شعور غريب لما أكتب موضوع ما له علاقة بالمطبخ هههههههه
بس حبيت أشارك معاكم فكرتي في عمل توزيعات على أشكال فوانيس…
الفكرة كانت موجودة في راسي من زمان، لكن ترددت في طريقة التنفيذ…
و جاني الإيحاء من إعلان لمطعم Applebee’s، و بعدها تشجعت و نفذت الفكرة و الحمد لله نجحت و بقوة :thumbs_up:
نبدأ بسم الله…
في البداية حبيت إن يكون لون الفوانيس كحلي، فاخترت ورق مقوى لون كحلي مقاس A4…
أول شي بنسوي قاعدة الفانوس
بيكون شكلها مثل الصندوق أو العلبة الصغيرة…
حددت القياسات اللي راح استخدمها، و كانت 8 و نص إنش في 8 و نص
و قصيت الزايد…
بتلاحظون إن مقاس الورقة بالطول كان أقل بشوي من 8 و نص إنش، لكن مو مشكلة، نكمل عادي…
بعد ما قصيتها، جبت المسطرة و قست 2 إنش من كل الأضلاع و باستخدام السكين الخاص بالرسايل، سويت حزوز في الورقة…
يعني أمسك المسطرة عند مقاس 2 إنش و بدل ما أرسم خط بالقلم، أسوي الخط بالسكين، مثل هذا الشكل…
هالحركة تسهل عليّ طيّ الورقة عند الحدود اللي أحتاج أثنيها…
بعد ما خلصت التحديد، طويت الورقة على الأماكن اللي حددتها، مثل كذا…
بعدين جيت عند الزوايا و قصيت بالمقص…
نجي نطبق العلبة على بعض، أنا استخدمت اللزقة أم وجهين، (ما عرفت لها اسم ثاني)، يعني اللي تلزق من الوجهين Double sided tape…
ممكن تستخدمون إصبع الغرا الجاف مكانه، لكن اللزقة أثبت… و هنا ما حبيت أستخدم مسدس الصمغ، لأنه يكرمش الورق و يبقى بارز يشوه الشكل!
الحين نقلب الورقة اللي طويناها، و نحط اللزقة على المربعات في الزوايا…
نرجع نعدل الورقة و نقلبها على وجهها الثاني، و نلزق الأضلاع ببعض…
و في النهاية بيكون عندنا علبة صغيرة…
و هذي مجموعة خلصتها…
الخطوة الثانية بتكون شكل الفانوس…
و بنحتاج لكل علبة فانوسين…
جبت ورقة ثانية من نفس النوع السابق، و رسمت عليها شكل فانوس…
أنا هنا رسمت فانوس على ورقة عادية و قصيته و صرت أحدد بالرصاص على الورق الكحلي…
كل ورقة تكفي فانوسين…
و قصيت أشكال الفوانيس باستخدام المشرط… حسيته أسهل من المقص و أسرع، خصوصاً إني أقص على نفس اللوح الأخضر اللي أشتغل عليه عشان ما يخرب لي سطح الطاولة…
و هذي مجموعة… 6 أشكال فوانيس تكفي لصنع 3 علب، لأن مثل ما ذكرت بنحتاج فانوسين لكل علبة!
