كيف حالكم يا عرايس ؟ عساكم بخير ؟
عالعموم بدخل في الموضوع
وحدة من صديقاتي مخطوبة وعيد ميلاد خطيبها قريب
وحابة تهديه شي جديد وحلو
بس للأسف ما تقدر تشوفه لأنه مسافر عشان جذي حابة إنكم تساعدوني في أفكار لشي تهديه بالتلفون أو الإنترنت
بالنسبة للبطاقات أو المسجات أو الأشعار كلها أفكار مستنفذة وقديمة
تبي شي حلووووو ويفرح قلب خطيبها ويكون في نفس الوقت مفاجأة له
وأشكر كل وحدة راح تساعدني مقدماً
ما بنساكم من خالص الدعاء
بنوتة البحرين
السلام عليكم و رحمة الله و بركاته
هلا بيكي أختي…
بالنسبة للهدايا..زفهي متنوعة جدا…و لو عملتي بحث في الركن راح تلاقي أفكار روعة…
بالنسبة لطريقة توصيلها….راح تكون مفاجأة حلوة لو وصلت له الهدية عن طريق DHL أو ARAMEX…راح يشوفها كبيرة و ينبسط فعلا…
بالتوفيق إن شاء الله…
تُشكرين عزيزتي على الرد
ربي يعطيج ألف عافية ويوفقج يارب
بالنسبة لإرسال الهدية بواسطة الـDHL أني خبرتها بس هي تقول صعبة شوي
لأن خطيبها مو ثابت في بلد بسبب شغله
عشان جذي تبي طريقة ثانية بواسطة التلفون أو الإنترنت
فاللي عندها أي شي حلو أو طريقة جديدة ياليت ما تبخل علينا
تحياتي لكم
بنوتة البحرين
في طريقه بس ما ادري تقدر تسويها ولا لأ..
ممكن تتصل على نفس الفندق اللي هو فيه وتسوي طلبيه لكيكه صغيره وتدفعلهم بالفيزا او الماستر كارد وتطلب منهم يودونها له..
أو تشوف محل من محلات الورد والحلويات اللي تكون لهم فروع ثانيه في البلد اللي هو فيها وتطلب منهم يوصلونها وبيصير الدفع من عندها..
وممكن تسوي له بطاقه تكون من تنفيذها وتصميمها على الباوربوينت او الفوتوشوب وترسلها له بالانترنت
وبالتليفون في الطريقه القديمه اللي تسوين له اهداء لأغنيه او شعر عن طريق الارقام اللي تتصل عليها وهم يرسلونها له..
وبالنسبة لdhl ممكن تتصل له وتعرف منه في اي منطقة راح يكون خلال فترة عيد ميلاده بطريقة غير مباشرة
او ممكن تشتري من مواقع تقدر ترسل له في البلد اللي هو موجود فيها ((اغلب المواقع ممكن ترسل البضاعة الى دول اوروبا وامريكا والبعض منها تشمل مناطق جنوب شرق اسيا)) والدفع راح يكون ب فيزا كارد او ماستر كارد ((يعني على حسب الموقع نفسه))