عندك طفل او طفله بالروضه او المدرسه تعالي حياك 2024.

السلام عليكم ورحمة الله وبركاته ..,,

كيف حالكم حبيباتي عساكم بخير ,,..

إلى الأمهات العزيزات ,,, الله يعطيكم الصحه والعافيه

أصعب عمل على وجه الأرض ما نقوم به نحن الأمهات سواء ربات المنازل أو الموظفات ,,

وأسئل الله العلي القدير من لم يرزقها الله بالذريه ( اللهم أرزقها بالذريه الصالحه ياسميع يا مجيب الدعاء اللهم آمين )

موضوعي اليوم عن أطفالنا الكبار او الصغار من بالروضه او بالمدرسه ,,

وهذي بعض النصائح المجربه المتبعه عندي ,,,

حتى توفروا الجهد والوقت مع أطفالكم وقت الدراسه ,,..

وبالنهايه من جد وجد ومن زرع حصد

……………………..

خصلنا من المقدمه خلونا نتكلم بالعاميه ,,

كيف تخلين عيالك من المتفوقين …

أول شي أبي أفهم كل الأمهات أن الي بيدرس أنتي مو طفلك

أيه خليه في بالك ..

لأن كثير ما اشوف من الامهات الي تعاتب ولدها او بنتها وهي مشغوله

تقول له روح أدرس روح بترسب روح اكتب واجباتك روح انسخ روح احفظ ..

هذي الطريقه خاطئه 100%

انتي المفروض تدرسين معه وكأنه يوم دراستك وقت ما كنتي بالمدرسه

لأن لو تنطبق السما على الأرض الطفل ما راح يقوم من نفسه ويخلص واجباته او ينجز

مهمة الحفظ …

لما الطفل يرجع من المدرسه بعد الغداء وبعد الراحه لمدة نص ساعه

على طول باشري بتدريسه …

السبب جدا واضح الطفل او الطفله قاعده من النوم من الصباح

وتعبانه وبنص النهار فيها نص كمية النشاط لأنها خلصت نص نشاطها بالمدرسه

أستغلي النشاط الباقي قبل ما يفوت كله

يعني قبل العصر تكونين مخلصه معه … كل شي حتى يتم باقي الوقت

يلعب الين وقت نومه بعد صلاة العشا ..

ما فيها شي لو قعدتي معه وقت ما يكتب واجباته الين ما يخلص

ان شاء الله ما بياخذ الا نص ساعه لو كان عنده تمارين او اسئله لازم يكتبها ويجاوب عليها

وبهذه الفتره انتي قعدي اعطيه الملاحظات البسيطه بصوت هادئ بدون عصبيه

وممنوع منعا باتا ان تقعدون قبال التلفزيون

لأن هالمشهد متكرر بكثير من البيوت يعني الطفل يكتب والأم تتابع ولدها او بنتها

وبنفس الوقت عيونها على التلفزيون كأنه بيطر 😮 عنها البرامج ..

خليكي واعيه لنفسك قبل طفلك ..

لان بالأخير انتي قاعده تفهمينه الشئ الخطأ وما ياخذ دروسه وواجباته بشكل جدي

بفترة ما يكون هو يكتب واجباته ..

انتي نبشي بالشنطه يعني طلعي كل الكتب والدفاتر

وشوفي اقلامه وادواته الدراسيه ان كان في شي ناقص

واعملي الجدول لليوم الثاني ..

لا تتهاونين مع طفلك انه يأجل أي شي لليوم الثاني

لأنك انتي ما قاعده تخلصين معه واجباته فقط انتي قاعده تفهمينه

النظام بالحياه ان كل شي بيومه ولو أجل شي من واجباته راح يضيع وقته

اجعليه دائما يحلم بالهدايا الي راح تقدمينه وقت نجاحه وبين فتره والثانيه

ذكريه بفرحتك الكبيره وفخرك به وقت ما يتفوق ويحصل على شهادة التفوق

خليه يحلم بهذا اليوم وكأنه يوم عرسه 😉

……………………….

كيف تلحقين على الامتحانات والاختبارات أول بأول

طريقتي اني أحضر له دروسه يعني مثلا

هذا الدرس لسه ما عطوه ..

