ان شاءالله بنسافر لمدة اسبوعين الى ماليزيا واستراليا..وما عندي خبرة شو آخذ وياي شو الأشياء الضرورية لازم اخذهم عشان احتاجهم هناك..؟؟
وشو ألبس ..,؟؟ ياريت كل وحدة تقول شو لبست هناك..
اتريا ردودكم
ان شاء الله تروحين وتردين بالسلامه…
بس بغيت اعرف انتي رايحه شهر عسل؟
والا صارلج مده متزوجه
ممكن اقترح شوية اشياء والباقي البنات ما بيقصرون…
خلي امتعتج دائما من الورزن الخفيف هذي اول واهم نصيحه
والحقائب والشنط من الموع القوي اللي يتحمل السفر لمناطق بعيده
يعني اللي حوافها او حلقاتها بلاستيك ماتنفع!!
طبعا الحذر واجب في كل وقت اخذي معاج علبة اسعافات اوليه فيها كل
ما تحتاجينه من يلاستر وادول وبانادول وادوية لامراض اطفالج اسم الله عليهم متعودين يصابون فيها!!
غير هذا يقولج ان دول شرق اسيا مناخها استوائي يعنى الجو ارطوبه لكن في نفس الوقت ممطر!!!
وهني المشكلة هل تاخذين ملابس صيفيه والا ثقيله ؟
انا اقول اخذي ربيعيه و جم طقم جاكيتات والا انتى شرايج؟
اي ممكن لان الجو استوائي تكثر الحشرات والبعوض فاخذي معاج سبراي
زيت شجرة الشاي او اي سبري يقترحه عليج الصيدلي اللي لازم تروحين تستشيرينه قبل السفر…
طبعا الاشياء الاساسيه :
مثل المشط المعجون الفوط ملابس السباحه أغذيه خفيفه مثل البسكويت
او اللي يحبه اطفالج من الكورن فليكس وانتى امهم وانتى ادرى!!
لالالالالالالالالالالالالالالالالالالالالالالالالا لالالالا تنسين كاميرة الفيديو!!!
عشان تقدرين تعيشون الرحلة طول عمركم !!!
اما بالنسبه لج ….
فانتى غير اعزمي بهالرحلة انج تجددين شهر يعني تردين عروس يديده!!
هالله هالله بالكشخه واللبس الزين …
اخذي معاج جم طقم قمصان نوم جديده غريبه قصي شعرج مو وايد صبغي لون مختلف اخذي عدة مكياجج مو كلها اخذي الاساسيات طبعا
الكريم الكحل المسكرة علبه واحده فيها الشدو والبلشر وكان الله غفورا رحيما!!!
اخذي معاج بدل أطقم مريحه وانيقه جنزات و جيبكلوتات تيشيرتات وبرا الفندق انصحج اوخيتي بالستر والاحتشام وترى الله بكل مكان مو بس بالخليج !!
ياما سمعنا قصص يوقف منها شعر الراس لكن انتى ان شاء الله
فيج خير وايمان!!
وعسى الله يوفجكم بهالرحله السعيده!!
اشكرج جدا من كل قلبي لأنج الوحيدة عبرتيني
نصايحج 
على العين والراس
سفرة موفقة باذن الله
اختي بالنسبة لاستراليا و ماليزيا
بلدين حلوين وايد و بتستانسين فيهم وايد وليد
نبدا باستراليا :
الجو : خلال هاذي الفترة بكون الجو بادر عندهم النه على حسب علمي شتاهم الحين يعين الجو بالنسبة لهم عادي و لكن بالنسبة لنا نحن الصراحة برد شوي
الملابس :
للاطفال : تدرين بحكم حركتهم و طلعاتهم لازم تاخذين احتياطج عدل من الملابس الكافية لهم و اهم شئ الدليغات الغليظة و الجاكيتات لانهم اطفال و ما يتحملون
بالنسبة لج: بعد شيلي لج كم لبسة غليظة اشوي
و الشنط انصحج ان تشيلين وياج شنطة حق و قت الطلعات و النزهات تكون متوسطة الحجم لانه بحكم انه عندج يهال لازم تشيلين اغراضهم و بعض الماكولات الخفيفة و الماي طبعا
اوه نسيت اقول لج انه في استراليا ممنوع تدخلين فيها اكل ( اقصد في المطار ) وايد عندهم تشديد على هاذا الموضوع الصراحة انا ما صدقت الا يوم شفت بعيوني هاذا الشئ
لانه في المطار اذكر حاطين عندهم مكان عارضين فيه الاشياء اللي امحصلينها عند الناس و الله . كان من ضمن الاغراض نخي هه هه هه و الله انه يتني الضحكة و مكتوب على القرطاسة اسم محمصة او ما ادري مطحنة في الشارقة
