ابي تعطوووني ارائكــــــــــــــــــــــــم بكره راااح يجيني ظيوف لاول مره وبيجيني حوالي 10 من الحريم اللــــــــــــــــــــــــــه يعيننــــــــــــــــــــ:worn_out:يـ وش افضل شي تنصحوني اسوي سفره ولا ادور بالصحون تكفووووووووون ضروري محتاجه ردودكم
من رأيي، إذا هم كثير سوي سفرة أسهل لج!
من الحين جيبي ورقة و قلم و اكتبي اللي بتسوينه…
أول شي الشاي و القهوة، ايش اللي بتقدمين معاهم!
مثلاً معجنات مع الشاي و مع القهوة تمر و نوع أو نوعين حلى…
أما العشا أبدي بالمقبلات، مثلاً كم نوع سلطة او إذا بتسوين مقالي أو شوربة…
بعدين الطبق الرئيسي، إذا تبين تسوين بس صواني، أو طبق رز و معاه كم طبق جانبي…
و في الأخير إما تقدمين فاكهة أو تسوين حلى…
حاولي تخلصين بعض الأشياء الليلة عشان ترتاحين بكرة و يصير عندج وقت لتجهيز أشياء ثانية!
يعني لما تقررين الأشياء اللي بتسوينها خلاص، احسبي كم صحن تقديم تحتاجين، كم صينية، و من الحين طلعي أطقم الشاي و القهوة، و صحون العشا و ملاعق الأكل و اللي بتستخدمينهم في غرف الأكل، كاسات العصير، و غسليهم و غطيهم بسفرة أو فوطة مطبخ و خليهم على جنب، عشان بكرة ما تحتاسين…
و لا تنسين تجهزين مناديل السفرة!
و حتى الأكل ممكن تجهزين بعضه من اليوم… مثل حلى القهوة، سويه و احفظيه بعلبة و بكرة كل اللي عليج تصفينه في صحن التقديم… و نفس الشي لحلى بعد العشا!
و لو بتسوين معجنات، اعجني العجينة الليلة، و إذا تبين تخبزينها اليوم و تحطينها بالفريزر و بكرة بس تسخنينها، أو اعجني العجينة و فرزيها، و بكرة طلعيها من بدري و اشتغلي عليها عادي!
إذا بتسوين صواني، مثل اللزانيا أو مكرونة بالباشاميل أو كانيلوني، تقدرين تجهزين كشنة اللحم من الليل، و الباشاميل و تخلينهم في الثلاجة، و بكرة اشتغلي عليهم على طول… أوفر للوقت!
و إذا بتسوين سلطة و محتاجة تتبيلة معينة، جهزي التتبيلات و حطيهم في علب قزاز صغيرة و دخليهم الثلاجة! إذا السلطة تحتاج خبز محمص، جهزيه الليلة بعد و حطيه في كيس بلاستيك أو علبة بلاستيك…
و إذا في بالج تسوين سمبوسة مثلاً لفيها اليوم بعد و بكرة بس اقليها!
و بكرة من بدري، رتبي شغلج… أنا اللي أسويه، أكتب في ورقة كل شي بالتفصيل و أعلق الورقة عالثلاجة، و كل ما أخلص من شي أشطبه! لأن أحياناً مع الزحمة و الحوسة تنسين أشياء و ترتبكين…
موفقة يالغالية F:
ورايي مثل رايها السفره افضل بواااايد 😉
خلي القهوة معاها تمر افضل
وبعدين ابهريهم بالسفرة ولاتنسي الاستغفار وانتي تجهزين يعطيك حماس ونشاط سبحان الله
ماشاء الله عليها اختنا كفت ووفت
بعد تقدرين تحطين مع الشاااي بعض المكسرات والبسكويتات اشتريها جاهزه وعندك الفيشار بعد
واول مايجون حطي لهم العصيرات … وبعد امممممممم
وتقدرين تسوين نعنان لحاله وشاي لحاله هذي الاشياء سويها الخميس
اما السلطات سويها من الليل ولا تحطين الطماطم الا يوم الخميس عشان ماتذبل السلطه
وسوي فتوش وسلطه خضرا وسلطة مكرونه وحطي فيها الزيتون
وعندي لك خلطه انا اسويها كل مره مع السلطه الخضرا حطي ملعقه مستردا خردل وليمونه وملح وفلفل واورقانو زعتر بري وخلطيهم مع بعض
وتقدرين تسوين اشياء جانبيه مع الاكل لما تقدمينه
اللي هو الدقوس الصلصه البارده اللي يقدرون ياكلونها بدون لا تحرقهم
فلفله اخضر حار وليمونه وطماطم وبقدونس شويه … وشويه ملح فلفل واورقانو اللي هو الزعتر البري وخلطيهم بالخلاطه
وقدميها مع السفره
هذي اضافاتي..
تحياتي لك