يعني بكره الماده هذي عنده ..

اكيد بيعطونه هذا الدرس

طيب اقعد اشرح له بعد ما انا قرأت الدرس اشرح له واقعد

اكتب الاشياء المهمه بشكل ملاحظات يعني ألخص له دروسه وقت الشرح

واكتب النقاط الي تحتاج للحفظ والتمعن بالقراءه

وبهذي الطريقه انتي احتفظي بهذه الملاحظات يوم بيومه ودرس بعد درس

وبين فتره والثانيه اجعليه يقرأ الملاحظات وسوف يقرأه بكل سهوله ان شاء الله

لأن بيكون حافظ الشرح منك ثم من الاستاذ او المعلمه وبهذي الطريقه بيتثبت المعلومات

براسه بدون ما ينساهم …

وصدقيني وقت الامتحانات بيسهل عليه المراجعه

وبيكون بس يقرأ ويتذكر كل المعلومات الي خذاها

ما انسى اني اذكركم بشي مهم

لما تحظرين الدرس معه لليوم الثاني وقت ما يشرح الاستاذ الدرس

ولدك راح يكون عنده فكره وافيه عن الي قاعد يقوله الاستاذ وبكذا

راح يشارك بالصف ويكون واثق من نفسه جدا أمام استاذه وزملاءه

فبيحصل مو بس على العلامه الممتازه بالامتحانات ايضا بعلامات ممتازه

بالمشاركه بالصف ….

……………………..

كيف تخلين طفلك يلفت نظر الاستاذ او المعلمه

تعالي اقولك …

وقت ما انتي فاضيه بالبيت ..

خذي ورقه حلوه ارسمي حوالينها وقت ما انتي تتابعين البرامج

اشغلي نفسك وقت الاعلانات انك تزينين الاوراق

وبعدها اكتبي الاسئله الي تخص درس معين سواء بالعربي

او بالدين من الي عطوه طفلك بالمدرسه ..

ولما يكون يوم الويك اند خليه يحل الاوراق

منها انه يراجع الي عطوه من قبل

ومنها انه يفهم الاستاذ انه مهتم بالانشطه

وانه يقضي وقت الويك اند بالمراجعه ..

وصدقيني انه راح يلفت نظر الاستاذ اليه وراح يشوفه انه

نشيط وعملي ويحب الدراسه …

حتى لو أخطأ طفلك بشئ سواء بغلطه واحده بالامتحانات

الاستاذ بيراجع نفسه مليون مره انه ما يظلم ولدك بدرجه

اكيد راح يتذكر كيف كان نشاطه وحيويته بكل ما كان ينجزه طوال الفصل الدراسي

…………………………..

خلوني اعطيكم مثال

لما رحت اسئل المعلمه عن مستوى بنتي

عطتني ملاحظه قالت بنتك اشوي يبي لها تركيز بالتعبير الشفوي او الكتابي

رجعت البيت وقعدت افكر كيف اغير هالشي

انا من النوع الي اتفشل من اي ملاحظه

ودام انها موجهه لبنتي اكيد تخصني بالدرجه الاولى

دورت بالدواليب ولقيت علبة النيدو مخلصه

رحت غطيتها بالورق المقوى الملون

وغطاء النيدو حطيت عليه الورود الصناعيه

وكتبت على العلبه اسم بنتي

وبعد كتبت علبة التعبير

واخذت اوراق وحطيت عليها صور معبره من المجلات

او القصص القديمه

وخليتها تكتب التعبير يوم بعد يوم

والعلبه صارت ممتلئه بالصور وكل صوره وراها التعبير

الي كتبته …

منها انها صارت تعرف كيف تعبر عن كل صوره مختلفه ..

ومنها انها ودته لمعلمتها ههههههههههه ركزت

على العلبه بالبدايه وتقول بنتي قامت تقلب العلبه فوق تحت

الظاهر عجبها التزيين ونادت معلمة الاعمال اليدويه تقول لها تعالي شوفي

أم فلانه شنو مسويه

وبعدها صارت تشوف محتوى العلبه

وخلت البنات يصفقون لبنتي

بعد فتره صرت ازيد الصور يعني كل ويك اند اخليها ترسل صور زياده

لمعلمتها ومعلمتها كانت تحطه بالعلبه وتزيد النجوم لبنتي على اللوحه

ولما كلمت بنتي شهر ونص بالمدرسه

رحت اسئل المعلمه عنها وبصراحه هالمره فشلتني بالمدح الكثير 😎

………………………….

