خواتي.. موضوع دائماً يحيرني.. وبما اننا في ركن العروس.. وفستان العروس من أهم المستلزمات.. ليش ما نتناقش في مصير هالفستان عقب العرس؟
سؤال للمتزوجات..
ما هو مصير فستان زفافكِ الآن؟
سؤال للمقبلات على الزواج..
أثناء إعدادك للزواج والفستان.. ماذا خططتِ لمصير الفستان بعد الزفاف؟
خلونا نفيد بعض في هالموضوع المهم.. لو تلاحظون أكثر شي نبذل فيه المال والجهد والاهتمام هالفستان.. مع ان فترة اللبس تكون 2-3 ساعات.. وبعدين يكون مصيره؟؟!!
وسلامتكم..
يزاج الله خير على المشاركة.. بس لو توضحين وين يحطون الفستان؟ في محل بيع فساتين ولا في مكان ثاني؟
بصراحة اختى روح الأمل فكره موضوعج وايد حلوه
بالنسبه للى أعرفهم وخواتى كل وحده منهن عقب العرس تيهم طلبات من بنات بعد ماشافوا الفستان في العرس لتأجير الفستان
وطبعا يتأجر الفستان وتطلع قيمته وأحيانا بزياده على قيمته
وأنا أفكر جذيه أسوي
بالنسية لفكرة عنقاء انا عندي اقتراح عليها ليه ما يكون الفستان باجر معقول والفلوس اللي تيجي من تاجير الفستان يكون تبرعات يعني مو صاحبة الفستان اللي تاحد الفلوس كدا ضربنا عصفورين بحجر ساعدنا عروسه مو قادرة تجيب فستان فرح وتاني ساعدنا غيرنا من المحتاجين هدا رائي والله يساعدنا على فعل الخير
لكن ما تلاحظون ان فستان الزفاف يتجدد كل ستة اشهر تقريبا
والافكار تتغير من جذي الوحده منا من حقها تسوي فستان ليها فخم لكن حرام بينقط في الكبت والناس بتقول راحة موضته شالفايده لذلك انصحكم بان تسون ليكم فستان اجار من احدى المحلات المختصه اذ توجد محلات عندنا على مستوى وتطرح افخم واحلى الموديلات ويستقبلون افكاركم واذا تبغي العروس ان هي تلبسه اول لبسه يسون ليها هذه الفكره عندي افضل من التفصيل على حسابك الخاص اذ هم سيستثمرونه ويطورون فيه ….
اتمنى ان تعجبكم الفكره
تراني بسويهااااا….
تحياتي
انا عندي الحل…
الحين معظم المصممين يصممون ويفصلون فستان للعروس ، وبعد العرس العروس ترجعه للمصمم وهو بدوره يرجعلها نص سعر الفستان…
مثلا اذا الفستان كلف 30 الف درهم ، العروس بتقوم بارجاعه للمحل وتسترد 15 الف…
ومشكوره على مشاركتج.. وفكرتج وايد حلوه ان البنات يأجرون من بعض.. بس لا تطلعون بالاسعار 😉
هلا فيج اختي M_rose_M.. اقتراحج وايد حلو.. ممكن نأجر الفستان بسعر أقل وثمنها يروح للتبرعات ومشروع يفيدنا دنيا وآخره..
هلا اختي سمر.. مشكوره على مشاركتج.. وصدقتي غابت عنا هالنقطة ان الموديلات في تجدد.. في نفس الوقت بعض الموديلات البسيطة الأنيقة.. تظل رائدة..
تدرين أنا فكرت أأجر فستان.. بس الفساتين الحلوه أسعار إيجارها بالآلاف.. والله يعور القلب تدفعين هالكثر على شي تلبسينه ساعتين أو ثلاث بالكثير.. عشان جيه احترت..
هلا اختي shamsa .. مشكوره وايد على مشاركتج.. فكرة نص الثمن يرجع حلوه ويديده علي.. لو تعطينا أسامي هالمصممين.. بس 30000 واااااايد الصراحه.. حتى لو ردوا 15000…
بنات نبا أفكار واقتراحات وآراء أكثر.. نبا نحل مشكلة فستان العروس..
وخلونا نفكر قبل التفصيل أو الإيجار أو الشراء ان هالفستان راح نلبسه ساعتين أو ثلاث فقط…. ونحاول نقتصد فيه قدر الامكان
بالنسبه للمصممين اللى يتعاملون بطريقة انج اتفصلين فستان ايديد وتلبسينه وترجعينه له يعنى كأنج إمأجرتنه وترجعينه للمصمم بعد العرس تقريبا معظم المصممين ايسوين هالشي ممكن اتلاقينهم في شارع المصممين اللى في الرقه مثل ( فيرارا ) والمصمم لبنانى إسمه
( إلـــــــي) وبصراحه شخص واايد طيب ومتعاون وشغله واايد حلو جربوا اتسيروله وأسعاره واايد اوكي
انصحج بمحل كوتورز في الرقة قريب عن فيرارا ويارا ، ترى عندهم هالنظام وتصاميمهم فوق الراقية، وعن الاسعار انا عطيتج مثال مب شرط 30 الف، صديقتي سوت عندهم ب20 الف وردوا لها عشرة الاف…
العنقاء: هو مثل الايجار بس الفستان جديد و على ذوقج