اليوم وأنا أعابل أغراضي ياتني فكرة إني أكتب موضوع عن مستحضراتي للنظافة .. أغراض الغسل والسبوح اللي معتمدنهم هالايام ..
– أنا من النوع اللي يحب يغير بس فيه بعض الاشياء تظل ثوابت بخبركم عنها ..
– هالاغراض أستعملهم هالفترة من شهر 9 لين 12 وبعدين اللي بيخلص ببدله بشيء يديد أكيد إلا الثوابت
الصور جماعية للأغراض ,. واللي تبا صورة منتج معين تخبرني وأنا بكتب انطباعي عن كل منتج حسب ما شفت بعد الاستعمال ..
طبعا بنات ردودكم ترفع الموضوع وتنشر الفايدة خاصة إني تعبت في التصوير والكتابة ..
وأخيرا أتمنى عدم نقل الموضوع لأني بروحي بقوم بهالمهمة
تفضلوا ..
الرف الاول في رفوف المغسلة .,
من اليمين لليسار :
غسول من استيفيز .. روووووووعة وطبعا من ثوابت الاغراض عندي بس ما يتحصل بسهولة فيه حمض الهايلونيك اللي ينظف البشرة على طول ولكنه موب للاستعمال اليومي ما
محلول قابض من كلينيك : فااااااااااااااشل .. صار له سنة عندي وأبا أخلصه لأني مستخسره أعقه .. فاشل وكل هالمجموعة مالته فاشلة .. بطلعة الروح خلصت
الماشين هذي مال بخ الماي .. لتنظيف بين الاسنان .. أحبها
هذي صورة ثانية بدون الماشين ..
اللي ورا لونه بيج .. ماسك طين البحر الميت .. مستواه نص نص
محلول عدسات .. عادي
سكراب من كلينيك .. نص نص .. عينة طبعا لأني ما بشتريه أكيد
الاسود اللي وراه ماسك طين بركاني من ماك .. نزل ليميتد وخميت لي كمن حبة .. رهيب ..
ماسك ترطيب من ديور .. حلو
المرهم اللي على جنب هذا .. سكراب رهييييييييييييييب من ماركة sd. وما أعرف باقي الاسم بس روعة روعة روعة أسويه بالماشين اللي قدامه منسدحة أركب لها الفرشاة وأسكرب به ويهي قبل أي مناسبة وأنا أسوي تنظيف البشرة مالي .. وااايد حلو
آخر أنبوب هذا سكراب بالجوز والنيم من هيملايا أعشاب … ماشي حاله ..
الظروف الفضية على جنب طايحات هذا قناع التسخين الذاتي من الماركة اللي تسوي لصقات الخشم ( ناسية اسمها الحين )
الرف الثاني
سكراب الريول من شول .. ما أستغني عنه يوميا .. روعة
سكراب التبييض مال الجسم من هوليود ستايل .. حلو وأحب أسكرب به أيدي
مضمضة كولجيت .. أنا أستعمل نوع ثاني أخذه من دبي بس لأنه مخلص مبدلة بهالنوع .. زوين
العلبة البيضاء عدة أظافر وملاقط
السلة السوداء فيها فرشاة أسناني وفرشاة تنظيف الويه لأني أحب اغسل ويهي بالفرشاة
المعجون النوع الثابت هو كلوس أب أحب هالبراند للمعجون خاصة بالليل أستعمله وفي النهار أستعمل أي براند خفيف .. هاليومين أستعمل سيجنال اليديد وموب حلو سينسوداين أحلى عنه ,.
العلبة الزرقاء الصغيرة محلول إزالة مكياج العيون من لانكوم .. طبعا عينة .. حلو الصراحة بس ما بشترية
والاسفنج الأصفر مال تنظيف الويه .. أبلله وأشيل به الحليب مزيل المكياج يوم أنظف ويهي ..
الرف الثالث :
غسيل اليد من نيفيا .. مستواه جيد وأنا ما أحب أستعمل ديتول ولا لايف بوي لأن يجففون ايدي ..
اللي قدامه مزيل ميك أب الويه ..
الانبوبة اللي عليها ورد من ماركة استيفز ( تعجبني هالماركة) مزيل ميك أب ينغسل .. مستواه جيد
اللي بعده سكراب المشمش الشهييييييييييييييييييير
الكيس اللي جنبهم (وردي على الطرف) هذا أحسن قطن ميك أب استعملته في حياتي بس سعره صلخ كيسه صغيرونه ب 13 درهم ,. ليش؟؟؟
فيه أنواع ثانية زينة بصورها لكم بعدين بس هذا النوع الافضل وأنا بصراحة ما أشتريه دوم لأني أستهلك وااايد قطن ولأنه ما ينباع إلا بأماكن معينة ..
