ابي ياخواتي كل وحده تدخل وتكتب شو بتستخدم من مستحضرات تنضيف غير الكلور
اما استفسارك للمطبخ والارضية
_فانا استخدم جيف للمطبخ وهو رااائع ويشيل الدهون والاوساخ بسرعة وفعالية من على الخزائن … أسطح الخزائن… الميكرويف ,,, الفرن (( البوتوغاز))
_ اما الارضية فاشطفها بماء ممزوج فيه القليييل اريال وداك او ديتول ,,, نظافة وريحة منعشة
وممكن تجيبي لارضية المطبخ جل العملاق برائحة الصنوبر كمان حلووو وينظف والريحة منعشة
_ بيتي سيراميك امسحه اول مرة بالماء المضاف له ايضا داك او ديتول وقليل اريال .. ومسحة ثانية بماء وديتول او احيانا احط القليل من الكمفورت او الداوني
وتشوفي الريحة تجنن
ان شالله اكون افدتك
ماظن له بديل..
حياج الله عزيزتي…
أنا مثلج بالضبط، أحاول قد ما أقدر أقلل من إستخدامي للكلور…
عموماً، عندي كم طريقة تستخدمين فيها مستحضرات طبيعية مية بالمية و النتيجة نظافة و تعقيم و ريحة زكية 
يمكن بتتفاجأين، لكن اللي تحتاجينه خل أبيض و بيكربونات الصوديوم و عصير الليمون و ملح الليمون!
بالنسبة للخل، استخدامه واسع… فهو يعتبر معقم و مطهر… تقدرين تنظفين فيه أي شي، المطبخ، الحمامات، الأرضيات (ما عدا الرخام)، النوافذ و الأسطح، و حتى ممكن تستخدمينه كبديل لمنعم الأقمشة لملابس الغسيل!
و الطريقة لتنظيف الأسطح و الأرضيات و النوافذ، تمزجين كمية متساوية من الخل مع الماء، يعني مثلاً كوب ماء و كوب خل، و إمسحي فيه الأسطح و الأرضيات…
أما للنوافذ، حطي المزيج في علبة بخاخ و استخدميه!
أما للحمامات و المطبخ تستخدمينه لحاله مركز عشان يكون مفعوله أقوى على الأوساخ و الدهون!
أدري بتقولين ريحته مو حلوة، بس لما ينشف بتختفي الريحة، و إذا انتي حاسة إن الريحة ما زالت موجودة ممكن تمسحين فوقه بالديتول المخفف بالماء أو منعم الأقمشة عشان الريحة مثل ما ذكروا الأخوات قبلي…
عصير الليمون ممكن تمزجينه مع الخل و بنفس الإستخدامات…
ملح الليمون، هذا استخدمه أنظف فيه الترويبة اللي في أرضية السيراميك… و طريقتها إني أحط تقريباً ملعقة صغيرة في علبة بخاخ و أعبيها بالماء و أخضها زين عشان يذوب الملح، بعدين أبخ على الترويبة و بتنبهرين لما تشوفين شلون الوسخ و السواد يطلع على طول!
لكن يضل ملح الليمون حمضي، و استخدامه كثير يفكك الترويبة و إحتمال يخرب السيراميك، لكن استخدامه للضرورة مرة أو مرتين من فترة لفترة إن شاء الله ما يضر!
أما بيكربونات الصودا، هذي اللي مفعولها فعلاً عجيب!
عندج بقع أو دهون على قولة الدعايات "مستعصية"، سوي معجون من عصير الليمون أو الخل مع البيكربونات و حطيها على المكان المرغوب و اتركيها شوي بعدين ادعكي و شوفي!
ممكن تقطعين ليمونة بالنص و تنثرين عليها البيكربونات و تدعكين فيها المكان المرغوب على طول!
أحلى ميزاته بالنسبة لي، هو القضاء على الروائح الكريهة! فعلاً عجيب!
لو انكب شي عالسجاد و غسلتيه، على طول انثري عليه البيكربونات و اتركيه لثاني يوم بعدين اكنسيه!
إن شاء الله الأفكار تكون مفيدة و موفقة عزيزتي F: