السلام عليكم ..
شلونكم عروسات ؟ ، هاي اول موضوع لي بهالركن .. لاحظت انه ماانفتح مثل هالموضوع الخطير !
قلت خل انزل موضوع و اشوف آراء المتزوجات ؟ و نتناقش ! و اتمنى التفاعل !
نبدأ ..
في بعض المناسبات اجتمع مع بعض الاخوات ( اعمارهم بي ال 20 – 40 تقريبا ) ، نفتح مواضيع كثيرة بعضها مفيد و بعضها للتسلية بس ! ، لكن الغريب بكل مرة انه لازم بالنهاية ينفتح باب الزوجية ! و على نهايته بعد !
كل وحدة فيهم تظل تتكلم شاللي يصير بينها و بين زوجها ! كان بالنهار و الا بالليل ..
تذكر مواقف تحسسني بالعار ، ليش انها قاعدة تتكلم بكل جرأة عن قدرات زوجها في الفراش !
افز من مكاني و اشوف لي ناس غير .. و المصيبة انه القاهم يتكلمون بنفس الموضوع ! بس بشكل ثاني ! بدل المدح ذم ! .. تسب و تلعن بزوجها و تقول كل اخطائه ليما توصل للغزير و توصف ضعفه في الفراش ! ..
طيب ليش ؟
انا ماشوف عندي هالطاقة اللي عندهم ؟ معقولة بس انا اللي احب زوجي و احترمه بينهم و الا شنو ؟
احيانا اقول لهم هذا شي غير جائز ! .. حرام شرعا التكلم في هالامور ! يضحكون و يكملون !
يتسلون !
اشرايكم انتو ؟
بالانتظار ..:flower:
في راي ان المراه اللي تتكلم عن زوجها وعن حياتهم الزوجية الخاصة بشكل خاص ما تستحق اني اعطيها بال
و بصراحة أكثر شفت حريم كثير من هذا النوع وموبس كذا فيه وحده تطرق لموضوع وصفت فيه " جسم زوجها " آآآآآآآآسفة على الكلمة بس و الله انا لما قالت كذا راح وجهي ألوان وبصراحة احتقرتها جداً
انا ما احب الزوجة اللي تتكلم كثير عن حياتها الزوجية العادية " اكلنا ,, خرجنا ,, قالي و قلتله ….إلخ " فما بالك اللي تتعمق اكثر
عن نفسي احب يكون اللي بيني و بين زوجي ملك لي حتى لو كان بسيط طالما عرفو الناس او ما عرفو ما راح يستفيدون شي غير اني دخلتهم في تفاصيل حياتي ….
جزااااااااااااااااااك الله خيـــــــــــــــــــــر
تحياااااااااااتي للجميـــــــــــــع
ترانيم ، افكارنا تتشابه !
انا مثلك ، بثيرون غضبي الل يتكلمون عن حياتهم مثل ماذكرتي ( شو قال زوجي و شو قلت له ) ! ..
اعتقد اللي جذي بعضهم يكذبون او يبالغون و يخلقون اشياء ما تصير بحياتهم او يمارسون الرياء على اصوله ! ..
كثير بنات يعتقدون ان الرجال للمفخرة و بس .. و تظل تتكلم لك عنه و عن محاسنه ! ..
طيب انا مالي علاقة ! عندي زوجيو الحمدلله ..
لا وتجيك وحدة بعد كل كلمة و قالت ( زوجي ) .. مثلا اتكلم عن الثياب .. قالت زوجي قال كذا ! ..
هالعدد من الزيارات ! و لا رد ثاني ؟ !!
اذا دل على شي ، بيدل على انه مافيه حد يفشي اسرار بمجتمعاتكم !
الحمدلله !
والله طرحتي موضوع حساس وااايد..الحمدلله ما صرت بهالموقف قبل وما اتمنى اقعد مع ناس واسمع مثل هالكلام
بالعكس انا اشوف اللي تتكلم عن مشاكلها و كل علاقتها بزوجها ما عندها سالفة…ولما تروحين اهني حق ركن قضايا وحلول تلاقين مصايب!!
استغرب شلون الوحدة تفصل حياتها مع زوجها…وين الخصوصية؟؟ حتى لو ناس ما اعرفهم او يعرفوني
الموضوع غلط..ومهما كان لازم اللي يصير بين الزوج و زوجته من حلو او مر يظل بينهم بس
هذا رايي ..
شوق .. اسعدني وجودك الحلو !! ..
ان شاء الله ماتلتقين بمثل الناس اللي التقي فيهم ! ..
ولكن اشكرج على طرحه مرة اخرى
لان الموضوع وهو افشاء اسرار العلاقة الزوجيه كثر بين البنات والنساء
اولا
شرعا لايجوز وحرام ولعنة من رب العالمين
لاحول ولا قوة الا بالله
ثانيا
هذا زوجي شلون اتكلم عنه بين النساء يمكن تعجب فيه اختي والا صديقتي
والله يهدي الجميع يارب
دمتم سالمين
اختكم شريفة
اما السوالف العادية مثل زفني او وداني او قالي لا تلبسين جذيه اتوقعها عادية هم الوحدة لازم اتقول عيوب زوجها عشان توخر الحسد عنها
وسلامتج
شوفي على اني متزوجة والحمدلله لكن اذا اجتمعت مع المتزوجات سواء حريم اعمامي او عماتي او بناتهم المتزوجات والله اني احس بنفسي للحين عذراء ..
لاني مستحيل اتكلم مثلهم وبجرائتهم …
اما السوالف العادية .. اي عادي اتكلم مع الكل مثلا رحنا جينا ذاك اليوم صادنا موقف وزوجي عمل كذا وكذا الاشياء العادية جدا ..
لكن امور الفراش مستحيل مستحيل مستحيل حتى اقولها لأمي اقرب لناس …
مشكورة عزيزتي
شريفة ،، أسعدني حضورك .. الحمدلله على نعمة الاسلام .. ذكرتي شغلة حلوة ، انه لما تتكلم الزوجة عن زوجها راح تلفت الانظار عليه و ممكن انهم يعجبون فيه ، و كثير مشاكل جذي ، اللي الصديقة تسرق زوج صديقتهها مثلا و العياذ بالله !
توتة ام حمودي ،، حبيبتي الله يكثر من امثالك .. !
حرم السويدي ،، يعجبني رأيك ! ،، و خلك دايما بعيدة عن اللي يتكلمون في أمورهم الخاصة !
و اشكر لكم مروركم !