و أسعد الله صباحكم بالنور و السرور…
صار لي فترة و أنا أشوف الكورن دوغز في البرامج، و قلت ليه ما أجربه!
و للي ما يعرفونه، هو عبارة عن هوت دوغ مشكوك بأسياخ خشبية و مغمس في خلطة من عجينة سايلة، و مقلي في زيت غزير… الحلو فيه إنكم لما تاكلونه تحسون إنكم تاكلونه مع خبزته! يعني ما في داعي تجيبون صامولي و تحطونه فيه…
طبعاً الطريقة الأصلية يستخدمون فيها دقيق الذرة (corn meal)
مثل اللي في الصورة…
و من هنا جا الاسم طبعاً!
و أنا دورته و ما لقيته في أسواقنا (لكن شفته في سوبر ماركت في دبي 
)، فقررت إني استبدله بطحين الحمص أو اللي نسميه طحين الكباب! و النتيجة طلعت رااائعة… و صرت اسميه كباب دوغز خخخ
أنتوا سووه باللي متوفر عندكم!
نجي نشوف الطريقة بسم الله…
أول شي نحمي الزيت اللي بنقلي فيه… جيبوا أصغر قدر متوفر عندكم، لأننا بنحتاج كمية كبيرة من الزيت… و السبب إن الكورن دوغز نقليها و هي واقفة!
و نجهز بعد الهوت دوغ و نشكهم بالأسياخ… و تقدرون تستخدمون أعواد الأسنان…
أنا قطعتهم بالنص، لكن ممكن تحطونهم بطولهم كامل، أو تجيبون الميني هوت دوغ…
تأكدوا إن الهوت دوغ بحرارة الغرفة، لا تقلونه و هو مثلج، لأنه ما راح يستوي من داخل!
للخليط اللي بنغمس فيه بنحتاج:
كوب طحين عادي
كوب دقيق الذرة أو طحين الحمص
ملعقة كبيرة بيكنج باودر
ملعقة صغيرة ملح
فلفل أسود
و النكهات إختيارية (بودرة الثوم – أوريغانو – باربريكا – فلفل حار)
1/2 1 كوب حليب طازج
عشان يكون أسهل لكم في التغميس، حطوا الخليط في أي وعاء اسطواني، أنا استخدمت كاس براون، ممكن تخلطونه في بادية بعدين تصبونه في كاس عميق…
قوام الخليط بيكون مثل خليط البان كيك، فإذا حسيتوه ثقيل، ممكن تزيدون شوي حليب لين توصلون للقوام المطلوب!
الحين غمسوا القطع في الخلطة، و تأكدوا إنها تغطت زين…
و بعدين حطوها في الزيت، لا تتركونها!
لأنها بتنزل و بتلزق تحت، فخليكم ماسكين العود شوي و حركوا العود بحركة دائرية و بتشوفونها بدت تنفش معاكم… بعدين ممكن تتركونها لأنها بترتفع و تطفو على وجه الزيت…
أنا حطيت قطعة من الخلطة عشان أختبر حرارة الزيت… خلّوا الحرارة أعلى من الوسط بشوي…
و بصراحة ما قدرت أقلي اكثر من قطعتين مع بعض، إلا إذا في أحد يساعدكم
لما تطلعونهم من الزيت حطوهم على ورق مطبخ عشان يمتص الزيت الزايد، بعدين قدموهم…
و هذا شكلهم النهائي 
و هنا حطيت عليه كاتشاب و خردل…
و هذا الشكل من داخل…
شفتوا شلون شكلها؟ كأن الهوت دوغ داخل خبزة!
و هذي صورة من مرة سابقة…
تحذير: نبهوا الأطفال على الأسياخ و هم ياكلون، ما نبي نخرب وناستهم
ملاحظة: كمية مقدار الخليط كبيرة… في طريقتي أنا استخدمت بس ربع المقدار لكمية الأسياخ اللي شفتوها بالصور…
و عوافي عالجميع إن شاء الله 
فكره جديده وحلوه موت
راح اجربها ومتاكده انها راح تعجب اهلي
مشكوره عالوصفة
وتم تقييمج يا عسووووووله
ماشاء الله عليج ياام راشد
اكلاتج دائما مبتكره وطريقتج بالطبخ مرتبة ونظيفه تبارك الرحمن
تستاهلين احلى تقيييم حبيبتي :032:
ماشاء الله فكرة رائعة
الله يعطك العافية مشهي
الله شكلها لذيذة يسلموا ايديك والف صحة وعافية
كنت اشوفه فالرسوم المتحركه يوم كنت صغيره ،،
وكان ودي ادش معاهم فالتلفزيون وآكل معاهم خخخخخخخخخ
احس هاي امنية بنتي الحين ..
اكيييييد بجربها بدون تردد
تسلم الايادي ديزي شغل مرتب ونظيف ..
ومبين انه لذيذ ..
وااااو شكله روووعة
تسلم ايدك الغلا
وحاسه انه مقرمش من بره وطري من جوه وطعمه اممممممممممم
ويعطيك العافيه