بعدين جبت ماركر ذهبي و حددت الفوانيس بهالشكل… بتلاحظون إني ما حددته كله، بتعرفون ليش بعد شوي 😉
و عشان أعطي إيحاء إن الفانوس مضوي، زينته بستيكرات ذهبية على شكل نجوم 
و بنفس الماركر الذهبي، رسمت أشكال، شي مثلثات و شي دوائر و شي مربعات… يعني تزيين بسيط للفانوس…
و في نفس الوقت حطيت لزقة على قاعدة الفانوس، مأشر عنده بقلم الرصاص…
نرجع الحين للصندوق اللي سويته، هنا ثبت عليه الفانوس…
و جبت الفانوس الثاني، و ثبته في الجهة المقابلة للفانوس الأول…
و لأن التوزيعات بتكون محمولة باليد، فبنحتاج نسوي مقبض للفانوس عشان نمسكه منه…
أنا تعبت نفسي بالحركة اللي بتشوفونها الحين، و متأكدة إن في شي جاهز، لكن لضيق الوقت ما فضيت أدور فاكتفيت باللي لقيته…
جبت أسيام مثل هذي…
و جبت ورق تغليف الهدايا أو الكتب (جلاد) بس النوع اللي يلزق، و اخترت اللون الذهبي عشان يمشي مع زينة الفانوس…
و قصصت منه شرايط رفيعة…
و هنا بديت المرحلة المتعبة، مسكت الأسيام، واحد واحد و بديت ألف الشرايط عليها…
و هنا لما خلصت…
و هنا ثبته بالفانوس…
اللي سويته إني أول شي جبت إصبع الغرا الجاف و مشيت على المساحة اللي مبينة عندكم في الصورة، و فوقها حطيت اللزقة على قاعدة المثلث اللي مبين في أعلى الفانوس، و بعدين ثبت السيم… طبعاً هالحركة سويتها على الفانوس الثاني المقابل له بعد عشان أتأكد إنه يلزق تمام و يصير السيم يتحمل يشيل وزن العلبة!
و هنا لما طبقت الفانوسين على بعض و السيم جاي بينهم…
طبعاً، تميت ضاغطة عليه فترة عشان أتأكد إنه لزق تمام!
نجي لآخر خطوة و هي الهلالات…
من نفس ورق التغليف الذهبي، قصيت أشكال هلالات نفس مقاس الهلال اللي في الفانوس…
و بعدين لزقتهم على الهلالات في الفوانيس…
و بكذا صارت علب التوزيعات جاهزة 😎
و هذا شكلها من الجنب…
و هنا بعد ما حطيت التوزيعات داخلهم…
بالنسبة لعبارات التوزيع، كنت مخططة إني أطبعها بلون ذهبي على نفس الورق و أثبته على الفانوس، و جهزت الشكل، لكن إكتشفت إني غلطت غلطة كبيرة!!! كانت العبارات المفروض تتثبت على السيم، يعني أخرمها و أدخل السيم فيها، و غلطتي إني سكرت الفوانيس كلها و لا أقدر أرجع أسحب السيم أو أفكه!
فاللي سويته، إني كتبت عبارات التوزيع بالماركر الذهبي على نفس العلب، على القاعدة… و طلع شكلهم حلو!
و بكذا خلصنا فوانيسنا… و إن شاء الله المرة الجاية أحط لكم طريقة عمل توزيعات على شكل أكياس…
في النهاية بس أبيكم تدعون لأختي إن الله يوفقها في دراستها، لأنها المسكينة تحملتني و أنا أشتغل على مكتبها طول الوقت و هي كانت محتاجته في مذاكرتها <<< ما انعطى وجه :rolleyes:
F:
عن نفسي راح اطبقها لالشئ
فقط لانها اعجبتني كثيرا
الله يوفقك
وماشالله عليكي فكرة التوزيعات تجننن:thumbs_up: … تسلم الايادي يااارب تم التقييم والتميز
وننتظر فكرة الاكياس ماتنسينا;)
يعطيكي الف عافية F: وربي يوفق اختك في دراستها ويكون النجاح دووم من نصيبها
مشكوره ياقمر
بصراحة ابدعتي
ماشاء الله عليج ام راشد
مبدعة في كل شي ماشاء الله تبارك الرحمن
مايحتاج اقول رايي رووووووعة وشغل مرتب 😉
يعطيك الف عافيه
تم التقيييييييييم
روعه
مبدعه تسلم ايدك على الشغل الحلو والشرح الواضح
تم التقيم
وفنانة في المطبخ وغير المطبخ كمان
عجبتني الفكرة كتير حلوة
وأحلى تقييم لأحلى أم راشد
والله يعطيكِ العافية يا رب
شغلك مميز ومرتب وحلو كتير ..رح أعمل لبنتي متل هالفكرة بتعجبها كتير على العيد ..