ســـلامي لكم يالغاليات
يعلم الله اني مشتاقه حيـــــل لكم
يالغاليات جيتكم بعد ما درا راسي من كثر التفكير بأمركم
حبيباتي من خلال متابعتي لقسم الطبخ ، كثير جذبني موضوعات البنات إلي
مسوين عزومات في بيتهم وهم الي طابخين ، بس في شي قاهرني ،يابنات ماشاءالله
عليكم ، عيني عليكم بارده ، ويعل ربي يحفظكم ،نفسي اعرف كيف تقدرون تطبخون 5 و6 اطباق متنوعه للعشاء بيوم واحد ويكون عندك ضيوف ، شو إلي تسوينه طلبتكم اريد اتعلم
هل تطبخون قبل ما يجون الضيوف وبعدبن تسخنونه ، ولا في ذيك الساعه تطبخون ولو كان
كذا هل الضيوف يكونو لحالهم ولا شو السالفه ،، انا اطبخ واحب الطبخ بس يمكن لان بعدني
بنت ،هذا مسهل عليي لان امي وخواتي يكونو عند الضيوف ولما اخلص طبختي ( وحده او اثنين بالكثير) اروح البس وانزل اسلم على الناس،بس انتو شو الي تسونه ،،
ادري كلامي مخربط بس من كثر علامات التعجب ما عرفت اكتب خخخخخ
طلبتكم ابغى اعرف وش هو نظامكم في العزومات
اختكم xxx-meme-xxx
اكيييييييد نطبخ قبل مايجون الناس
يعني اذا كان عزومه عشا
نقوم من الصبح ونبلش نجهز السلطات بدون مانصب الصلصات عليها
الصلصات نخليها قبل التقديم
وونجهز الحلويات الصبح بعد خاصه اذا كان حلو بارد
ونطبخ اللحمه والدجاج و نجهز الحمسات و نخلللص كل شي قبل يجون بساعتين
وانا بعد اجهز طاولتي قبل يوم
بس بيوم العزيمه اغسل الاطباق الصبح واجهزهم
يعني خلي كل شغلك جاهز قبل ساعتين او ثلاثه
و سخنيم قبل التقديم
او حطيهم بحافظ حراره
وسلامتج
حبيبتي
وفي وصفات واطباق ممكن انك تعمليها قبلها بيوم او يومين وتحطيهم بالفريز ويوم العزيمة بس تطلعيهم بكري شوي يفتروا وتسخنيهم
والحلى ما يصير عليه شئ لو عملتيه من قبلها بيوم
وكمان ترتيب المواعين اللي حتستعمليهم في الضيافة والتقديم وترتيب البيت ومكان جلوس الضيوف
ويوم العزيمة تبداي شغلك بكري وتجهزي كل شئ ويفضل بس على التسخين وقت وصول الضيوف
اكتب الاشياء اللي حابة اسويها قبل بيومين واروح اشتري النواقص
ويوم العزيمة ابدأاجهز كل شي من سلطات وحلويات
بالنسبة للعشاء احاول اسوي كل طبقين بمقادير وحده
مثلا تبولة وورق عنب نفس المقادير تقريبا في الحشايش والطماطم
مثلا صينيتين بنفس الحمسة مثلا باشميل وفطاير عرفتي وهكذا
ما شاء الله ما قصرن معك المشرفات والعضوات
وفعلا مثل ما قالن فيه أشيا بتحضريها قبل بيوم ممكن
في المعجنات مثلا تعملي الحشوات وتكون جاهزة والحلي عادي قبل بيوم
وممكن المحشي كمان تحشيه وتحطيه بالثلاجه
ممكن تسلقي اللحم قبل بيوم اذا ما فيه طنجرة ضغط
ممكن اذا بدك تعملي مشاوي تكوني مجهزاها ومبهراها وما عليكِ الا الشوي
والله يعطيكِ العافية
اللي تحب واللا عندها إضافة ثانيه تشارك
قبل ما أتزوج كنت مثلج، أعزم صديقاتي و لا أقعد معاهم! كل وقتي بالمطبخ!
بس بعدين صرت أنظم وقتي و شغلي…
توني يوم الخميس كانت عندي عزيمة كبيرة، و من يوم السبت و أنا أخطط لها…
جيبي ورقة و قلم و كتبي المنيو اللي تبين تجهزينه… و عند كل طبق اكتبي المقادير اللي تحتاجينها و المواعين اللي بتستخدمينها… لأن أحياناً تنقص عليج أغراض و تحتاجين تنزلين السوق أو السوبر ماركت تشترينها!
مقادير الأكلات و المواعين الناقصة جبتها يوم الأحد… ابدي بالحلويات… إذا ناوية تسوين حلى بارد مثل ما ذكرت وحدة من الأخوات، جهزيه قبلها بيوم…
و إذا حلى دافي، مثلاً أم علي، أنا حمرت البف باستري و المكسرات و خلطتهم مع بعض و حطيتهم بعلبة بلاستيك قبل العزيمة بيومين!
