ابي فزعتكم يالنشامى
الاحد القادم طالبينن مدرسة بنتي ببرنامج الام الزائرة
ابي افكار الله يعافيكم بس بسرعة ارجوكم
للمعلومية بنتي بثاني ابتدائي
الام الزائرة يعني اسوي مع البنات عمل فني او طبخة بسيطة اوقصة
البنات الصغار يحبون شي يسوونه بيدهم مو يطالعون بس
حطي في بالك في ختام الزيارة توزعين هدايا بسيطة
جربي شي سهل يسوونه البنات و ما يتعب في الاشراف
مثل :
اعداد سلطة الفواكه
مثلا مجموعه تقطع العنب من الكرم ماله و تغسله
مجموعه ثانية تقشر الموز و تقطعه دوائر
مجموعه ثانية تقطع الفراولة
و مجموعه تقشر البرتقال و تقطعه
و مجموعه تلم كل الصحون و تخلطهم مع بعض و تصب العصير فوقهم
و مجموعه توزع السلطة في الاكواب البلاستيكية و تحط الملعقة في كل كوب و توزعه على لحظور
و اثناء كل ها العمل عطي نصائح حول اهمية كل نوع
و نصائح للتعامل مع الموز بعد تقشيرة " وضع الليمون عليه " مثلا او نجعله اخر فاكهة يتم تقطيعها
الله يعينك على الميزانية
و السكاكين مو حديد خليها بلاستيك
و لو تكملين معروفك و تجيبين مريلة لكل بنت يبقى عداك العيب
و ننطر باقي الافكار و خبرينا بالفكرة لي راح تنفذينها و كلمينا عن تجربتك
بالتوفيق يا قلبي
وحابه اشوف افكار ثانية من الحلوات
والاخت ما قصرت
انا عندي لك بعض الافكار
تقدري مثل ما قالت الاخت تسوي طبق يكون بسيط وكلهم يساعدونك فيه
مثلا ساندويتشات خفيفة … راح تحتاجي الى خبز bread
قطاعات ( قلوب – نجوم – اشكال هندسية )
حشوات مختلفة ( جبن شرائح – خيار – طماطم – زيتون – جزر – مربى – Peanut Butter – تركي – مرتديلا )
اي حشوة تحسي الاطفال راح يحبوها
اعواد بلاستك للزينة
وبعدين تعلميهم كيف يقطعون الخبز بالشكل المفضل ( بالقطاعة ) استخدامها سهل وأأمن من السكين
وكل وحدة تختار الحشوة المفضلة وتزينيها بالعود وحبة زيتون
وتقدميها لهم في صحن عليه رسومات اطفال مثلا
هذي بعض الافكار
فكرة ثانية .. الأعمال اليدوية
بشرط تكون بسيطة عشان تناسب سنهم و تسمح لك بتنفيذها وهم يشاركونك في التنفيذ حسب الوقت المخصص لك
وفيه اعمال يدوية كثيرة مثل اعمال الخرز والورق وغيرها او من ال foam او فكرة عمل بطاقة مثلا للام وكل طفلة ترسم رسم معين وكتابة لأمها وتزينها بالجليتر والستيكرات
فكرة ثالثة .. قصة قصيرة
اختاري قصة من المكتبة تكون مفيدة وفيها دروس للأطفال .. وتقدري تقرأيها لهم بعد ما تختاري احداث معينة من القصة وترسميها ( او تدوري صورة جاهزة من النت ) وتكبريها لهم وتعرضيها حسب تسلسل احداث القصة
فكرة رابعة … فقرة تعليمية
تختاري لهم موضوع علمي وتشرحيه لهم بشكل مبسط
مثلا عن تنظيف الأسنان .. كم مرة .. الادوات اللازمة
مع الشرح بالصور وتوزعي عليهم في النهاية ورق تلوين عليه صورة سن مبتسم او مسابقات كلها بثيم معين ( الاسنان ) .. اي موضوع تحسيه راح يفيدهم بس المهم تشرحيه بطريقة مبسطة ولطيفة مثل التغذية الصحية والنوم المبكر وغيره
الافكار كثيرة بس المهم انك توزعين اهتمامك وانتباهك لكل الأطفال عشان يعجبون بفقرتتك وتحاولي تشركين الكل فيها
بالتوفيق
ومشكورة على الافكار الجميلة جدا