه قليله علي
وسموني أجمل عروس في جماعتنا

وكنت أتفاءل دوم وأتخيل أن حياتي الزوجيه سعيده وأتخيل كل شي بالتفاصيل
والحمدلله أنعكس ع حياتي بشكل عجيب

وآخر موقف صارلي قبل أسبوع
أخوي بيتزوج وزواجه نهاية الشهر هذا
خواتي يتصلون علي وقالولي أنهم جهزوا وخلصوا
وأنا ماسويت شي
وكانوا يقولولي يالبارده ماسويتي شي

والله يابنات رحت لزوجي قلت بروح الدمام بشتري فستان قال أوكي بنروح الخميس الفجر ونوصل 9 الصبح ومعك يوم بس

من قالي وأنا أتخيل أن فستاني روعه وأتخيل أني من أوصل الدمام الساعه 9 بلقى فستان
وقبل الظهر مخلصه كل شي لأني أنا ماأحب أدور في السوق كثير وكنت أقول يارب أنا واثقه فيك ومحسنه الظن فيك أنك بتساعدني أني ألقى شي حلو
وصلنا 9 للساعه 11 ومالقينا
وقال هذا آخر مول إذا مالقينا
نرجع العصر سبحان الله لقيت قماش روعه ووديته للمشغل وعلى ماطلعت من المشغل أذن الظهر

شفتوا يابنات كيف التفاؤل وإحسان الظن بالله يعطي نتائج روعه

يعني إذا فكرتي بإيجابي تكون النتائج إيجابيه وإذا فكرتي بسلبي النتايج سلبيه

وأكبر دليل ع التفكير السلبي في حياتي
إني كنت أفكر قبل الزواج وأتخيل أن أهل زوجي مايحبوني وبالفعل صارت مشاكل كثيره والسبب تفكيري السلبي
فقررت أغير هالتفكير وقمت أتخيل كل يوم أنهم يحبوني ويحترموني
وربي يابنات بعدها بفتره جاء عمي أبو زوجي وجاب لولدي هديه
اللي ماأهداه وقت نفاسي

شفتوا تأثير التفكير السلبي والتفكير الإيجابي

قريت قصه فيه واحد كان موسوس دايم بمرض السرطان ويتخيل دايم أنه يصيبه وبالفعل صابه المرض
شفتوا لا أيام عافيته وصحته أرتاح ولا أيام مرضه

أدري طولت عليكم بس بقولكم آخر جزئيه وهي الأهم
أنا مشاركه في منتدى ثاني عن تطوير الذات وأنا أتصفح شدني عنوان أسمه قانون الجذب
يوم دخلت وقريت أنصدمت وأنا أقرا
أثبت لي أن كل السيناريو اللي يصيرلي في حياتي من تخيلات وأفكار إيجابيه
طلع قانون مثبت من العلماء وأسمه قانو الجذب
وينص على أن الإنسان إذا فكر بإيجابي النتيجه إيجابيه وإذا فكر بسلبي النتيجه سلبيه

بس القانون يعتمد على حسن الظن برب العالمين والتفاؤل
وأن الإنسان لمايتخيل شي حلو يتبرمج العقل على هالشي
ومع الأيام يتحقق

وفيه أدله شرعيه تثبت هالشي
قال الرسول ((تفاءلو بالخير تجدوه))

وقال تعالى((وما أصابكم مصيبه
فبما كسبت أيديكم))
هذا معناه أن الله سبحانه مايبي لعباده أي شر بس الإنسان هو يجيب الشر لنفسه بسوء الظن والتفكير السلبي

والحديث القدسي خير برهان
قال الرسول قال الله(( أنا عند ظن عبدي بي إن ظن خيرا فله وإن ظن شرا فله))
المعنى
أحسان الظن بالله+تفكير إيجابي+تفاؤل =حياه إيجابيه سعيده

سوء الظن بالله+تفكير سلبي +تشاؤم=حياه سلبيه تعيسه

وأستغرب من بعض البنات في المنتدى الله يهديهم دايما يفكروا بالسلبي ويضيعوا أفكارهم ع الخطأ
مثال : أنا أخاف من العين ومن الحسد
صدقوني هذي الفئه هي اللي تصيبها العين والحسد
لأنهم توقعوا الشي السلبي فتكون النتيحه سلبيه

أوتقول أنا ماراح ألبس كذا أخاف زوجي مايتقبلني أو أخاف ماتعجبه قصتي أو صبغتي وبالفعل تكون النتيجه أنها ماعجبته
ليه ماتقولون راح تعجبه وراح ينهبل علي وراح يقولي أنتي ملكه
بكذا يتبرمج العقل وينعكس ع الزوج وصدقوني النتيجه بتكون إيجابيه

شكراً لك..

وتنبيه أخير:
ليتنا نحسن الظن ونفعل التفكير الإيجابي في كل شيء حولنا ولا نقصره فقط على الأمور الدنيوية البحتة.

تسسلمين حبيبتي على الموضوع