يسعد لي صباحكم جميعاً عرايسنا الحلوين…
جبت لكم معاي صينية زهرة و بطاطس جداً لذيذة…
الحلو فيها، إنها ممكن تكون طبق جانبي في السفرة إذا استخدمنا فيها بس الخضار!
و ممكن تكون طبق رئيسي لو أضفنا لها دجاج أو لحم مفروم…
و أساساً هي بدون أي نوع لحوم فيها، لكن هنا أضفت لها صدور الدجاج…
أتركم مع المقادير و الطريقة…
نبدأ بسم الله…
بنحتاج (هذي الكمية لصينية كبيرة، أنا سويت نص المقدار):
(أحب أنوه إن استخدام الكركم في طبقنا إختياري، أنا أضيفه من عندي لأني أحب اللون الأصفر في الأكل 
)
الخطوة الأولى:
3 حبات بطاطس حجم وسط، نقشرهم و نقطعهم مكعبات كبيرة، أو ما يعادل 3 أكواب من البطاطس بعد التقطيع
راس زهرة (قرنبيط) مقطع إلى زهرات صغيرة
ملح
ملعقة صغيرة كركم
نجيب قدر كبير و نحط فيه الزهرة و البطاطس، و نغمرهم بماء فاتر و نضيف عليه الملح و الكركم…
نرفع القدر على النار و أول ما يبدا الماء يغلي، نحسب 10 دقايق بالضبط!
بعدين نصفيهم من الماء و نحطهم في صينية بايركس…
الخطوة الثانية (نجهزها في الوقت اللي نسلق فيه البطاطس و الزهرة):
صدرو دجاج مقطعة مكعبات متوسطة الحجم
ملح
فلفل أسود
ملعقة صغيرة كركم
ربع ملعقة صغيرة بابريكا
مثل ما شفتوا، نرفعهم في مقلى عالنار و نشوحهم بشوي زيت لحد ما يستوي الدجاج…
بعدين نوزع الدجاج فوق الزهرة و البطاطس في الصينية…
طبعاً ممكن تستبدلون الدجاج باللحم المفروم، و ممكن تستغنون عن الإثنين!
الخطوة الثالثة:
2 ملعقة كبيرة زبدة أو زيت
حزمتين بصل أخضر مفروم
فص ثوم مفروم
ملح
فلفل أسود
ملعقة صغيرة كركم
ربع ملعقة صغيرة بابريكا
3 ملاعق كبيرة طحين
ثلاثة أرباع كوب جبن تشيدر مبشور أو أي نوع جبن تفضلون، أو ممكن تخلطون أكثر من نوع مع بعض
كوب و نصف حليب طازج
بقدونس مفروم للزينة
نشوح البصل الأخضر مع الثوم في الزبدة أو الزيت على النار، بدون تحمير… بعدين نضيف البهارات كلها…
نقلبهم مع بعض شوي بعدين نضيف عليهم الطحين…
نحركهم دقيقتين بعدين نضيف عليهم الحليب بالتدريج مع التحريك المستمر عشان ما يتكتل الطحين، و في الأخير نضيف الجبن…
نحرك لحد ما يذوب الجبن تماماً… بعدين نصب خلطة الجبن فوق الدجاج في الصينية و نرش الوجه بشوي من جبن التشيدر…
و ندخلها الفرن على حرارة 350 فهرنهايت لمدة 25 إلى 30 دقيقة…
و هذا شكلها بعد ما طلعتها من الفرن…
و نقدمها مع البقدونس المفروم على الوجه…
جربوها، و إن شاء الله بتعجبكم… خصوصاً للي يحب الأكل الصحي و الخفيف
و بالعافية إن شاء الله F:
:::
يمي يمي~!ّ
يسعدني جدا اني اول من يمر وتذوق اول طبق
حبيبة قلبي
يمي يمييييي ماشاء الله عليج اختي ام راشد
مبدعه واطباقك جديده ومبتكره
بالعااافيه عليكم وتسلم ايدك ياقمر …
ان شاء الله لي تجربة قريبة ..
لذيذ الطبق وسهل
بروح الحين اسويه على الغدا
!! تم احلى تقيم تحياتي.
فرحتوني بطلتكم الحلوة…
فعلاً الطبق سهل و ما يبيله شي و النتيجة بتعجبكم بإذن الله…
و زين ريحتكم من التفكير و عطيتكم فكرة للغدا
جربوه و عطوني رايكم F: