السلام عليكم ورحمة الله
بنات انا ابا اعلمكم كيف تشترون من امازون
لاني في يوم من الايام كنت اسال ومحد طاع يخبرني
كنت احاول واحاول وما يستوي لين ما ظبطت
تعلمت ما ايأس واتم احاول وادور عالشي لين ما اتقنه
المهم قبل كل شي لازم يكون عندكم بريد امريكي مربوط بعنوان بالامارات اذا كنتي من الامارات
هالشي ما كنت اعرفه
كنت دوم اقول فخاطري ليش يعطيني مسج ان ما يقدر يشحن للعنوان الي حطيته عيل كيف البنات يشترون
والله والله كنت اسالهم كيف ويقولون عااادي نشتري ونحط العنوان ويستوي
بدون لا يقولو لي عن خدمة شوب اند شيب او الخدمات الثانيه
الله يسامحهم ما علينا احين
المهم بتروحون موقع ارامكس وتدخلون على shop and ship وتسوون لكم حساب
بيدفعونكم مبلغ 45 دولار مره وحده وبيطلبون منكم تحملون صورة الجواز او الهويه للتاكد
وبعدها بيطرشون لكم ايميل ياكدون اشتراكم وفيه عنوانكم في امريكا وبريطانيا والصين
ارامكس تعتبر احسن شركة شحن للشرق الاوسط
مو الامارات بس
نرجع لامازون
بعد ما تختارين اي شي انتي حابته من امازون بتحطي العنوان الامريكي عسب يشحن لج الاغراض عليه
وبعد ما توصل بريد امريكا راح يوصل لج ايميل يخبرج ان في شي في حسابج وهم راح يطرشونه دايركت للامارات
تقدرين تدفعين قيمة الشحن اونلاين او تخلينه عند الاستلام
يالله نروح امازون نشوف طريقته
راح تطلع لكم هاي الصفحه اول ما تدخلونه
روحي اعلى يمين الصفحه واختاري ان تسوين حساب يديد
بعد ما تنشئين الحساب راح يرجع يفتح لج الموقع مع اقتراحاته لج من السلع
ممكن يعطيج فكره عن البضايع الموجوده
روحي فوق في خانة البحث واكتبي السلعه الي تبينها او تروحين اعلى يسار الشاشه وتختارين القائمه الرئيسيه
عشان تطلع لج كل الاقسام وبتفرعاتها وتبدين تختارين الي تبينه
مثلا
الماركات الموجوده عندهم يسدحونها تحت
انا سويت سيرج على هالمنتج
ونزلت شوي تحت وحصلت الي ابيه
بعد ما اختاره يطلع لي بهاي الطريقه
وعلى اليمين هالبوكس
اقدر اضيقه لل wish list
او add to cart
لاني ابي اشتريه فاظيفه للكارت
بعد ما اظيفه راح تطلع لي بيانات الشحن
واذا كنتي ضايفه عنوان الشحن راح يطلع لج فوق
اما اذا تبين ادرس يديد تقدرين تضيفينه تحت
وبعد ما اختارت العنوان اختار طريقه الشحن
مرات يكون في رسوم على الشحن ومرات لا يكون ببلاش
اذا مستعجلين تحطون الشحن السريع مثلا وكل ما كان اسرع كل ما كان اغلى
انا اختار العادي الي ببلاش ويعطونج تراك نمبر وتعرفين منه متى راح توصل بريدج الامريكي
لما تروحين للخطوه الي بعد راح تطلع لج بيانات الفيزه تعبينها وتكملين للاخير
وبجذيه خلصنا من امازون
بعد ما تسوون الاوردر تقدرون تجيكون عليه من اعلى الصفحه عاليمين
تروحون ل my orders وراح يطلع لكم بهاي الطريقه وتدقون تراك
انا طلع لي جذيه لان اوردي الشحنه انشحنت ووصلت ولا هو يعطي التراك نمبر ومن تضغطين عليه
يوديج دايركت لموقع شركة الشحن وتقدرين تشوفين التاريخ الي بيوصلج فيه
نروح للارامكس
اول ما يوصل حسابج بالارامكس راح تشوفينه جذيه
وهذا المنتج مالي يوم وصل مع فاتورته
بنات هالموضوع من جهدي
ما تنقلونه لو سمحتوا
وكلمة شكرا على الاقل فالاخير
مع السلامه مع موقع يديد عقب
يزاج الله خير على المجهود
خيركم انفعكم للناس..انطبق المثل علييييك, صرااااحه ..الله يجزاك, خييير
ومجهووود تشكري علييييه….
جزاك الله خيرا وجعله فى ميزان حسناتك
شكرا ابتسامة طفل
الله لايحرمج دعواتنا انا وخواتي لاني كنت مثلج ادور دواره ع احد يعلمني الطريقه 
اشكرج من كل قلبي ع هالمجهود
وبما اني داخله من الايباد فنص الصور طالعه والنص الثاني مختفي فياليت لو تصغرينهم شويا
الله يعطيج العافيه وماقصرتي والله يجعله في ميزان حسناتج يارب
رهوفه
مثل ما قلت اني لما كنت اسال ما كانوا يخبروني
في بنات من طبعهم الانانيه لكن انا لا احب الفايده تعم عالكل
وتسلمي عالكلام الطيب
الاخت الي تبي اصغر الصور
انا تعمدت اخليهم بهالحجم عسب تكون واضحه للكل
الموقع من يمينه ليساره يكون واضح