الكيسة البيضاء اللي على الجنب فيها شاش .. أحيانا أستعمله علشان أشيل ميك أب العيون .. يشيل أسرع عن القطن
العلبة الشفافة بغطاء وردي هذا مزيل بايوديرما للعيون .. أستعمله من 5 سنين أحسن مزيل ميك أب عيون جربته .. استعملت كذا نوع وأرجع لهذا في النهاية وتقريبا أستعمل علبة كل شهر ونص ..
اللي قدامه علبة بيضاء بضاغط أخضر هذا غسول الويه للبشرة الدهنية والمختلطة من بايوديرما .. روعة ..
…………..
الحين خلصنا سوالف الويه .. بنسير صوب رفوف الشووور مالي ..
تفضلوا:
الرف العلوي : رف الغرائب..
الساعة الفضية هذي مؤقت .. أضبط الوقت اللي أباه وأشغلها ويوم ينتهي الوقت ترن .. هذا تنفعني للماسكات مال الشعر وخلطات الجسم .. أضبط 10 دقائق أو ربع ساعة أو أي وقت أبا ومن أخلص ترن ..
الساعة البيضاء علشان أعرف الوقت يوم أتسبح ..
أنا وايد أحب السوع .. فيه ساعة معلقة في الحمام بس هذي حق الشور رووم
والملة والقفشة البيضاء هذيل حق التخلص .. خاصة ماسكات الشعر أحط الماسك وأخلطه بماي أو زيت حسب نوعه .. أخلطه في هالصحون .. هذيلا هفي كوالتي .. من زمان عندي ومال كد
وطبعا العروسة للديكور :12 (72):
الوردية اللي فوق صابونة يديدة أبا أجربها أونه للتبيض
الكرتونة العيناوية على أسود أنبولات زيت تستعمل مرة شهريا وتنخلط بماسك الشعر علشان التغذية والرعاية مال اللي مسوين كيراتين
العلبة العيناوية الصغيرة ماسك سريع للشعر ( ينحط 5 دقايق ) من لوريال وبعد للشعر المكرتنن:12 (42):
الانبوبة الخضراء اللي وراء سكراب حلو للأندر أرم والبرايفت ايريا
العلبة اللي فيها سائل أخضر هذا غسول الويه من هيملايا أعشاب بالنيم .. علشان أنا أحب إن أخر خطوة في سبوحي أغسل ويهي ..
الرف اللي بعدووووووووووووووه
غسول الجسم من دوف .. ريحته رمان لذيذ
العلبة البيضاء ماسك للشعر من شوارسكوف .. بالخوخ .. بعد ريحته لذيذة .. أنا أستعمله حق شعري مع إنه موب مكتوب عليه للكيراتين .. بس للشعر المعالج ويالله أنا أخبصه بشعري ..
فيه نوع ثاني منه بالقمح واااايد حلو وما أصبر عنه .. هذاك أخففه بماي .. هذا خفيف أصلا لأنه مال 5 دقايق
العلبة العيناوية اللي جدام .. شامبووو للشعر المكرتن من لوريال
العلبة البرتقالية اللي ورا .. شاور جل بالعسل من كريم 21 ريحته تجنن ..
واللي قدامه شاور جل بالحبيبات من استيفيز بالمشمش وريحته حلوة ..
آخر رف :
شامبو دوكاري للتساقط : أروع شامبو تساقط ممكن تستعملونه .. وما ينفع للشعر المكرتن .. بس أنا أستعمله لأني شعري طااااااااح
العلبة البنفسجية هذا الماسك اللي أخلطه مع أنبولات الزيت
القطعة الزرقاء البحرية هذي حجر الريول من شول أستعملها بين فترة وفترة
العلبة الرمادية شامبو القشرة
والزيت خلطة زيوت الجسم أنا مسوتنها حلوة لأيام الشتاء ..
اللي تحت .. مافيه إماراتية موب محطيه أغراض على جوانب الشور :12 (19)::12 (72):
البنيات المقلوبات : شامبو وبلسم للشعر المكرتن
العلبة البيضاء QV سائل غسيل الجسم خالي من الصابون أستعمله بعد الليزر 3 أيام
شاور الجسم بالزبدة والعسل من استيفز
العلبة اللي تحت خلطتي الصابونية .. واللي فوقها ماسك للشعر يايبتنه من سوريا فظيييييييييييييع .. وأخففه بالماي
وأخيرا العلبة البيضاء هذي صابون النظافة اليومي اللي أستعمله للجسم لأني ما أحب لا ديتول ولا لايف بوي ..
…………………
أتمنى تكونون إستمتعتوا في الرحلة وما صدعتوا من الهذرة ..
أي سوال أنا بالشوف .. ومرحبا بكم ..
عواتكم لي الله ايسر لي أموري ويوفقني
حبوبة الصور ما طلعوا حاولي ترفعينهم من مركز رفع الملفات (الخاص بمنتديات عروس )
موفقة حبيبتي F:
بس ياريت تضيفين الصور