اليوم موظوعي هو من المواظيع اللي شاغلة بالي، قلت خل أشاركم فيه، على كثر المواضيع اللي في المنتدى، اللي تتكلم عن الأم والأب والزوج والأولاد والعمات وخوات الريل و و و و و ……الخ، ما شفت موضوع يتكلم عن الجد والجدة (لاحظوا قلت ما شفت ما قلت مافي….) اليوم أنا حابه أطرح ها السؤال…. شو موقع جدك و جدتك في حياتك؟؟؟؟ عايشين معاكم والا لا؟؟؟ كيف تواصلكم وياهم؟؟
بخبركم ليش طرحت ها الموظوع بالذات..أنا من يوم ما وعيت على الدنيا وما شفت منهم إلا جدتي (أم أبوي، وكانت ساكنه معانا) وجدي (أبو أمي، ساكن بروحه مع زوجته الثانية)،،،، جدتي توفت ها السنة (الله يرحمها ويغفر لها)…وكانت وفاتها صدمة،،ما توقعنا نفتقدها لها الدرجة،مر على وفاتها 4 شهور وكل يوم تقريبا أقعد أفكر..يا ترى كانت راضية عني والا لا…صحيح كنت أزورها (بحكم أني متزوجة) وأيلس وياها وأهديها..بس بعد أحس أني كنت مقصرة..عشان جي قلت في العنوان (قبل فوات الأوان……!!!)…..
المهم ما بطول عليكم..أتمنى يكون موظوع مفيد..وياليت ألاقي تفاعل وكل وحدة تقول شو موقع جدها و جدتها في حياتها…..
انا وأعوذ بالله من كلمة أنا جدودي كلهم متوفين الله يرحمهم أمي عاشت يتيمه من الجانبين توفو أهلها وهي صغيره وأم ابوي أتوفت يوم أبوي الله يرحمه صغير وجدي أبو أبوي متوفي تقريبا لما كنت أدرس بالإعدادية وأنا الحين خريجه وموظفه يعني من زمان الله يرحمهم ويغفر لهم متوفين.
يعني بصريح العباره أنا ما لحقت أزعل جدودي لأني ما شفتهم أو بالمعني الصحيح ما لحقت ادلع عليهم وأقيس غلاوتي عليهم مثل ما عيالي الحين يدلعو مع جدتهم وجدهم من طرف أبوهم ومع جدتهم من طرف أمهم.
وننتظر المزيد من المشاركات…..
و انتي ييتيني عالوتر الحساس
لأنه يدي ابو امي الله يرحمه اتوفى من حوال 4 شهور تقريبا بس لين الحين مب قادره انساه
و في اي وقت اذكره و احن له بشكل كبييييييير
لأنه كان يقول لي دايما اني يحبني وايد ودوم ينشد الوالده عني لمن تتصل ( للعلم اني من دبي و اهل الوالده عايشين في عمان)
كنت اتصل به السنة لي قبل لا يتوفى الله يرحمه بس مب دايما
و العيد هذا ذكرني فيه لأني آخر مره شفته كان عيد الفطر في السنة لي طافت
حاولت اوصل اشوفه قبل لا يتوفى الله يرحمه بس اراده الله سبحانه اقوى وصلت و ما وصلت في نفس الوقت :confused:
احمد الله اني ما شفته في الحاله اللي وصل لها لأني ما ادري شو بيصير فيني لو شفته
يدتي من امي الله يحفظها عايشه لين الحين احن لها بس مب شرات يدي الله يرحمه
و ام ابويه عايشة الحمد لله بس أحس انها يدتي بالاسم لا غير
و ابو ابويه متوفي الله يرحمه أيام ابوي صغير
و الله يرحم جميع المؤمنين و المؤمنات ان شاء الله الأحياء منهم و الأموات و الله لا يبعد عنكم غالي يا رب
انا الصراحة عندي اليدّتين عايشات والله يطول بعمرهن .. بس يدودي متوفين الله يرحمهم
بالنسبة للأيداد .. ابو ابويه توفى قبل ما انولد وابو امي توفى وانا عمري 9 سنوات تقريبا واذكره مثل الحلم!
اما بالنسبة ليدّاتي … ام امي وايد اجوفها لأنا نروح العين مع بعض في الاجازات والويك اند وان شاءالله بعد بكره بنروح معاها العين في اجازة العيد الوطني 
.. وهي تزورنا ونزورها يعني اعتقد انها راضية عليّه والحمد لله :yes:
أما بالنسبة لأم ابوية .. الصراحة احس اني وايد مقصرة وياها .. وما اشوفها الا في الاعياد واحيانا في الشهر ازورها مرة
مع انه بيتهم قريب من بيتنا وما في خاطرية شي عليها بس ما ادري ليش اتكاسل اني اروح لها :no:
بس ان شاء الله تكون هي راضيه عليه لأن الصراحة محد من الاهل مقصر وياها ودوم زحمه عندها بعكس يدتيه ام امي فديتها قليل ما حد يزورها
بس بصفة عامة ثنتينتهن طيبات واحبهن لكن يمكن ام امي اقرب لي واحن عليه من ام ابوية .. والله يعطيهن العافية وطولة العمر ويخلي امهاتنا وابائنا وما يحرم حد من غالي … آمين
جدي لأبوي توفى وابوي الله يخليه لنا عمره 12 سنة يعني ما شفته
جدي لأمي توفى وعمري سنتين بس ما أذكره اصلا ولا اعرفه الا في الصور
جدتي لأبوي توفت قبل 3 سنوات ووفاتها كانت صدمة لنا لانها كانت بصحتها وبقوتها الله يرحمها تركت مكان
جدتي لأمي عايشة مع خالي الصغير ونحاول كل فترة نزورها ( انا وزوجي ) بحكم اني اعيش في مدينة ثانية بس احاول اني ما اقصر معاها الله يخليها لنا
باختصار جداتي ما عاشوا معانا رغم ان ابوي كان يصر على امه وام امي انهم يجون يعيشون معانا بس كل وحدة عندها بيتها … وما تحب تطلع منه احس هالشي من طبع الكبار اذا وصولوا مرحلة معينة في السن مايحبون يحسون انهم عالة على أحد
وجود الكبير بركة في البيت … بس للأسف مو الكل يهتم بهالشي … الناس صارت ترسل اهلها الى دار العجزة بمجرد ما يكبرون في السن … هو مو غلط لو كان الاولاد في بلد ثاني او كان المسن كبير بس لو كل ولد وبنت بصحتهم وبيتهم ويرسلون اهاليهم لدار المسنين ………… حرام
اتمنى اني اقدر اسوي شي لجدتي قبل لا أندم عشان يرحموني عيالي اذا كبرت
أختي أم أشولي، الله يخلي لي كل اللي تحبينهم،،أنتي وكل بنات المنتدى
وهلا هلا في الشوابزين عندي سؤال……….منو يدها أو يدتها في دار رعاية المسنين؟؟؟؟ وليش؟؟؟؟؟؟
أنا الحمد لله ما عندي حد..وانشاء الله أبد ما يكون….