و بعد كانو حاطين حزام من جلد و اشياء كثيرة بعد ما اتذكرها
و في ناس انعرفهم تلاقينا وياهم هناك صارت لهم مشكلة كبيرة من ورى سالفة الاكل لانه الريال الله ايسلمج كان اموصي حرمته و اخواته بان لايشيلون اكل وياهم و الحبيبات ما افتهمن و لاخلن شئ و في المطار انزخو و يالله يالله و بعد مرمطة و شحططة طويلة هدوهم
على فكرة يو م تطليع الويز بيقولون لكم شو الاشياء اللي ما يسمحون بتدخيلها
و الله انه عندهم سياسة يبغو السواح يشترون من بلادهم و لا يجيبون شئ من برا تدرين بعد يخافون من الاشياء الي تدخل البلاد تسبب في اضرار او امراض ( عاد اتعرفين تفكير الاجانب )
بخبرج عن سالفتنا عيل 
كنا حاطين النعول في شنطه صغيرة تنسحب ام التواير ( لاننا كنا تقريبا تسع اشخاص ) و اتعرفين لازم كمن نعال و انتي بكرامه
المهم الوالدة شو سوت حطت كيس لقهوة و طوته عدل زينن ما زين و حطته ويا النعول
المهم ويوم وصلنا استراليا في المطار عندهم جلب ( كلب ) بوليسي الله لايراويج يشمشم الاغراض و الله عماه و سد خشمه عن القهوة و عدينا على خير لا وبعد كان في الاغراض هال بعد هه هه هه
و الا ناس انعرفهم بعد لاقيناهم هناك كانو يايبين بزار اتخيلي لا وبعد عطونا منه ياسلام و الولادة تطبخ لنا يالله و الله انا نحس بقيمت اكلنا في الغربة و انتوله عليه
آآآآآآآآآه تعبت جني وايد هذربت عليج يا اختي
المهم احنا بعد بنسير استراليا و ماليزيا لاسنة باذن الله في اول اسبوع من الشهر الياي
و للحديث بقية انشاء الله
صراحة ما عرفنا بهدلة جيه السفر الى استراليا .. أمس ريلي سار الى السفارة الاسترالية عشان الويزا..وطلبوا منه شهادة راتب والأجازة وكشف من البنك وتعبئة ورقة فيها أسئلة … الى درجة هوّنا نسافر لأستراليا ..بس ربعه مدحوا استراليا وايد ..
تدرين اليوم خبرني ريلي سالفة الأكل والكلب ..مع اني كنت ناوية اودي شوية بزار وياي ، بس الحين غيرت راي ..
وانتي ضحكتيني بسوالفج2
واذا أي وحدة عندها معلومات عن جولد كوست والأماكن الحلوة الموجودة فيها أرجوا أنها ما تبخل علينا ,..
بكل مكان وزمان ………
علشان ربي يوفقك ويبارك لك بها السفره وبالتوفيق …….
نسيت
المصحف لاتنسينه واعرفي مواعيد الصلاة هناك والله يردك بالسلامه
انتي واعيالك وابوهم ………
تحياتي …….بااااااااااايوووووووووووووو
مشكوووورة على النصيحة .. ولا توصين الحريص
تأكدي مستحيل أستغني عن الحجاب والأحتشام..
وأول شئ فكرت آخذه ..المصحف
والصلاة ان شاءالله أؤديها في أوقاتها..
و الله انا جد سايرة لاستراليا و ماليزيا و حابة افيدج ببعض الاماكن الي اتذكر انا سرنا لهم
و ما شا ء الله الاخت عوشه ما قصرت
المهم
بالنسبة لاستراليا فيها اماكن وايد روعة و حلوة
من الاماكن الي اتذكرها
Sea world
و هي حديقة مائية روعة مليئة بالالعاب
و بعد حديقة و الله نسيت اسمها بس فيها جميع الفواكة الاستوائية و على ما اعتقد اسمها
Tropical friut
و هي تقع في منطقة مرتفعة جدا و حتى جو المنطقة بارد و فيها كافة انواع الفواكه
و بعد الله يسلمج عندهم باص يسمى
Aqua bus
و هو عبارة عن باص و سفينة او قارب في نفس الوقت
يعني يمشي في الشوارع و يدش البحر بعد بس و اله كشخة اتذكر انه دش البحر و خذانا في جولة حلوة
انشاء الله نحن السنة بنسير لها و انشاء الله انشوفج