السلام عليكم
ازيكم يا قمرات؟
النهاردة جايبالكم طريقة الكشري المصري على اصولة ولا اى مطعم من مطاعم الكشري
ودة طبق منى ليكم
وانتظرونى بعد الفاصل بالمقادير والخطوات
طبعا احنا عارفين ان الكشري فيه مكونات كتير وبيستهلك اوانى طهى كتير
لان فيه
الكشري نفسه
والمكرونة
والصلصه
والدقه
والبصل المحمر
والحمص " مش بنفضله عندنا"
اهم حاجه زى ما منال العالم بتقول تحسبي خطواتك وتنظمى نفسك علشان تنجزى وتخلصي في الوقت المناسب بدون اجهاد
فبحب اول ما ابتدى ابتدى بالدقه علشان تاخد وقتها وتتبل وتاخد الطعم المطلوب
وبعدها ابتدى في البصل والكشري لانهم مرتبطين ببعض
وفي نفس وقت عمل الكشري ابدا في الصلصه
وفي الاخر المكرونة المسلوقه لانى بحب استخدمها على طول
كان لازم من البداية دى ونبتدى بسم الله
اول حاجه
الدقه
" للاسف صورة المكونات اتمسحت"بس هيا سهله جدا
حوالى 4 فصوص ثوم مفرومة ناعم
1 ملعقه صغيرة كمون
ملح حسب الرغبة
2 ملعقه كبيرة خل
كوب ماء
الطريقه
نضيف الثوم والكمون معا
نضيف الملح
ونقلب ثم نضيف ملعقتى الخل
ونضيف الماء ونتاكد من الملح
ونعبيه في زجاجه مناسبه
كده خلصنا الدقه في ناس بتحب تخليها مشطشطة بانها تضيف فلفل حامى
نبتدى بالكشري والبصل المحمر
مكوناتة
مقدار بصلتين متوسطتين مقطعين جوانح
عدس بجبه مقدار كوب
كوبين رز مصري
نص كوب شعرية
كمون
ملح حسب الرغبة
زيت "حوالي نصف كوب"
3 كوب ماء
الخطوات
نضيف للبصل ملح "حوالى ملعقه كبيرة ممسوحه" ونقلبه جيدا ونتركة مده 10 دقائق "حتى يصبح مقرمش"
نغسله بالماء حتى نزيل الملح
في الوقت الذي نضع فيه الزيت في الانيه ونضع عليه البصل
ونقلب
هنا قرب ياخد اللون الذهبي
اخد اللون الذهبي
نخرجه على ورق نشاف " ويستخدم في الاخر لتجميل الوجه بتاع الطبق"
نضيف الشعريه على نفس الزيت
حتى تتحمر
ونخرجها على ورق نشاف
نضع العدس على نفس الزيت
ونقلبه حتى يتغير لونة
نضيف الماء
ونتركه حتى يغلي ونوطى عليه لمدة تقريبا نصف ساعه "نصف سوى"
في هذه الاثناء نبدا بعمل الصلصه ولكنى ساذكرها في الاخر
بعد نصف السوا
نضيف الشعريه
ثم نضيف الرز بعد غسله جيدا
ونقلب " سنلاحظ ان مستوى الماء اعلى من مستوى الرز" لو لاحظنا ان كمية الماء اقل ممكن تزويدها
حتى يتشرب ميته ونوطى عليه لمدة تقريبا نصف ساعه ليتم سواه
وهنا قارب عالاستواء
الصلصه
المكونات
ملعقتين زيت
بصله متوسطة مفرومة
4 فصوص ثوم مفرومة
5 قطع طماطم مضروبة بالخلاط "بتكون عندى مفرزنة"
2 ملعقه معجون طماطم
2 ملعقه كبيرة خل
ملعقه صغيرة كمون
ملح حسب الرغبه
الطريقه
نضع الزيت في كسرولة او اناء عميق
ونضيف البصل حتى تذبل
ثم نضيف الثوم ونقلب
ثم نضيف الطماطم ومعجون الطماطم
ونتركها تغلي
ثم نضيف الخل والكمون
ونتركها تتقل شويه عالنار
في الاخر المكرونة
بتكون منها نوعين اسباجتى وممقصوصة صغيرة وممكن اى شكل تحبيه كمان بس دى اصولة
بتسلقيها عادى بعد ما الماء يغلي نضيف الملح والزيت والمكرونة حتى تتم سواها
نصفيها من الماء ونضيف عليها معلقتين زيت كبار وبس
وفي الاخر ده طبق الكشري بتاعنا
وبالهنا والعافيه
بالنسبة لترتيب الطبق
الكشري وعليه المكرونة وبيجمل بالبصل المتحمر
وبجانبه الصلصه والدقه
ويارب الاكله تعجبكم