راح اسكن بنهاية هذا الشهر مع زوجة اخو زوجي بنفس البيت
بس ماابي اسوي معاها ولا اي مشكلة وابي اعيش بسعادة مع زوجي
ابي اتحاشى اي فرصة تخليها تعمل معي مشكلة او تاخذ مني موقف
حنا تونا ببداية حياتنا لكن اهيا متزوجة من فترة يعني تقريبا 10 سنوات
عندها بنت وولد صغار توهم بالابتدائي
بشنو تنصحوني حتى اكوون سعييدة مع زوجي ونعيش بهدوء بعيد عن تدخلات الغير
تكتري عنها ولا تتدخلين بحياتها ولاتخلين لها مجال تتدخل ولا تييبين سيرة حياتج الخاصه مع زوجج جدامها خافي باجر تقلب عليج وفي نفس الوقت خلي نيتج طيبه يعني حرص ولا تخون.
انا عايشه معاها تقريبا ومبسوطه حيل وياها
تدرين ليش
لان نيتي صافيه معاها وهي مثلي
فصايره لي اكثر من اخت
حبيبتي صفي نيتك معاها وبتكون معاك بالمثل وبترتاحين
وصدقيني بتكون لك عون في كثير اشياء ممكن تمر عليج
الله يحفظك
بعدي عن الأسرار والقيل والقال
يعني خلي نيتك صافية معاها بس لا تجلسين تتكلمين في أهل زوجك عندها …حتى وإن جارتك في الكلام أو ابتدت فيه …ترى بكرى يصير شي ماعملتي له حساب
زوجات أخواني ثنتين منهم كانوا سمن على عسل ماتتخيلين علاقتهم ببعض…رايحين ..جايين..طلعات وتمشيات دايما مع بعض لمده فوق الاربع سنوات وبعدين كل وحده انفصلت ببيت و طلعت سوالف وخبايا الثانية .وكل وحده تعاير الثانية بالجمايل اللي عملت لها
فخليك معاها حلوة بس لا تخلينها تحمل لك جميل و مالها شغل بحياتك…يعني ابتعدي عن نصايحها لأنك انت ادرى باللي يصلحك انت وزوجك …ورتبي معاها سالفة الطبخ مو وحده تطبخ والثانية بس تاكل.
الله يوفقك
انا بعد شقتي في بيت اهل زوجي وحماي بعد اكبر من زوجي شقته في نفس البيت لكنهم قريب بيطلون بيتهم الجديد ان شاء الله ، انا طالبة وهي تشتغل ممرضة ودوامها شفتات فاللي صاير ان احنا ما نلتقي وايد ولما نجتمع في بيت عمي احيانا هي تكون بالشغل وبالعكس صايرة علاقتي بمرت حماي الثانية اقوى من علاقتي في اللي ساكنه معاي ..
بس عموما علاقتي بكل حريم اخوة زوجي طيبة والحمدلله :9_33:
بس في شي تجنبيه ::
اختي اول ما انخطبت كونت لها علاقات بحريم اخوة خطيبها لانهم في سنها وهم كانوا يتقربون لها وايد ولما تزوجت سكنت في شقة في اهل زوجها وهم بعد ساكنين جنبها كل وحده بشقتها ، وصاروا كل يزورونها ويقعدون معاها ويساعدونها لما يجونها ضيوف يعني ما شاء الله علاقتها بهه كلش حليوة .. ومرة سمعت اختي تقول ان مرت حماها قعد تتكلم معاها عن بيت اهل زوجها وسلباتهم وشنو المواقف اللي صارت لها من قبل معاهم ،، فكانت نصيحتنا انا وامي لاختي انها تتجنب تقول اي شي للمرت حماها في حق بيت عمها تجنبا للمشاكل وان الكلام اللي تسمعه من مرت حماها تعتبر نفسها ما سمعته ولا تقول حق اي حد علشان ما تسبب مشاكل لمرت حماها وووو ……………….
فاذا حسيتي هالحركة من مرت حماج انصحج تعتبرين نفسج كأن ما سمعتي شي وابتعدي عن المشاكل ..
ومع كذا علاقتي بها سطحية
لييييييييييييييييييييييييييش؟؟
لاني جربتها. وشفتها كيف تذم عمتي, وحماتي ونسوان حمياني
ومن قدامهم تموووت فيهم
وبعدين علاقتي بها بس سوالف سوق, وكذا
بس ما اقول لها ويش شريت او ويش سويت
ولا جيب طاري زوجي وحياتي الخاصة ابد
يعني عامليها معاملة زينة بس
سوي مثل ما تنصحني عمتي تقول لي
( اسمعي واجمعي)