خمس نصايح من rose2024 لتغير ديكور غرفة ابنتك .الدخول أجباري. 2024.

خمس نصايح لتغير ديكور غرفة ابنتك

البنات دائما يحبون انهم يقضون وقتهم بغرفهم . فهو مكانهم الوحيد او بمعنى اخر مملكتهم الوحيده المكان الي مو بس ينامون في لا هو المكان الي تنطلق به مخيلتهم الى عالم اخر من منا ما كانت تتخيل من كنا بسنهم , نتخيل شراح نلبس اليوم يوم نروح بيت خالتنا او نكون معزومين بعرس بعد شهر ونضل نتخيل لبسنا وتسريحة شعرانا, وايظا تخيلات اخرى بالمدرسه تخيلنا انا الصف كله يصفق لنا على نجاحنا وتفوقنا وعلشان نحقق هالاحلام ندرس من كل قلب .

فما هي الطريقه الافضل علشان نساعد بناتنا علشان تتحقق احلامهم ؟ انا احنا نحيطهم بالي يحبونه ! ولبد ان نتعاون نحن وابنائنا بعمل غرفتهم ويكون ترتيب وتعاون مو بس علشان نسوي غرفه حلوة وجميله لا راح يكون بينك وبين طفلك اتصال وراح تدخلين عالمهم اكثر

بعد شوي وراح نقرى سوى خطوات او نصائح لخطوات عمل ديكور جميل للغرفة البنوتات .

النصيحة الاولى
الأستماع

أهم شي اسمعي افكار ابنتك, تذكري اهي غرفتها مو غرفتج يعني لا تحاولين تجبرينها او تفرضين عليها فكرة هي مو حابتها بهالطريقة راح تطمسين افكارها وتحرمينها انها تبدي رايها وتتكلم عن كل شي تحبه لانها بتحس انك مو مستعدة تسمعينها دامج قررتي الي بتسوينها بالغرفه .

يعني مثلا قوليلها ها يا بنيتي شنو تتمنين تكون غرفتج شنو فيها شنو الون تحبين الورود وله شنو رايج بهالشي ..ألخ راح تقول اول شي هااا ما ادري عادي اي شي بس صدقيني في واايد شغلات بس لان خبرتها قليله بالمحادثه او بطرح افكارها او احلامها توها بس شوي شوي بتهل عليج أفكارها وتخيلاتها بتقولين بينج وبين نفسج يحليلها بنيتي والله كبرت.

ما اقولج ابدا لا تبدين رايج بالعكس حاوريها وبما انج انتي الام وخبرتج ااكبر منها فتقدرين تعدلين من بعض الافكار بكلمات اقل ديكتاتوريه مثلا صح حلو بس لو هالشي او مثلا افكارج حلوة بس شرايج بهشي..ألخ

وممكن اعطيج فكرة

راح انزلج بعض الصور خلي بنوتج تتخير الرسمه الي تبيها حفضيها بسيدي وروحي لطباع او المكتبه بيكون عندهم الطابعات للوسائل المدرسيه وطبعي لها الصورة بالحجم الي تشوفينه مناسب وحطيلها ايطار وعلقيها بالغرفه
مثال لصور

وممكن تبحثين عن صور اخرى بالنت او ممكن تلاقينها جاهزة بالسوق
بس افضل الطريقه المطولة تبحثين عن الصورة تشترين اطار على حجمها وطبعا كل هذا وبنتج او بناتج معاج .

شرااااااايج بأختج أم زهراء.؟…؟؟؟؟؟

نكمل خطواتنا بالنصايح

النصيحه الثانيه
اعدة ترتيب تغير الاثاث

في بعض الاثاث جديد او ليس قديم جدا ممكن تغيرين في مثلا التسريحه الي تكون للمكياج والعطور وبها المرايا ممكن تشيلين المرايه الي تكون مكبوسة مع التسريحه
تجيبين مرايه ثانيه بشكل جديد مثلا ممكن تكون بنقشة جميله , وتعلقينها على الحايط بمسافه متناسبة مع التسريحه .
مثلا كما بالصور

وممكن ايظا تختارين مراية على ذوق البنت يمكن ماتحب هالنوع ممكن تحب الاكثر نظوج خاصه اذا كانت مراهقة فهي تحب دائما ان تقتني اشياء البالغات من كعب ومكياج ..ألخ.
وايظا في اثاث ثاني يحتاج مجرد لمسة ويصير جديد مثل السرير ممكن تكثرين في الوسائد المختلفة بالحجم والنقش وممكن ايظا اظافة دبب

ممكن تكون الوسائد على شكل قلب او زهور مثلا

النصيحة الثالثة
الفكرة والتردد

اختي العزيزه بما انكي ام فاكيد تعرفين انه مزاج الاطفال متقلب دااائما
مثلا اذا فرشتي الغرفه بالسجاد الوردي هل راح يبقى هذا الون جميل بعين ابنتك الى سنة تقريبا؟؟ او اذا وظعتي لصقات راح تظل تعجبها للاسبوع القادم, او اذا وظعتي ورق الحائط بصور كرتونيه او ابطال افلام كرتونيه راح يبقى مفضل عندها؟؟
يعني لزم تتاكدين قبل عمل شغلات لا يمكن تغيرها بسهوله كصبغ الغرفه مثلاً
ولكن كما قلت ان الاطفال او حتى المراهقين فمتقلبه افكارهم لذالك حاولي تنسقين الديكور او تظعين الديكور سهل التغير.

النصيحة الرابعة
تأثيرات بسيطة

ممكن تغيرين غرفة ابنتك بحركاة بسيطه او تاثيرات بسيطه مثلاً
بدل صببغ الغرفه بالكامل ممكن تستخدمين عدة طرق منها
رسم الاشكل مثل الورود صغيرة
وذالك عن طريق استخدام الرسم بواسطة الاستنل
وممكن تستفيدين من الرابط بمعرفة طيرقة الرسم بالاستنسل

http://www.3roos.com/forums/showthread.php?t=124814
او لطخات من الصبغ على الحائط
وهنا الرابط لتعلم طريقة الطلاء على الجدران

http://www.3roos.com/forums/showthread.php?t=78171

النصيحه الخامسة
المتعه والمرح

بتظيع وقتك مع بنتك وانتي تصبغين او تعيدون تجديد ديكور الغرفه بيكون اكيد وقت كله مرح والاكثر انه انتي بتتعرفين على بنتج اكثر وهي بعد بتتقرب لج اكثر , وممكن بعد الانتهاء انها تعزم صديقاتها بالمدرسة او بنات خالتها او عمتها صدقيني بتحس انها بفرحه كبيرة يوم تقول اي انا وامي سوينا الغرفه وستانسنا وراح تقولهم على المواقف الي صارت المظحكه اكيد .
وهذي النصايح ممكن تكون قليله لان في واااااااااايد نصايح كنت احب اكتبها لكم بس اعتقد هذول اهم خمس نصايح ولا تنسون انه راح تكون في مرة ثانيه هذي مو المرة الاخيرة الي بتسون فيها الغرفه ممكن كل ستة شهو او كل سنة مثلا تغيرين فيها غرفتها او ممكن قبل بداية كل سنة دراسية علشان تحس بجو جديد ومافي ملل
وربي يوفقكم ويخليلكم بنياتكم ويوم ياربي تزورونهم ببيوتهم وهم امهات واكيد يوم يتركونكم لحياتهم الجديده بتكون معاهم ذكرياتهم الحلوة ماكم وبالاخص ذكرياته مع الام .

وتقبلو تحيات اختكم
rose2006
أم زهراء