و حلويات القهوة سويت نوعين، بتي فور و كيك بوبز… البتي فور سويت العجينة من يوم السبت و حطيتها بكيس و دخلتها الفريزر، و يوم الأربعاء خبزته و حطيته بعلبة بلاستيك… و الكيك بوبز سويته نفس الشي يوم السبت و حطيته بعلبة بلاستيك و دخلته الفريزر…
و إذا بتسوين موالح و معجنات للشاي، هذي أحس حلاتها تسوينها بنفس اليوم، بس عن نفسي أنا ممكن أجهز العجينة قبل و أفرزنها و يوم العزيمة أطلعها من بدري عشان تصير بحرارة الغرفة بعدين أشتغل عليها!
انا سويت كيكة مالحة، سويتها قبل ما يجون الضيوف بساعة، لأن حلاتها تكون دافية!
أما المقبلات و السلطات… مثلاً لو بتسوين سمبوسة لفيها قبل العزيمة بكم يوم، أو ورق عنب سويه قبل العزيمة بليلة… و بالنسبة للسلطات، مثلاً أنا سويت فتة، فجهزت الخبز قبل بليلة، حمرته و حطيته بكيس… و الرمان فصفصته و حطيته بعلبة بالثلاجة… أما الخضار قطعتها بنفس يوم العزيمة من الصبح و حطيتها بعلبة بلاستيك و بالثلاجة، و الصلصات جهزتها و بنفس الطريقة… (طبعاً هنا بتحتاجين كمية علب كبيرة و هذي كانت أحد الأشياء اللي ناقصتني و رحت شريت كمية كبيرة أحجام مختلفة و ريحتني كثير في التجهيز)
و سويت سلطة مكرونة، و بنفس الطريقة، سلقت المكرونة من بدري و حطيتها بصينية التقديم و دخلتها الثلاجة… فلما يجي وقت العشا، كل اللي عليج بس خلطي المقادير و قدميها ما راح تاخذ وقت…
و الأطباق الرئيسية، مثلاً لو بتسوين مرق و شوربات، هذولا ممكن تجهزينهم قبل بيوم أو بنفس اليوم الصبح، ما راح يتغيرون… و إذا صواني و تحتاج حشوات جهزيها و فرزنيها… حتى الباشاميل ممكن تجهزينه من بدري تحطينه بالثلاجة…
و إذا طبق رئيسي رز و لحم أو دجاج، عن نفسي سلقت الدجاج من بدري بعدين حطيته بصينية فرن و بهرته و غطيته بقصدير و خليته على جنب… و الرز، جهزت الحمسة من بدري، و وقت العشا كل اللي سويته إني حمرت الدجاج بالفرن و طبخت الرز على طول!
و الحشو و المكسرات حمرتها و جهزتها من بدري…
أما المواعين و أدوات الأكل و الكاسات و أطقم الشاي و القهوة و صواني تقديم الحلويات، هذي كلها غسلتها قبل بليلة و حطيتها على طاولة الطعام و غطيتها بورق سفرة…
و هنا جهزي لكل طبق الصحن اللي بتقدمينه فيه و المغرفة الخاصة فيه، عشان ما تتوهقين وقت العشا و انتي تدورين و ين هذاك الصحن، أو وين ملعقة الغرف؟!!!
و حسبي الأطباق و الملاعق و الشوك بعدد الضيوف عشان ما ينقص عليج شي!
و بعد كاسات العصير بعد ما غسلتهم حطيتهم في صينية تقديم فرشت عليها مفرش صغير، غطيتهم، و طقم الشاي و القهوة حطيتهم بصوانيهم و غطيتهم…
و الحمد لله، بكذا جلست مع ضيوفي طول الوقت، و قبل العشا بنص ساعة، طبخت الرز و خلطت السلطات و قدمت العشا و كان كل شي تمام!
فهذي التجهيزات توفر عليج وقت كثير و تريحج يوم العزيمة عشان ما ترتبكين 
موفقة إن شاء الله F:
والله انكن كفو ويعتمد عليكن الواحد
اخيرا عرفت 
واريد اخضع لتجربه فـ اتصلت بخالتي وبناتها كلهن وعزمتهم عندنا يوم الخميس وبإذن الله بطبق كلامكم
وبصور العزومه والاطباق إلي بسويهن ،، اليوم بكتب الجدول وبحدد الاطباق وبكره الصبح بشتري النواقص
وبحاول انزل لكم جدولـي ، واكيد راح استشيركم
والله احبكم في الله
F:
ماشاء الله الاخوات ماقصرو وبانتظار صور اطباق لعزومه ياقمر
((اسيره الغربه )) سابقا