نصيحه نصيحه للأمهات وأولياء الامور

لما تروحون تسئلون عن اطفالكم ومستواهم الدراسي

ويكون عند الاستاذ او المعلمه شكوه على اطفالك انهم

ما يكتبون الواجبات او لسه ما يفهمون زين نفس الباقي

لااااااااااااااااا تقولين والله يتعبني بالدراسه او ما يدرس بالبيت

لأنك بهذي الطريقه انتي تخلين الاستاذ يحط ولدك براسه انه مهمل

وما يحب الدراسه …

كل الي المفروض تسوينه انك تكونين هادئه

وتفهمين الاستاذ انك راح تباشرين بتغيير هذي الملاحظه

وان طفلك نشيط ويحب الدراسه

رجعي البيت وغيري الخطأ لا تقعدين تماطلين نفسك

اليوم وله بكره وتقعدين تصارخين وتطلعين العصبيه بهذا المسكين

انتي المســـــــــــؤوله عنه يعني انتي الي اعملي وافعلي علشان يتغير مستواه

……………………………

الي عندها طفل او طفله بعمر الخامسه

انصحها من كل قلبي انها تدخله روضه يتعلم كل شي هناك

قبل المدرسه الكثير من المدرسين والمدرسات

يسألون ان لحقتي طفلك او طفلتك للروضه

لان الاطفال لما يروحون الروضه وبعدها للمدرسه

اكثرهم متفوقين بالدراسه وان ما كانو بيكونون على الاقل يحصلون

الدرجات بين الممتاز والجيد جدا

وان كانت ظروفك ما تسمح ماديا ان طفلك يدخل الروضه

باشري انتي بتدريسه يوم بعد يوم اشتري كتب الحروف والكلمات

وهجئي معه كلمه كلمه وحرف حرف علميه كيف يمسك القلم

وبما ان الصغار اصابعهم ما تتحمل مسك القلم فتره طويله

اشتري طين وخليه يلعب بالطين

لأنه راح يقوي عظلات اليدين ويقوي عظام مفاصل الاصابع

……………………………………

الدفاتر وكراسات الواجبات

خليها دائما بأحلى حله

خذي استيكرات ولصاقات الاطفال

من الصور الكرتونيه

وسطري الدفاتر حتى لو كانت مسطره مثل الدفاتر الجديده

سطريها بالاقلام التلوين المجي كلر

وحطي الاستيكرات وزينيها برسوماتك الحلوه

منها ان طفلك بيحب يكتب واجباتها وتفتحين نفسه

ومنها خليه يشارك بأختيار الملصقات بعد ما يحل الواجبات

يعني بيخلص وهو متحمس انه بيختار الملصق الي يبيه

وعلميه كيف يرتب خطه وقولي له انا ما راح ازين كل هالدفاتر وانت خطك مو حلو

وقتها بيفهم انه ما راح يحصل على الاستيكرات الحلوه الا اذا عدل خطه

وراح يلفت نظر المدرس او المدرسه لجمال دفاتره وترتيبك الجميل

…………………………………….

وقت الحفظ سواء الآيات من السور

او القصائد او غيره من الاحاديث

الطريقه الصحيحه

انك تقولين وهو يقول وراك حتى لو تكونين انتي مشغوله

انتي كرري وهو يكرر آيه بعد آيه

كل آيه عشر مرات عشرين مره مو مشكله اهم شي

انه من كثر ما يكرر

هو راح يحفظ

…………………..

ولا تنسون انكم تحتسبون الأجر

بكل شي تسونه لعيالكم

بكره ان شاء الله بيكون الفضل لله ثم لك

بنجاحه كل سنه ….

:::::::::::::::::::::::::::::::::
هذا موضوعي اليوم

عن المدرسه والمدرسين
والاهم عن اطفالنا وحصاد الغد …

والله يوفقنا أجمعين